Fanátikonan di Deporte Kòrsou, Felis wikent. Nos tei atrobe ku informashon di Beisbòl i Sòftbòl. Djamars tabatin un wega di Beisbòl Dòbel A ku a terminá ku un skor feros entre Santa Maria Pirates i Groot Kwartier. E wega a terminá ku skor di 25 pa 8. Dado momentu Santa Maria tabata ganá ku skor di 22-0 i despues 25 pa 3. Komentarionan a kuminsá skeiru riba facebok ta kiko ta pasando aya na Tio Daou Ballpark. Finalmente Groot Kwartier tambe ta nota 5 kareda pa e wega terminá den 5 inning ku e skor ariba menshoná 25-8. Santa Maria a usa 4 picher i Groot Kwartier a usa 5 picher. Djarason Santa Maria a bolbe gana Groot Kwartier ( e biaha aki 6-5). Santa Maria a drecha nan posishon riba e standing di Beisbòl Dòbel A i ta na di 4 lugá ku rekòrt di 5-5. Groot Kwartier mesora a bai na di 6 lugá (3-7). Djabièrnè Santa Rosa a sorprende Wild Cats ku tremendo picher di Siamani Boekhoudt i Herselon Juliana. Santa Rosa a blankia Wild cats 6-0.
* * * * *
Bek pa ekipo Santa Maria. Santa Maria Pirates lo bai kue forma ku refuersonan manera Darren Seferina, Juremi Profar, hungadónan nobo manera Aldair Adamus, Kevin Gibson, Yarden Lionarons ets. Juremi Profar un tempu prospekto grandi den e organisashon di Boston Red Sox, tabata den gran forma den e wega di djamars kontra Groot Kwartier konektando dos homerun. Profar ta batiendo .385 den 3 wega hungá ku 6 RBI. Profar di 25 aña a firma profeshonal na 2012 ku Texas Rangers, organisashon ku a firma su ruman tambe ku ta Jurickson Profar. Un tremendo infielder ku bon man ku mester a yega MLB masha tempu, pero ya. Suerte tambe mester ta den e wega pa bo por yega. Tin ora nos hungadónan ta para mira hungadónan ménos bon ku nan subi den e liganan i yega MLB. Profar a yega di bati .330 ku 13 homerun den Klase A den e organisashon di Texas.
* * * * *
Nos a wak un video riba Facebook (Nos Tesoro) kaminda 1993 Luisgardo Alvarez picher di Liga Vruminga, tabata kampion picher di Liga Vruminga. Na 1993 den Kiwanis Piscadera, Diegomar Markwell a bati pa average di .551, 31 RBI, 8 ganá i 0 pèrdí di 1.10 durante su aktuashon ku selekshon di Little League na Panama, tremendo. Stanford Landburg picher di ekipo Love Ice, 0.57 komo picher averahe .343. hungadó mas balioso den Senior. Ela destaká tambe den weganan Latino Americano. Ferdinand Rosalia di bario di Kent U Zelf ku a hunga den Pif Paf Killers di Santa Rosa. Su ekipo sup-kampion tras di Royal Scorpions. Ferdinand tabata MVP di Hubenil. Ké mèn, Luisgardo MVP di Vruminga, Diegmar Markwell MVP di Little League, Stanford di Senior League i Ferdinand di Hubenil. Te tempu ei no tabatin Minor i Junior. Bèk den tempu un ratu ku Nos Tesoro riba Facebook.
* * * * *
Djaweps Baranka a dal Jaws den Liga 40 19 pa 2 ku 3 homerun di Edmar Cornelia. Swift ku Dimitri Leon komo manager a gana su ruman Sergei di Gamers 6-1. Standing den Liga 40 ta Swift 4-0, Crazy Tigers 3-1, Gamers 2-2, Baranka 1-3, Jaws 0-4. Lider den Bateo ta Stanford Landburg ku tin .750, Ian Ignacio (Swift) .750. Den kareda empuhá tin un empate entre Stanford Landburg (Crazy Tigers) i Rodney Michel (Gamers) ku 8. Enrique Madera ta lider den picheo pa loke ta ERA ku 3.23, ta sigi Emilio Velarde ku tin 3.50. Madera i Velarde ta di e ekipo Swift. Velarde ta lider den ponche tirá ku 7 ponche den 10 inning.
* * * * *
Beisbòl ta sigi na Hulanda. E wepsait di Beisbòl di Hulanda honkbalsite ta na ingles awor. L&D Amsterdam a gana Curacao Neptunes ku skor di 6-0. Curacao Neptunes ta keda na promé lugá ku rekòrt di 30-6, ta sigi L&D Amsterdam ku 26-8 i un empate, HCAW tin 25-10 i un empate, Twins Oosterhout 21-13. Ta sigi DSDS Kinheim 12-24, Hoofddorp Pioneers 11-24, Silicon Storks 9-26 i Quick Amersfoort ku 6-30. Varios hungadó ku ta aktivo na Hulanda ta pendiente pa reforsá ekiponan di Kòrsou, pero mester haña OK di Hulanda promé i mester yega promé ku dia 20 di ougùstùs pa por kompletá e weganan pa por partisipá na play-off. No ta sigur ku Nelmerson Angela lo por yega Kòrsou pa hunga pa sea Santa Maria òf Wild Cats. Nos ta keda te aki pa awe.
