Fanátikonan di Deporte Kòrsou, felis wikènt Nos tei atrobe ku basta informashon. Ekipo Firebirds tabata basta aktivo siman pasá den firmamentu di hungadó. Nan a firma Shair Lacrus, Arguentely Bonevacia i Sorick Liberia. Nos a tende e notisia di Shair Lacrus mas o ménos dos luna pasá. Shair tabata den Santa Maria, pero no tabata bai e weganan. Den e wega krusial, wega number 5 di play-off semi-final kontra di Wild Cats, Shair a picha aseptabel despues di basta tempu sin picha. Ta un picher ku por yega 88 mia pa ora i ta un èks profeshonal ku organisashon di Boston. E ta ruman di Sherman Lacrus ku tabata èks profeshonal den organisashon di Texas Rangers.
* * * * *
Shair lo bira un dje estelarnan di Firbirds ku lo duna kompetensia pisá na otro ekiponan. Firebirds a terminá ku rekòrt di 4 ganá i 8 pèrdí i a kai nèt for di play-off, debi ku ta 5 ekipo a bai e aña aki. Ekipo Groot Kwartier a terminá nèt un wega riba Firebirds ku rekòrt di 5-7 i a bai play-off. Groot Kwartier Stars a pèrdè kontra Santa Rosa ku despues a bira kampion. Santa Rosa a sali number 4 ku rekòrt di 6 ganá i 6 pèrdí, gana Groot kwartier i bai 7-6 (si por sigi konta e weganan ganá). Gana 3 wega di Royal Scorpions i pèrdè 2 den semi-final. Gana Wild Cats 4 wega i pèrdè 3 den final. Santa Rosa a gana 14 wega i pèrdè di 11 den weganan di Beisbòl Dòbel A den 2020.
* * * * *
Biniendo bèk riba Shair La Cruz, ela hunga varios selekshon di Little League te ku Senior League. Na 2009 e tabata picher i bon batiadó di e selekshon ku a bai Williamsport. E selekshon ei di Liga Pabou a gana Liga Willemstad pa nòkout 10-0 den e wega final ku Little League Ballpark de bote en bote. Tabata e último biaha di e 9 biahanan sigí ku selekshonnan di Kòrsou tabata bai Williamsport. Despues nos selekshonnan a bai na 2012, 2016 i 2019. Arguently Bonevacia tambe a firma ku Firebirds. Tremendo shortstop ku tremendo man i ta yu di Arthur Bonevacia. Varios hungadó mas a bai Firebirds. Nos a tuma nota di e kambionan aki riba Facebook. Nos a mira Swindley Lint tersera base i picher di Santa Rosa tambe na momentu di e firmamentu di hungadó. Swindley Lint ta primu Gionelo Jansen manager di Firebirds.
* * * * *
Santa Maria Pirates ta duru riba e hungadó Risandro Pastor ku tabatin un gran temporada atrobe den Wild Cats. Pastor tabatin un temporada mònster den 2018, kaminda ela bira MVP di temporada regular ku ekipo Marchena Braves. Na 2019 Pastor a bai Wild Cats i bolbe pone bon sifra. Uniko picher habridó den Beisbòl Dòbel A ku ta hunga tur posishon, bati, kore. Pastor por picha komo habridó i relevo. Ela demonstrá ku e por gana weganan grandi i ekiponan grandi na momentu di bèrdat. Ela gana dos wega den semi-final i dos wega den final. Parse ku Santa Maria a laga dos hungadó bai ku no a kaba nan 3 aña ainda i nan ta spera ku Wild Cats tambe lo laga bai den e kaso di Pastor. Parse ku Pastor no a tuma un desishon ainda.
* * * * *
By the way, mas firmamentu di Firebirds riba nan página den Facebook. Nathaneal Macaya ku tabata estrea den selekshon di Pariba. Nathaneal ku a hunga den 2020 ku Royal Scorpions a firma ku Firebirds i Firebirds a firma tambe Sorick Liberia, èks Marchena Braves/Santa Rosa i Santa Maria. By the way, Nathaneal Macaya no tabatin masha aktuashon den 2020, solamente dos bala den play-off semi-final. Sorick tabata un estrea den Little League ku no a firma profeshonal, pero a hunga den kolegio na USA. Tremendo shortstop ku ta filea i bati. Laishenel La Crus outfielder ku ya tabatin varios aña ku ekipo tambe a firma ku Firebirds. Laishenel di 33 aña a hunga den vários tim den Dòbel A, entre otro Royal Scorpions i Santa Rosa. Na algun okashon ela kaba den e lidernan den bateo.
* * * * *
Tin indikashon fuerte ku Shurendell Mujica lo keda Wild Cats. Grandinan di Wild Cats a yega serka i a papia ku Mujica pa e keda. Hopi hungadó ta pendiente pa yegada di e magnate di Wild Cats, Kenley Jansen, pa e pone kos pasa i pone tur hende para ketu. Ban purá pa Beisbòl Veterano promé ku nos sera e kolumna. Beisbol Veterano ta super kayente kaminda 4 ekipo lo hunga double header e wikènt aki.
