Fanátikonan di Extra Inning, bondia. Nos tei atrobe den otro fin di siman kaminda ku tin aktividat na varios tereno di bala. Den Hubenil ta ekipo Firebirds, Santa Rosa Indians i Wild Cats ta ariba ku rekòrt di 10-4. Royal Scorpions ta sigi ku 9-5, Marchena Braves 7-7, Groot Kwartier 4-9, Santa Maria Pirates 4-9 i Royal Magic 1-13. Arlyson Rodriguez di Wild Cats Hubenil ta lider den bateo ku average di .536. Arlyson Rodroguez ta mas konosí komo un bon picher i tin 9 inning tirá ku rekòrt di 2 ganá i 0 pèrdí. Arlyson Rodriguez ta yu di ‘Arlyson Rodriguez Rr. (Galichi) i ruman di Alexander Rodriguez di Wild Cats.
* * * * *
Pa loke ta trata kareda empuhá den Hubenil, Ridgly Ostiana di Wild Cats tin 26 kareda empuhá i Alexander Rodriguez ta na di dos lugá ku 21 RBI. Lyendley van het Kruys ta number 1 den picheo pa loke ta trata ERA, Van het Kruys tin un ERA di 1.88. Den ponche tirá, e picher Eddyson Jobs (Firebirds) ta lider den ponche ku 43 ponche tirá den apénas 28 inning. Jobs tin un ERA di 4.40. By the way, Firebirds a protestá e wega ku Marchena Braves a gana den Dòbel A kontra di Firebirds. E rumannan Polonius a partisipá den e wega ei i nan mester ta inskribí den Hubenil i no Dòbel A. Si un hungadó tin edat di Hubenil e mester ta inskribí den Hubenil segun reglanan di FEBEKO. Nos a wak Standing I mira ku Marchena su rekort ta di 0-13. Marchena ta pendiente pa kasonan kontra FEBEKO. Mientras tantu Roy Philips di 57 aña lo habri pa Marchena djadumingu vs Wild Cats. Habri wega den Dòbel A ku 57 aña mester ta un rèkort.
* * * * *
Den Marchena tin dos ohochi, rumannan Rainer i Ryson Polonius i tambe tin rumannan Alex i Alexander Henrietta. Nos no ta kòrda den historia ku tabatin ekipo di Beisbòl Dòbel A ku ruman ohochi den tim i mas ainda dos ruman ohochi den mesun tim. Marchena a kuminsá gana bou di maneho di Gilmar Velder i awor protesta a kuminsá bati na nan porta. Riba e fecha ku e rumannan Polonius a hunga den Dòbel A di Marchena, Hubenil tambe tabatin wega i e hungadónan menshoná mester a hunga den Hubenil. En todo kaso e situashon ta bira mas fèrfelu pa ekipo Marchena Braves. Djamars Marchena Braves a pèrdè pa nòkout kontra di Royal Scorpions. E wega a terminá 12-2 i a tuma lugá den Tio Daou Ballpark ku ta wanta awa muchu mas mihó ku Stadion Johnny Vrutaal naturalmente.
* * * * *
Kampionato regular di Beisbòl Hubenil i di Klase A a terminá. Ta pendiente pa start ku play-off e wikènt aki den Klase A, miéntras ku Hubenil ta start wikènt di 4 i 5 di sèptèmber. Den Hubenil a klasifiká Firebirds, Santa Rosa, Wild Cats i Royal Scorpions. Den Klase A a klasifiká Santa Rosa, Firebirds, Groot Kwartier i Royal Magic. Den Hubenil mester hunga deskite e wikènt aki, esta 28 di 29 di ougùstùs. Nos tin e sfiranan di Klase A tambe i a publiká nan kompletu. Kòrda den Klase A ta trata di sifranan final. Cristien Josephina di Santa Rosa Indians a sali kampion bate ku average di .567, Danyoni Newton di The Champs a sali na di dos lugá ku average di. 500. Christien Josephina a sali number 1 den RBI tambe ku 16, sigí pa Hendrick Habath tambe di Santa Rosa Indains ku tin 15 RBI.
* * * * *
Tahir ‘Osje’ Martis di Royal Scorpions ta lider den picheo ku un ERA di 1.75. Despues ta sigi Quillian Josephina di Firebirds ku tin 2.15. Den ponche ta Eldrick Henriquez di Santa Rosa ku tin 32 strike out, sigí pa Quillian Josephina ku tin 28 ponche tirá.
* * * * *
Ban pa Beisbòl Veterano, wikènt benidero ta kandela ta bai tin na Tio Daou Ballpark. Djasabra i djadumingu awor ta kla pa loke ta trata klasifikashon. Pa nos e 6-nan ta konosí kaba, pero kandela lo bai ta kua ekipo lo terminá den e promé 3-nan. Ekiponan klasifiká kaba ta Isla, Jandoret, Santa Maria, Quality, Santa Rosa i Bulldogs. Ban wak kua ekipo lo keda den e promé 3-nan pa bai play-off semi-final direkt. Kòrda ku number 5 lo topa 6, despues e ganando lo topa 4 den e promé wikènt di play-off.
