Hopi premio kèsh pa kampionnan di Amstel Bright Premier Cup
WILLEMSTAD – Djasabra, 27 di yanüari, Amstel Bright Premier Cup ta start na Van Engelen Ballpark. Ta trata aki di e di 10 torneo ku lo dura te ku 10 di mart. Ekiponan ku bira kampion lo risibi premio kesh di 50% ‘Cash Back’ di nan konsumo. Nos a risibi un komunikado ofishal di e organisadónan.‘Manera nos a komuniká anteriormente e aña aki lo ta e di AMSTEL BRIGHT PREMIER CUP 2024 organisá dor di SBC Cicoza.
E meta prinsipal di e torneo aki ta pa sosialisá na un manera deportivo i forma un base di interkambio pa kompania i organisashon sosial, deportivo i kultural. E loke ta hasi e evento aki úniko ta e echo ku hóben, adulto, adulto mayor (esta diferente generashon) ta partisipá konhuntamente i asina kompartí energia, eksperensia i sabiduria ku otro. E prestigioso torneo aki a kuminsá na 2014 bou di e nòmber “Champions Cup 2014”. E promé torneo a dura nèt un fin di siman (aña di La Reina) i a konta ku partisipashon di 27 ekipo. Awe e torneo ta karga e nòmber di e spònser aktual, esta “Amstel Bright Premier Cup” i ta konta ku mas di 75 ekipo repartí den 10 kategoria. Pa selebrá e di 10 edishon di e Torneo nos ke bolbe introdusí premio kèsh pa e ekipo kampion di kada sekshon!
Momentu pa selebrá. Pa selebrá e di 10 edishon nos ke re-introdusi premio kèsh pa e ekipo kampion di kada sekshon! Premionan pa Amstel Bright Premier Cup 2024 ta lo siguiente:
Ekipo Kampion Trofeo i un premio “CASH-BACK” di 50% di konsumo PAGA. (Premio MAXIMO ta 750florin!)Ekipo Sub-Kampeon: TROFEO mas 1 kaha di Amstel Bright
Tuma nota ku nos lo registrá TUR konsumo i pago di kada EKIPO den nos sistema POS komputarisá. Pa bo mes por kontrolá, nos ta e-mail bo faktura di konsumo i pago di kada dia di wega! Tuma bon nota ku pa e premio di “CASH-BACK” kompra di ekipo so ta konta i no kompra individual di un hungadó òf fanátiko di ekipo! Nos ta den porta pa ranka sali ku diferente wega den e fin di siman benidero, esta 27 i 28 di yanüari.
Por fabor kompartí e skèdjel i flyer athunto ku boso kolega di trabou, miembro di tim i fanatikada pa asina invitá un i tur pa bin apoyá boso! Nos ta deseá tur ekipo tur klase di éksito i kòrda riba nos lema di semper “Laga FAIRPLAY prevalesé”!Nos lo topa na vèlt! Pa esunnan ku NO a manda lista di hungadó ainda kòrda ku nos lo tin ku pone e nòmbernan den Game Changer ku ta tuma su tempu. Básikamente mayan ta e último dia pa entregá boso lista! Pa esunnan ku NO a manda lista di hungadó ainda kòrda ku nos lo tin ku pone e nòmbernan den Game Changer ku ta tuma su tempu. Básikamente mayan ta e último dia pa entregá boso lista! Nos ke kòrda tur ku no a paga ainda ku tin ku paga esaki preferibel on line promé ku boso promé wega! Komo eksepshon lo ta posibel pa paga na bar kèsh òf swaip e montante di 225,00 florin semper si promé ku bo promé wega.
FABB ta gradisí tur ku a kopera ku nan torneo 2024
WILLEMSTAD – Fundashon Akademia di Baseball Brievengat (FABB) kier a hasi uso di e oportunidat pa gradisí tur ku di un òf otro forma a kontribuí pa e di 25 edishon di Torneo FABB, por tabata unu eksitoso. E torneo aki a tuma lugá e 3 simannan tras di lomba i a finalisá djadumingu último, ku e ekipo di Montaña Abou titulando kampion den Little League i Montaña Ariba komo kampion den Minor League.
Nos ta ranka sali ku un danki na tur nos spònsernan ku a koperá ku nos e aña aki: Brad Church – SynLok Technologies LLC, Hill Ross Casino, HB Management, Stichting BAB i tambe señor Ben Thijssen i su fundashon ku a regalá nos kaha di bala. Nos ta sigui ku tur nos ekiponan di ‘Minor i Little League’ ku a partisipá na e torneo: Liga Pariba, Liga Babe Ruth i tambe e ekiponan di nos hermana isla Aruba.
Nos tin ku bisa ku pa algun di e muchanan di Aruba, esaki tabata nan promé eksperiensia hungando beisbòl den eksterior. Na tur manager i coach nos ta spera di por sigui konta ku boso partisipashon i kontribushon na desaroyo di nos muchanan den e ramo di deporte di beisbòl. Na nos Minister di Deporte i Enseñansa señor Sithree van Heydoorn, nos kuerpo di umpayer i skorer, na tur mayor ku a bin apoyá i sostené e ekiponan i tambe miembronan di prensa ku a sa di kubri e torneo durante e 3 simanan tras di lomba, danki. Tambe na tur ku tras di kortina a duna un man ku nos por wak bèk riba un torneo eksitoso, nos a apresiá boso koperashon. Y pa klousurá, nos no por keda sin yama un danki di kurason na ‘Xander Bogaerts’ ku a aseptá nos invitashon, a inougurá torneo FABB 2024 i a hasi soño di hopi mucha, inkluyendo fanátikonan un realidat ku bo presensia. Na boso tur, un mion di danki.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bontardi. Kon a bai ku Festival di Tumba. Pabien na e ganadónan, espeshalmente na Sharrel Adjatay Denisia ku su tremendo presentashon di e tumba, Tera kordami ken mi ta. Pabien na e kompositor Amos Balentien tambe. Nos a bai dal un buelta djamars último i tabatin un tremendo ambiente apesar ku tabatin pronóstiko ku awaseru lo kai. Tremendo trabou di AMAK i mester bisa ku Festival di Tumba ta un kos hopi serio mes. Un di e festivalnan mas grandi na Mundu. No ta trata aki di un konsierto, pero festival pa skohe ganadó. Mester bai google òf chat pa wak unda na Mundu tin algu asina’ki.
Tur detaye ta kla pa Amstel Bright Premier Cup i a start djasabra 27 di yanüari ku e promé wega. Djasabra awor Amstel Bright Premier Cup ta start ku weganan entre Artemisia – Jaws pa 12.30 sigí pa Flamboyan – Lions pa 2’or. Riba tereno B tin ORCO vs SOAB pa 12.30 i ADC vs Belastingdienst pa 2’or. Riba medionan soshal tin e skema kompletu ku 17 wega durante wikènt aki. Den e promé wikènt aki práktikamente no tin wega anochi. 75 tim den 10 kategoría den Amstel Bright Premier Cup organisá pa Cicoza pa di 10 aña. Na aña 2020 e torneo a terminá djadumingu i e sigiente djaluna gobièrnu a dal skol i komersio sera debí na komienso di e periodo di Covid-19. 2021 i 2022 no tabatin Amstel Bright Premier Cup ku Ryan Isebia i Pim Fangman na kabes. Finalnan lo ta dia 10 di mart na Van Engelen Ballpark riba tereno A i B.
Preparashonnan ta sigi fuerte tantu den Liga Pabou komo Liga Pariba. Pabou tin 4 biaha sigí ta gana den kategoría Little League ku ta e kategoria Creme de la Creme di Little League. E kategoría ku ta move pa Williamsport i haña kobertura inkreíbel pa e muchanan i Kòrsou den e tradishonal Mundial ei. Ta for di 2016 Liga Pariba a gana den Little League pa despues bai Mundial tambe ku hungadónan manera Lo Cijntje, Donovan Antonia, Alle Hollander, Jackey Josepha, Jadon Gosepa, Dangelo Valentina, Michel - Angel Vilchez, Nazir Fernandez, Geidon Marlin, Karim Ajubi, Egory Manuela, Nair Jamanika i Christopher Marshal, Jazlin Bianchi. Josepha, Ayubi, Marlin, Antonia, Manuela i Vilchez a firma kontrakt profeshonal despues. E tim tabatin komo manager Pursy Geertruida i coachnan Gerschwin Meyer i Leroy Antonia. Pabou a gana na 2017, 2018, 2019, 2022 i 2023 den kategoría Little.
Skibiendo di Little League, tremendo trabou di Rignald Martina i crew. Rignald Martina a para 25 aña na kabes di Torneo FABB. Na komienso di e torneo Rignald a bisa nos ku por ta su último biaha komo lider di Torneo FABB ku ántes tabata Torneo Andruw Jones i despues Torneo Kenley Jansen. Tremendísimo trabou i den e dianan benidero nos lo chèk ku Rignald kon ta pará ku e añanan benidero. Otro torneo FABB eksitoso ku ekiponan di Montanja (Ariba i Abou) saliendo kampion di e torneo. Montanja Abou relamente ta den gran forma i algun luna pasá nan a gana Torneo Didi Deeds na Terra Corra.
Bèk pa Amstel Bright Premier Cup. Ekiponan ku tabata kampion na 2023 mester bini fuerte pa defendé nan título. Tin algun ekipo ku tabata kampion ku no tei den 2024. Ban Serio ku a gana Marlins den final na 2023 no tei pero Marlins si tei. Ekipo Swift tei bèk pa defendé su título. The New Radiator ku ta ‘Team to Beat’ den Soshal tei bèk pa defendé su título, ekiponan di SBAB ku tabata bari den varios kategoría no tei. Chonchis tambe ku ta un grandi den Soshal tei atrobe.
%20copy.jpg)
Pa e siman aki nos lo ta ON kargá ku resultado i informashon di Amstel Bright Premier Cup. Sòftbòl Slowpitch ta kuminsá move i tur esnan envolví ta kontentu. Asina lo keda un halá te desèmber 2024 den e deporte mas praktiká na Kòrsou i tur e islanan di Dutch Caribbean. Hopi torneo ABC&S atrobe den 2024 riba tur nivel. Kòrda di 1 te ku 9 di febrüari na Loan Depot Park tin Serie del Caribe ku partisipashon di ekipo Curacao Suns di Kòrsou. Nos Pais Television lo transmití tur wega. Te djaluna ku Poder di Dios.
