Jandoret Raiders ta gana Quality Stars 9 pa 5 i klasifiká pa play-off Beisbòl Veterano
WILLEMSTAD- Jandoret Raiders ku picheo kombiná di Raylan ‘Tutu’ Capella i Earl Virginia ta gana ekipo Quality ku skor di 9 pa 5. Bon públiko pa mira e último weganan di kampionato regular na Vi Jansen Ballpark. Ku e viktoria aki, ekipo Jandoret Raiders a klasifiká komo number 4 di e buelta regular. Play-off Wild Card ta start djasabra awor na Vi Jansen Ballpark. Pa 2’or djasabra ekipo The Brothers ku a klasifiká komo number 5, lo topa ku Vosama ku a terminá number 6. Ganadó di e wega aki lo topa ku Jandoret Raiders djadumingu 2’or. Ekiponan Santa Maria (number 1), Quality Stars (number 2) i Isla Crackers (number 3) ta pendiente pa start play-off wikènt 29 i 30 di òktober.
RESULTADONAN
Djasabra 15 di òktober
The Brothers 10, Veteranos Otrabanda 5
The Brothers a dal 8 hit i kometé 1 eror. Aishel Hooi a gana. Kevin Winklaar, Rignaldo Giterson i Ramses Elisabeth, tur a bai di 2-1. Hubert van het Kruys a bai di 3-3. Kevin Winklaar a konektá 1 homerun. Veteranos Otrobanda tabatin 6 hit ku 4 eror. Gilbert Bernadina a pèrdè. Danchelo Moesker ku Juan Miguel Trinidad, ámbos a bai di 2-1. Kenneth Desbarida ku Geovanni Maduro, ámbos di 3-2. Kenneth Desbarida a konektá 1 homerun.
Jandoret Raiders 9, Quality Stars 5
Jandoret tabatin 8 hit sin eror. Earl Virginia tabata picher ganadó. Norwin Moesquit I Carlton Daal a bai di 1-1, ámbos. Erling Gosepa ku Robertico Castillo di 2-1 i Earl Virginia a bai di 3-2. Pa Quality 6 hit ku 4 eror. Raymond Leonora a resultá pèrdèdó. Raydel Isabella ku Emile Haswell Jr, ámbos a bai di 1-1 . Rodney Michel, Merieldo Trinidat, Vernon Isabella ku Senny Petronella, tur di 2-1.
Vosama 5, Marchena Stars 3
Vosama a bati 5 hit i kometé 2 eror. Xaviero Avastia a gana. Cedrix Valies ku Jesus Gonzalez, ámbos di 1-1. Rochardo Davelaar, Jason Benito ku Ryan Emperator, tur a bai di 2-1. Marchena Stars tabatin 4 hit ku 1 eror. Percey Schoop a pèrdè. Giovertino Isebia a bai di 1-1. Wildrin Velasquez Molina, Miro Daal i Francisco Alcantara, tur a bai di 2-1.
Djadumingu 16 di òktober
Isla Crackers 8, Azucar 0
Isla tabatin 7 hit sin eror. Rainir Martes tabata ganadó. Luigi Yanez a bai di 1-1, Dave Janga di 2-2 i Roderick Eustatius di 3-2. Azucar a dal 1 hit i nan a hasi 2 eror. Dennis Testing a pèrdè. Jeniver Monk a bai di 1-1.
Marlins 17, Yesterday 5
Marlins a dal 11 hit i hunga sin eror. Shanon Kleinmoedig a gana. Humphrey Antonia ku Ramon Cabrera Rodriguez, ámbos di 1-1. Juan Carlos Quevedo Valera a bai di 2-1. Miguel Velazquez Agramonte ku Cedric Gill, ámbos di 3-2. Yesterday tabatin 9 hit ku 5 eror. Omar Valies a pèrdè. Alexander Martina ku Leslie van Kimmenaede a bai di 2-1, ámbos. Charles van Thijs di 2-2. Erwin Benito ku Omar Valies, tur 2 a bai di 3-2.
Liga 50
Sigui Hunga 5, Jandoret 4
Sigui Hunga a dal 5 hit i nan a kometé 1 eror. Raynold Anderson a gana. Cidric Koffy a bai di 1-1 i Victor Caldera di 2-1. Jandoret tabatin 5 hit ku 4 eror. Clifton Ijziek a pèrdè. Edmar Cornelia, Raimy Pastor i Clifton Ijziek, tur a bai di 1-1.
INFORMASHON DI BEISBÒL I SÒFTBÒL
Fanátikonan di Deporte Korsou bonnochi. Wild Cats i Santa Maria a sali riba bon pia pa loke ta trata play-off di Beisbòl Dòbel A. Picheo a dominá den e promé dos weganan di e play-off semi-final. Wild Cats ku wega kompletu di Shai Martis a dominá Santa Rosa 3-1. E otro wega a terminá ku skor di 4-0 pa Santa Maria kontra di Royal Scorpions. Aki e Rubiano Johnaikel Acosta a tira 8 inning i tuma solamente un hit pa Santa Maria gana Royal Scorpions 4-0. Dos wega di puru picheo ku a dominá e ofensiva i por bisa práktikamente tur dos banda. Santa Maria si a dal 9 hit i Royal Scorpions 1 hit ku tur e ofensiva ei.
* * * * *
Den Santa Maria tin sigur dos klave di Royal Scorpions di aña pasá, Curtney Doran i Kevin Moesquit ku ta dos bon yave di Jonathan Schoop, un dje motornan tras di kortina di Santa Maria. Ta dos hungadó ku tabata regular den Royal Scorpions di 2021. Curtney Doran a bati .366 e aña aki. Kevin Moesquit a terminá ku un averahe di .360 i un kantidat respetá di 32 kareda empuhá . Dia 26 di sèptèmber ku tabata riba un djaluna Kevin Moesquit a empatá un rekòrt di Beisbòl Dòbel A ku 9 kareda empuhá. Den e wega ei ela konektá 2 homerun.
* * * * *
2019, 2020, 2021 ta mesun ekiponan aki a klasifiká pa final. Na 2018 ta e ekipo Marchena Braves ku a bai play-off huntu ku Santa Maria, Wild Cats i Santa Rosa. Santa Maria a bira kampion na 2018. 2019 tabata ekipo Wild Cats, na 2020 Santa Rosa indians i na 2021 tabata Wild Cats atrobe. Royal Scorpions ta entre grandinan ku tin hopi tempu sin bira kampion. Royal Scorpiona bira kampion pa último biaha na 2012. Laga nos repasá e kampionnan di for di 2011. Royal Scorpions 2011, 2012. Santa Maria 2013, 2014, 2015. Wild Cats 2016, 2017. Santa Maria 2018, Wild Cats 2019. 2020 Santa Rosa i Wild Cats 2021. E último 11 kampionatonan Wild Cats 4, Santa Maria 4, Royal Scorpions 2 i Santa Rosa 1.
* * * * *
Mester bai bèk den tempu ratu ratu, pa tur sigidó di Beisbòl sa ken ta ken e último añanan. Royal Scorpions tin 18 título i Wild Cats ta pegá ku 17, sigí pa Santa Maria ku tin 11 i Santa Rosa ku 7. Deskanso na famia i amigunan di Raffy Jozefa. Bon asistensia na entiero djadumingu 16 di òktober. Hopi rekòrt mas nos a tende durante speech di Gino Valeriaan i Orlando Cuales durante entiero. Raffy Jozefa sin duda un gran kabayero tantu padén komo pafó di tereno.
* * * * *
Ban pa Slowpitch. Liga 50 Sòftbòl lo ta kayente djasabra awor na van Engelen Ballpark. Nos a risibí skèdjel di e play-off serka Donald ‘Beer’ Adelina ku ta direktor di kampionato. Djasabra awor 11’or ta Ban Serio kontra Baranka. Kandela mes mes ruman. Despues 1’or ta Jaws kontra Flamboyan Tigers. Na 2021 tabata e dos grandinan, esta Baranka i Ban Serio ku a topa otro den e semi-final i einan tabata Baranka ku a gana e seri 2-1. Despues Baranka a gana Pitufos 2-1 den e seri final tambe. E aña aki ekiponan Pitufos i Lions a keda for di klasifikashon i ekiponan Flamboyan Tigers i Jaws a drenta. Un di e dos último aki lo pasa pa final sigur.
* * * * *
Wild Card di Beisbòl Veterano ta start djasabra 2’or ku wega entre The Brothers i Vosama. E dos ekiponan aki a terminá ku rekòrt di 12-9. Durante e temporada regular The Brothers a gana Vosama na dos okashon. Den e promé buelta dia 2 di yüni Vosama a gana The Brothers ku skor di 7 pa 4. Den e di dos buelta dia 2 di òktober, The Brothers a gana Vosama 9-2. Mester bisa si ku e wega tabata pèrtá te den parti final di e wega. Ganadó di e wega aki lo topa ku Jandoret ku a terminá ku rekòrt di 13-9, pero ku mihó averahe di kareda. E wega di Jandoret vs Vosama/The Brothers lo tuma lugá djadumingu 1’or. Play-off semi-final lo start wikènt 29/30 di òktober. Nos ta keda te aki pa awe.
