Hopi espektativa pa ekipo Kòrsou den Serie del Caribe
CARACAS - Djaweps 2 di februari 2023 pa 10.30 am e representashon di Kòrsou lo midi forsa ku ekipo Cuba den Serie del Caribe ku ta tuma lugá na Venezuela. Hopi espektativa pa e weganan ku lo keda transmití pa Nos Pais TV na enkargo di Alexander Macaja i su crew. Entre otro lo tei Roro Emperador, Gino Valeriaan, Clarck Zalm, Jair Quant i Edson Kelly di Aruba. Glenn Thomas di TeleCuracao ta aya i ta mandando reportage for di Caracas. E crew di Nos Pais ta na Kòrsou i lo transmit tur e weganan di e Serie Del Caribe. Tantu esnan di Kòrsou komo e otro weganan.
WEGANAN
Nos promé wega lo ta kontra Cuba djaweps pa 10.30’or di mainta den Estadio La Guaira. Wega number 2 di Kòrsou lo ta djabièrnè pa 6’or pm kontra Méksiko den Stadium La Rinconada. Djasabra dia 4 e wega ta 10.30’or den Stadion La Rinconada kontra di Panama. Ta sigi djadumingu 1’or pm kontra di Colombia na La Guaira. Djaluna 3’or ta enfrentá Puerto Rico, djamars pa 7.30’or kontra di Venezuela. E último wega di Kòrsou pa loke ta trata e buelta regular lo ta djarason 2’or pm kontra di República Dominicana.
Lo ta un eksperensia úniko espeshalmente pa e hungadónan i téknikonan ku ta den ekiponan ku ta hunga den Beisbòl di Kòrsou, manera Nelmerson Angela, Temesh Lourens, Jordan Lucas, Darren Seferina, Raywendley van Gurp ets. Téknikonan tambe lo kue un eksperensia ínolvidabel naturalmente.Nos tin skèdjel digital di e weganan i hopi potret.
EKIPONAN
Ekiponan partisipante di Seri Del Caribe ta Vaqueros de Montería di Colombia, Cañeros de Los Mochis lo representá Meksiko, Federales di Chiriqui ta di Panama, Indios de Mayaguez ta di Puerto Rico, Tigres del Licey di República Dominicana, Leones de Caracas, Agricultores (Las Tunas & Gramma) i Wild Cats KJ -74 ta ofishalmente e ekipo inskribí di Kòrsou. Weganan lo tuma lugá na La Guaira i Caracas den stadionnan La Rinconada i Jorge Luis Garcia, Carneiro Stadium di La Guaira. La Rinconada Stadium lo habri pa promé biaha, un stadion nobo ku tin kapasidat pa 38.000 fanátiko, esun di mas grandi pa loke ta trata Beisbòl den Suramerika. Tur ekipo por a reforsá ku e mihó hungadónan. Ta for di 1949 tin Serie del Caribe i ta masha hopi Yu di Kòrsou tabata bai Serie del Caribe ántes. Tigres del Licey ta e ekipo ku tin mas título (10) i mas partisipashon ku 20.
ALGUN INFORMASHON DI SÒFTBÒL
Nos ta bai pa Torneo Survivors ku lo sigi wikènt aki ku varios wega na Van Engelen Ballpark. Ta trata aki di e di 3 wikènt di e torneo, pa despues riba djasabra 11 di febrüari e gran final tuma lugá na mesun parke. Ban spera ku no tin hopi awaseru pa e weganan por sigi normal, debí ku skèdjel ta pèrtando formal. Ta pendiente pa pone e wega entre Baranka i Jaws. Tur dos ekipo tin rekòrt di 2 ganá i 0 pèrdí den e kategoría di Liga 50. Den kategoría 60+ tambe Jaws tin 2 ganá i 0 pèrdí i wikènt benidero e dos ekiponan lo topa otro. Ekipo ku sali bai promé lugá den 60+ lo klasifiká pa e final, miéntras number 2 i 3 lo topa ku otro den semi-final.
* * * * * *
Skèdjel adaptá pa loke ta trata Torneo Survivors a sali. Tin varios kambio den e skèdjel i ta bon pa ekiponan tene kuenta ku esaki. Jaws 60+ lo topa ku Nos Tambe Por djadumingu 10’or di mainta i despues Jaws 50+ lo dal den ekipo Baranka despues pa 11.45’or. Ta ekiponan invikto manera nos a anunsiá mas ariba den e kolumna. Nos ta keda te aki pa awe.
