Lesadónan di Deporte Kòrsou bon dia. Nos tei atrobe ku basta informashon di Sòftbòl Slowpitch i Beisbòl. Awe nos tin algún detaye mas di ekipo Jandoret Raiders ku djabièrnè siman pasá a kumpli 25 aña di eksistensia sin interupshon partisipando tur aña na kampionato i torneonan na Kòrsou, Aruba i Boneiru. Vários ekipo a kumpli aña resientemente i naturalmente no tin masha selebrashon, debí na Covid-19. Ekipo Tigers a kumpli 23 aña di eksistensia. E ekipo a kuminsá den Liga Amistad, despues nan a bai Liga Trai Seru, segidamente Liga van Engelen i awor den Liga 40. Albertico Rafael ta bosero di ekipo Tigers ku ta e kampionnan di Liga 40. Na 2020 no tabatin kampionato i te ainda e ekipo Tigers ta kampion di Liga 40.
* * * * *
Baranka i Happy Stars nan aki tabata komandá den Liga 40 i awor ta Tigers ta manda. Baranka tabata kampion na 2018 i 2017. Happy Stars na 2016. Entre 2007 pa 2018 ta Baranka i Happy Stars so tabata bira kampion di Liga 40, Baranka kampion 2007, 2008, 2010, 2012, 2014, 2015, 2017 i 2018. Ekipo Happy Stars kampion na 2009, 2011, 2013 i 2016. Ekipo Tigers ta kampion di Liga 40 na 2019. Skibiendo di Tigers esei ta un parti di historia di Liga 40 di último añanan pa loke ta trata Sòftbòl Slowpitch.
* * * * *
Saludo pa un di nos fiel sigidónan di e kolumna aki ku ta Fety Curie. Fety a manda un pòtrèt pa nos kaminda e ta huntu ku Jonathan Schoop ku potrèt den unifòrm di Detroit. Fety den unifòrm di Detroit huntu ku su brother Jonathan Schoop normal bisti. Fety ta sigur ku ekipo Jaws lo bai final di Liga 60 den 2021 atrobe, pero master wak ekipo Nos Tambe Por di Chan Schoop ku ta tata di Jonathan Schoop. Nos ta kòrda Marciano ‘Chan’ Schoop ku ekipo Curioso na final di añanan 80. Nos ta kòrda ku Papi Maria, sua di Chan Schoop, estrea di Futbòl ku tabata saka e homerunnan manera nada den añanan 80 na entre otro Sabana Ballpark.
* * * * *
SKAK ku ta Sòftbòl Komerisal Aruba Kòrsou tin Geralton Martha na kabes aki na Kòrsou. Si tur kos normalisá pa loke ta Covid-19, Torneo SKAK lo tuma lugá na Kòrsou di 29 di yüli pa 1 di ougùstùs. Na 2019 e torneo tabata na Kòrsou i tabata un éksito rotundo. Saludo pa Tico Loopstok ku ta inisiadó di Torneo SKAK na Aruba. Na 2019 Loopstok a kumpli 30 aña den e sekshon hotelero aya na Aruba. Na 2019 na Kòrsou ekipo SBAB ku Jeremy ‘Loko’ Lucasnan aki a gana Kooyman i bira kampion di Torneo SKAK. E torneo a tuma lugá den mesun temporada, esta komienso di ougùstùs. SIPS di Polis a organisá e torneo ei. E intenshon ta pa Sint Maarten i Boneiru tambe djòin den añanan benidero.
* * * * *
Nos ta bai bèk den tempu un ratu den Slowpitch atrobe, rekordando añanan 2000 bin ariba. Nos a dal den un pòtrèt di Dalpega ku hungadónan manera Tyron de Palm, Winston Kirindongo, Ludwig Pietersz, Gerald Mathilda, Sherwin ‘Billy’ Belioso, Edric Reenis, Joel Angelista, Judsel Baranco (QEPD), Jose Obispa, Lyndon Magloire, Robertson Josefa, Donovan Seferina, Elio Antony, Lionel Li, Bani Coffie, Edsel Leito, Ryan Samuel, Gilford Schmidt i otronan. Ekipo bou di direkshon di Pursey Pereira do Tanque, Flip Sambo ets. Dushi tempu mes di Sòftbòl Slowpitch na Suvek Ballpark ku awor ta Van Engelen Ballpark. E tim aki tabata di spònser pa LBH Group ku ta un negoshi (Banko) Offshore.
* * * * *
Nos tin pòtrèt di Ethley Albertus ku tabata picher i kètcher un tempu di Sigi Gosa i despues den ekipo Carpatula. Bon kètcher ku bon poder na bate i picher tambe. Ethley ta ruman di Errol ‘Kayobi’ Balborda (QEPD). Kayobi ta ruman di Gensley Balborda i tata di Earl Balborda, èks minister i èks bosero di Refineria Isla. Ata un gran fanátiko di Sòftbòl Slowpitch i di Baranka ku ta Frank Pieter. Un dje grandinan di nos fiel lesadónan. Saludo tambe pa un dje grandinan ku ta Abigail ‘Junny’ Vilchez, un dje gran podernan di Sòftbòl Slowpitch. Mas nòmber aki, Nervin Brunken picher di Scharloo i Nos ku Nos. Nos a dal den un pòtrèt di ekipo Noord Salinja Braves i un ekipo Amigos di Boneiru tambe.
