Jandoret Raiders ta swip Marlins i klasifiká pa final di Liga 50
WILLEMSTAD – Jandoret Raiders, ku bateo feros di Myron Wijman i tremendo picheo di Gregory Martijn, a pasa pa final di Liga 50 ganando di Marlins ku skor di 11-0 djasabra 3 di òktòber den Van Engelen Ballpark. Myron Wijman a bati di 2-2 ku 2 homerun i 6RBI, Gregory Martijn a picha wega kompletu i a tuma solamente 3 hit pa e blankeo. Den e otro wega di semifinal, e partido entre Baranka i Ban Serio a keda di forfeit na fabor di Baranka den di 5 inning.
A surgi un situashon kaminda un umpire ku no tabata programá pa e wega mester a bai kumpli ku un otro kompromiso. Esaki a resulta ku ta un umpire a keda pa dirigí e wega. Ekipo Ban Serio a para riba ku mester tin 3 umpire pa e wega por sigui, segun akuerdo den reunion di Liga 50. Despues di a warda un ratu i ku desishon bai i desishon bini, ekipo Ban Serio a baha for di tereno i e umpire den presensia di direktiva a 'forfeit' e wega na fabor di Baranka. Ekipo Ban Serio a keda di manda nan protesta aden pa asina e wega por sigi den di 5 inning. Na e momento ei Baranka tabata gana ku skor di 3-0 tras di tremendo picheodi Kenny Hellement.
Lions kampion Dutch Caribbean 60+ di 2026
WILLEMSTAD – Djadumingu 4 di òktòber ekipo Lions a gana di Nos Tambe Por ku skor di 7-3 i bira kampion di e Torneo Dutch Caribbean Masters 60+. Un públiko grandísimo tabata presente pa mira e weganan di semifinal i e gran final djadumingu. E torneo a start for di djaweps ku 8 ekipo repartí den dos pul.
Despues a sigui e semifinalnan entre e promé dos ekiponan di tur dos pul. Ekiponan Lions i Nos Tambe Por a gana den semifinal pa topa otro den final. Den e wega desisivo, Lions a gana Nos Tambe Por biniendo di atras. Despues di e partido tabatin e entrega di premio kordiná pa e organisadónan, Koala Bears di Hulanda. Otro aña e torneo lo tuma lugá na Sint Maarten den luna di novèmber.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikent. Hopi aktividat di Slowpitch i Beisbòl Veterano den fin di siman. Den Sòftbòl Liga 50, ekipo Jandoret Raiders a logra klasifiká pa final den nan di dos aña den e liga aki. Jandoret Raiders a gana di Marlins ku skor di 11-0 pa asina pasa pa final. Jandoret Raiders a sweep e seri, despues ku djasabra dos siman pasá nan a gana di Marlins ku skor di 7-2. Den e otro seri semifinal ku ta entre Ban Serio i Baranka, a surgi un ‘scaramouche’ den di 5 inning na momento ku no tabatin sufisiente umpire pa sigui e wega. Baranka tabata gana ku skor di 3-0 den di 5 inning i tabatin 2 umpire disponibel.
• * * * * *
Ban Serio a para riba ku mester tin 3 umpire segun akuerdo durante reunion. Ekipo Ban Serio a baha for di tereno i dugout, i parse ku e umpirenan a 'forfeit' e wega den presensia di direktiva di Liga 50. Parse ku Ban Serio a fail un protesta i ta pendiente pa wak kiko ta bai pasa. Regla general ta bisa ku mester tin dos umpire pa wega, pero e ekiponan a yega na un akuerdo ku den playoff lo usa 3 umpire. En todo kaso, nos ta pendiente di kiko ta bai pasa den e dianan benidero. Djasabra awor, dia 10 di òktòber 2026, no tin wega debí ku ta dia di fiesta, Dia di Pais Kòrsou. Dia 17 di òktòber tabata reservá pa si un di e serinan empatá òf pa sigui e wega entre Ban Serio i Baranka.
• * * * * *
Nos a traha e kolumna aki promé ku e weganan di semifinal i final di Dutch Caribbean ku a tuma lugá na Frank Curiel Ballpark, i promé ku e promé wega final di Beisbòl Veterano na Vi Jansen Ballpark. Tabatin wega di fútbòl tambe na Trinidad & Tobago kaminda nos selekshon a sera e promé buelta di Concacaf Nations League aya na Port of Spain. Ekiponan ku a bai semifinal di e torneo 60+ ta Nos Tambe Por ku a terminá na promé lugá den Pul A, i ekipo Los Amigos ku a klasifiká komo number 2 den Pul A. Den Pul B, ekipo Lions a klasifiká na promé lugá, i ekipo Koala Bears di Hulanda, organisadó di e torneo, a klasifiká komo number 2. Weganan di djadumingu mainta tabata Nos Tambe Por kontra di Koala Bears pa 11’or di mainta, i despues pa 1’or tabatin e wega entre Lions kontra di Los Amigos.
• * * * * * *
Round Robin di Beisbol Veterano 40+ a sigui djasabra ku tres wega na Vi Jansen Ballpark. Den e promé partido, ekipo Quality Stars a dal Broncos durísimo ku skor di 14-2. Santa Rosa a gana Volcano ku skor grandísimo di 11-1. Finalmente, Santa Maria Pirates a dal Otrobanda 11-1. Djasabra 10 di òktòber, ku ta Dia di Pais Kòrsou, tin 3 wega programá. Ta bon pa e ekiponan tuma desishon for di trempan si ta sigui ku e weganan riba e dia ei, pa no bin pidi liber na e último momento pa motibu ku ta Dia di Pais Kòrsou i ku tin hopi aktividat rònt Kòrsou.
• * * * * *
Playoff di divishon di MLB a start djasabra siman pasá. Ekiponan Tampa Bay, Los Angeles Dodgers i Milwaukee a gana e seri. Chicago lo topa ku Clevalnd djasabra den wega number 5. Nos tabatin Ozzie Albies di Atlanta i Xander Bogaerts di San Diego den playoff. Tambe Richie Palacios di Tampa Bay, ku ta famia di Empi Donker aki na Kòrsou. Ekipo Lions a bira kampion di Dutch Caribbean 60+, ekipo Wak e Kos a pika dilanti den playoff final 60+. Tur Goso a gana e promé wega di final di liga Streanan di Ayera den tie break di ekipo Jaguar Queens. Nos ta keda te aki pa awe, te mayan ku podér di Dios.
