Jandoret Raiders kontra Yesterday djasabra 2’or den Beisbòl Veterano i varios ekipo di Kòrsou den eksterior
WILLEMSTAD- Jandoret Raiders lo midi forsa ku Yesterday djasabra 2’or den Wild Card di Beisbòl Vetreano. Jandoret a terminá number 5 i lo topa ku Yesterday number 6. Ganadó lo topa ku Santa Maria ku ta number 4. Den wega amistoso djasabra mainta 10.00 Jandoret Raiders lo topa ku Legends di Hulanda. Pa otro siman lo start ku play-off semi-final entre e ganadó di e wikènt aki kontra di Quality Stars i e otro seri lo ta Santa Rosa kontra Isla Crackers.
Dos selekshon di Sòftbòl Femenino 50+ pa Sint Maarten
WILLEMSTAD- Wikènt pasá tabatin presentashon di unifòrm di e 2 selekshonan 50+ damas ku promé biaha ta bai representá Kòrsou na Sint Maarten. E selekshonnan lo biaha dia 8 di novèmber pa Sint Maarten i Liga Deseo Streanan Dj’ayera 50 + ta super orguyoso pa ku e logro aki. Un kantidat di 44 persona lo biaha huntu pa asina den nòmber di Dios bini ku e trofeo. E preparashon tabata tremendo danki na e kuerpo tékniko ku ta konsistí di Ruwel Matrona, Emile Haswell, Sherlon Martis i Irvin Leuteria.
Tabata un anochi ku masha informashon kaminda sra. Mellissa Rosalina a bisa ku no tabata nada fásil pa por a hasi esaki, mas aún ora yega serka esnan pa yuda e interes ta poko. E 2 timnan lo representá Kòrsou bou di e nòmbernan Curacao Stars i Curacao. Awe pa 10’or di mainta e delegashon lo subi avion rumbo pa Sint Maarten. Madrinanan di e selekshon ta sra. Marlen Obispo fundadó di Liga Streanan di Ayera i sra. Edna Rosalia. Padrino ta Gilbert ‘Gigi Hooi’. Sra. Melissa Rosalina i su crew ta yama danki na tur ku di un òf otro manera a sa di yuda.
Ekipo Petro Amigos den Torneo na Medellin
MEDELLIN- Ekipo Petro Amigos kargá ku hungadó i fanátiko a move pa Medellin djamars 7 di novèmber. E ekipo ta partisipando den un torneo kaminda tin partisipashon di ekiponan di Panama, Aruba (Deco’s) Venezuela, Colombia i naturalmente Kòrsou. Weganan a start for di ayeranochi. Nos ta pendiente pa resultado di e weganan. Djarason e ekipo a gana Cartagena ku skor di 10-9. Djaweps e ekipo a pèrdè ku skor di 7 pa 3 kontra un otro ekipo di Cartagena i despues pèrdè dos wega mas. Petro Amigos te ku djabièrnè anochi tabatin rèkòrt di 1 ganá i 3 pèrdí.
Eksitoso wega amistoso entre Santa Rosa Indians i Legends.
WILLEMSTAD- Djasabra atardi tabatin un wega amistoso entre Santa Rosa Memories i ekipo Legends di Hulanda. Ekipo Legends ta un ekipo formá pa hungadónan Yu di Kòrsou ku ta biba na Hulanda. For di 2016 e ekipo ta bishitando kòrsou i Aruba den luna di novèmber. Djasabra awor pa 10.30’or e ekipo lo hunga un wega amistoso kontra di Jandoret Raiders.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. E siman aki vários ekipo di Sòftbòl Komersial a move pa eksterior. Ekipo Petro Amigos a sali ayera pa Medellin Colombia. Varios nòmber konosí den Slowpitch i hopi veterano di 60+ a move ku e ekipo Petro Amigos. Dos selekshon di Sòftbòl Veterano a move pa Sint Maarten djarason 8 di novèmber. 44 persona a move ku e delegashon aki ku lo partisipá na un torneo na Sint Maarten. Naturalmente hungadó, tékniko i fanátiko. Den e artikulo nos tin mas detaye i entrega di unifòrm ku a tuma lugá wikènt pasá.
%20copy.jpg)
* * * * *
Santa Rosa Memories a hunga u n wega amistoso kontra ekipo Legends di Hulanda djasabra último na Tio Daou Ballpark. Nos no a risibí e resultado, pero nos a haña vários pòtrèt. Djasabra awor pa 10.30 am Legends lo hunga kontra Jandoret Raiders. Mesun Jandoret lo hunga play-off kontra di Yesterday pa 2’or pm. Ta trata aki di play-off di entre number 5 i 6 di Beisbòl Veterano. Algun hungadó 50+ i èks hungadónan di Jandoret Raiders lo hunga kontra di The Legends ku no a bini pa hunga e Torneo di Reino e biaha aki. Tabatin Torneo di Reino 2017, 2018, 2019 i 2021. Ekiponan ku a gana e Torneo di Reino ta Santa Maria 2017, Jandoret Raiders 2018, ekipo di Aruba Spuiters na 2019 i Santa Rosa Indians na 2021. Ekipo Quality Stars tabata na Aruba den wikènt, pero nos no a risibí masha detaye.
* * * * *
Skema ofishal di e weganan di play-off (wild card) di Beisbòl Veterano a sali ofishalmente. Jandoret Raiders (5) lo topa ku Yesterday (6) djasabra 2’or. Ganadó di e wega aki lo topa ku Santa Maria Pirates ku a sali number 4 djadumingu 1’or. Nos no a risibí skema di wega di Liga 50. Play-off ta start kayente i ta spera bon públiko pa mira weganan 5 vs 6 i despues kontra number 4 e wikènt aki. Fin di siman 18 i 19 di novèmber lo tin e play-off semi-final entre Santa Rosa Memories (2) i ekipo Isla Crackers (3). Quality Stars lo hunga kontra ganadó di Santa Maria/Jandoret/Yesterday.
• * * * * *
Myson Cathalina ta picher di Royal Scorpions tambe i Cicoza. Nos ta kòrda ku e tabatin un tremendo aktuashon den final di Beisbòl Dòbel A kontra e ekipo Santa Rosa Indians den wega number 3 di play-off final i tumando solamente 2 kareda (tur dos tabata shushi) den 4 inning i 1 tersio. Myson Cathalina mes ta umpire tambe i ta tira Slowpitch tambe manera nos por mira ei. Ke mèn pichernan stail di djariba djabou. Pichernan ku ta tira Beisbòl, Slowpitch i Fastpitch tambe ta Naai Hooi komo e number 1 di tur tempu. Fisel Pereira tambe ta picha den Slowpitch i Beisbòl tambe. Orsendo Clemencia picher di Beisbòl ta picha Slowpitch tambe. Paiza Rosario tambe ta picher den Sòftbòl i Beisbòl.
* * * * *
By the way, ekipo Otrabanda tambe ta den eksterior. Otrabanda Veterano a sali pa República Dominicana ku un delegashon di 33 persona. Ta trata aki di hungadó, coach i fanátikonan. Nan ta na Boca Chica i na Santo Domingo (kapital) tambe. E ekipo ku tur aña ta biaha pa eksterior lo hunga dos partido manera ya a bira un tradishon. Ban bèk pa Slowpitch. Moveshon pisá a kuminsá den Liga 50 di Sòftbòl pa loke ta trata kampionato 2024. Ekipo Baranka lo bini duru bèk ,miéntras e ‘Heavy Weightnan’ di Ban Serio lo keda pa sigur un aña mas, miéntras ku Jerry Booi tei. Nos ta keda te aki pa awe i te mayan ku Poder di Dios.
