Lesadónan di Deporte Kòrsou bon dia. Deportenan popular manera Sòftbòl Slowpitch i Beisbòl Veterano ta yegando na final. Beisbòl Veterano 50+ lo terminá djadumingu 5 di desèmber i Sòftbòl Slowpitch Liga 50 ta djasabra 4 di desèmber. Nos tin vários informashon tokante kambionan ku ta na kaminda den Sòftbòl 50 i Beisbòl Veterano. Signald Burnet dirigente di ekipo The Brothers di Beisbòl Veterano a desmentí ku tin kambio grandi na kaminda i ku lo tin doño/dirigente nobo pa e ekipo den 2022.
* * * * *
Santa Maria apesar ku a bira kampion lo sigi drecha nan ekipo i nan ta tras di dos infielder i un outfielder. Ekiponan ku ta klasifiká semper manera Isla, Bulldogs i Santa Rosa no tin masha moveshon. Jandoret lo fortifiká nan picheo i outfield. Ta intenshon pa 50+ bira mas serio den Beisbòl i lo start temporada mas tempran. Basta hungadó klave den nan ekipo ta yegando 50 i ke hunga mas trankil huntu ku hungadónan den nan edat. Mester atmití si ku e mihó pichernan ta 50+. Manera entre otro Amador Nita, Orsendo Clemencia, Deron Clara, Earl Virginia, Renato Anasagasti, Johnny Balentina, Xavier Avastia, Momon Martina ets. Liga 50 lo bira un kos basta serio den añanan benidero. By the way, bon ambiente den Sòftbòl 50+ djasabra último na Van Engelen Ballpark i einan nos a risibí basta komentario di kambionan na kaminda pa 2022.
* * * * *
Ekipo Baranka/Sharks ta rumbo pa bira Baranka, miéntras ekipo Flamboyan/Tigers ta pendiente pa bira Tigers den 2022 ku hopi kambio pendiente. Tigers tin ekipo den Liga 40 tambe, pero no ta konosí kon lo sigi ku Liga 40 Sòftbòl riba djamars i djaweps anochi na Van Engelen Ballpark. Un dje grandinan di Liga 40 Baranka ta evaluando ku lo sigi kompetí den 40+ anochi. E picheo a bira poko rápido pa e 40+nan den oranan di anochi i bou di lus. Liga 40 a drei ku 5 ekipo den 2021, Swift ku a bira kampion, Tigers supkampion, Baranka, Gamers i Jaws.
* * * * *
Djadumingu 28 di novèmber mester tabatin final di Sòftbòl Komersial organisá pa Quick 60 den Stadion Post 6. E wega Polis tabata den final kontra MCB a keda suspendé djadumingu pa motibu di awaseru i mal estado di tereno. E wega a sigi djamars i Polis a gana MCB i bira kampion di e parti Soshal. Na Van Engelen Ballpark tabatin Kicking Ball despues di e wega number 2 di e gran final di Liga 50. By the way, nos no a tende masha notisia di Beisbòl Dòbel A manera ta kustumber. Den kurso di e siman aki i mas den desèmber nos lo lòs algún bòm. Royal Scorpions ta e ekipo ku tin mas hungadó liber pa temporada 2022. Nos a tende ku Risandro Pastor a firma pa 3 aña mas ku Wild Cats for di luna di òktober. Wild Cats a mara e utility/picher number 1 den Beisbòl Dòbel A. Alexander Rodriguez lo ta den di dos aña ku Wild Cats despues ku su ruman Arlyson lo firma profeshonal ku organisashon di New York Mets e siman aki.
* * * * *
Saludo pa Junior Orcadio ku 5 aña pasá a bira MVP di e final entre Jandoret Raiders i Isla Crackers. Tabata un final kargá ku fanátiko. Richel Angela e tempu ei ku Mi Kos (ekipo di Moises Zimmerman) a bira kampion bate. Curby Brunken i Vernon de Lanooi tabata lider di homerun ku 3 homerun i Raymond Soerka e tempu ei ku Azucar a bira kampion picher. Beisbòl Veterano 5 aña pasá na Vi Jansen Ballpark. Un tempu òf mihó spliká, pa hopi tempu tabatin Beisbòl Veterano na Vèlt Salu tambe. Un wikènt na Vèlt Salu i otro wikènt na Vi Jansen Ballpark.
* * * * *
Nos a bai bèk un ratu na 2010 den Beisbòl Veterano, ku tabata promé aña di Bulldogs den Beisbòl Veterano. Ekiponan di e tempu ei tabata Santa Maria, Bulldogs, Yesterday, Nos Union, Santa Rosa Memories. Nos tabatin ku Elroy Philips a picha pa Bulldogs gana Azucar i dal un homerun. Didi Gregorius a hunga e aña ei ku Santa Maria den promé aña di Santa Maria. Brievengat tambe tabata den Beisbòl Veterano.
* * * * *
Den Sòftbòl Liga 50 seri entre Baranka i Pitufos ta empatá i pa loke ta trata 50+ Beisbòl Veterano ekipo Yesterday i Jandoret a klasifiká. Yesterday a gana Sigi Hunga 7 pa 4 i Jandoret Raiders a derotá Vosama 8 pa 0. Djasabra 2.or tin e finalísimo wega entre Baranka i Pitufos na Van Engelen Ballpark i dajdumingu ta Jandoret Raiders vs Yesterday pa 2.30’or na Vi Jansen Ballpark. Nos ta keda te aki pa awe.
