Curacao Little League Baseball a rekordá Selekshon Senior di 1975 i duna nan homenahe
WILLEMSTAD- Durante apertura ofishal di e kampionato di Karibe di Senior League 2025 a duna homenahe na e selekshon di Kòrsou ku 50 aña pasá a representá Kòrsou. E apertura ofishal a tuma lugá djamars, 24 di yüni 2025 den Tio Daou Ballpark. Hungadónan di e selekshon menshoná i nan manager di e tempu ei, Frank Curiel a desfilá durante e apertura ofishal tras di e delegashonnan i a risibí e aplouso di e públiko
.
Reynold Cijntje e lider di e grupo a hiba palabra durante e seremonia i e MC a menshoná nòmber di tur e hungadónan di selekshon Senior 1975 ku tabata presente. E hungadónan ku tabata presente tabata Renato Anasagasti, Wendell Bernadina, Rignald Castillo, Reynold Cijntje, Rudsel Dielingen, Raul Rosales, Rudsel Schmidt i naturalmente Frank Curiel.
HISTORIA KORTIKO
Selekshon Senior di aña 1975 a bini huntu 50 aña despues ku nan a hunga na Veja Baja, Puerto Rico. Tabata e promé kampionato Latino Americano di Senior League ku e selekshon di Kòrsou a partisipá. Reynold Cijntje ku ta un di e miembronan di e selekshon a duna nos detaye di kon kos a bai na 1975. E selekshon a partisipá di 1 pa 8 di ougùstùs na 1975 na Veja Baja (Puerto Rico) bou di direkshon di Frank Curiel i tékniko Ernest Smith. Boy Tweeboom tabata delegado. E selekshon a terminá na di 5 lugá tras di grandinan manera Puerto Rico ku a sali kampion, República Dominicana, Venezuela ets. Nos tin nòmber di e hungadónan i dirigentenan, tin algun di nan na Hulanda i algun no ta huntu ku nos mas.
Renato Anasagasti, tersera base; Wendell Bernadina, picher; Rignald Castillo, segunda base; Reynold Cijntje, centerfield; Michel Daou, picher/outfielder; Rudsel Dielingen, primera base/kecher; Adel Donker, picher; Ludwig Jakoba, shortstop; Gerschwin Leuteria, kecher; Fitzroy Mariano, picher; Ramon Rosales, rightfielder; Rudsel Schmidt, leftfielder; Rodney Schmeltz, infielder; Hensley Sluis, picher/outfielder. Ludwig Jakoba asali kampion bate di e kampionato ei di 1975.
Hungadónan Leuteria, Jakoba, Mariano, Sluis i Donker ta na Hulanda. Dirigentenan Smith i Tweeboom a fayesé. Hungadónan Schmeltz i Daou tambe a fayesé.
