Jaws ta derotá Nos Power i Pitufos ta gana Nos Tambe Por playoff final Beisbol Veterano entre Santa Rosa i Quality Stars

Den play-off semifinal Liga 60

Jaws ta derotá Nos Power i Pitufos ta gana Nos Tambe Por playoff final Beisbol Veterano entre Santa Rosa i Quality Stars

WILLEMSTAD- Djadumingu a start ku play-off Liga 60 na Frank Curiel Ballpark. Ekiponan Jaws i Pitufos a gana den e promé fecha di playoff. Pitufos a klasifiká pa final i ekipo  Jaws a dal Nos Power I pasa pa e sigiente buelta. Nos Power a keda eliminá i Jaws lo topa ku Nos Tambe Por djadumingu awor pa 12’or den semifinal.

Djadumingu 26 di novèmber

Jaws 12, Nos Power 1

Jaws tabatin 13 hit ku 1 eror. Riley Toppenberg tabata ganadó. Rudsel Poulina ku Rudsel Esclodina, ámbos di 1-1. Elvin Regina, Rudsel Schmidt ku Braamford Hasham, tur a bai di 2-1. Tyron de Palm a bai di 2-2. Ruben Snoyl ku Fransje Lambertina a bai di 3-3.  Nos Power a dal 4 hit I hasi 2 eror. Isaac Francees a resultá pèrdèdó. Earl Virginia ku Sherwin Martinus a bai di 1-1 i Richel Baromeo a bai di 2-2.

Pitufos 4, Nos Tambe Por 1

Pitufos a dal 11 hit i kometé 2 eror.  Juan Cicilia a gana i e mes a bai di 2-1. Cedric Curiel ku Frances Petronielia a bai di 4-2. Gwendel Sint Jago a bai di 3-3. Nos Tambe Por tabatin 6 hit ku 2 eror. Richenel Rafaela a pèrdè. Nelson Jacoba, Rudsel Baromeo, Emile Haswell ku Jeromin William, tur a bai di 2-1.  

‍

Santa Rosa Memories ta dal Isla Crackers 12 pa 5 i klasifiká pa final

WILLEMSTAD – Santa Rosa Memories a gana Isla Crackers 12 pa 5 i klasifiká pa final di Beisbòl Veterano 2023. E gran final lo start pa djasabra awor pa 1.30 pm na Vi Jansen Ballpark entre Santa Rosa Memories i Quality Stars. Den Liga 50 ekiponan Sigi Hunga i Jandoret Raiders a gana den semifinal i lo sigi pa final djadumingu awor pa 10.30 am.

Djasabra 25 di novèmber

Sta Rosa Memories 12, Isla Crackers 5

Sta Rosa tabatin 13 hit ku 1 eror. Ramses Jamanika a gana. Randy Lo-A-Tjong ku Michelangelo Cijntje, ámbos a bai di 3-2. Reginald Pietersz a bai di 4-2 i Raymy Cicilia a bai di 3-3. Pa Isla 9 hit ku 2 eror. Rainier Martis a pèrdè. Charlton Merite, Jair Josepha, Roderick Zimmerman ku Stanford Landburg, tur a bai di 3-2.

MAS INFORMASHON DI SÒFTBÒL I BEISBÒL

Fanátikonan di Deporte Kòrsou bon dia i bon siman. Ekipo Santa Rosa Memories a pasa pa final ganando di Isla ku skor di 12 pa 5 djasabra último. Santa Rosa Memories a habri ku nan estelarísimo picher, Ramses Jamanika, ku a tira 7 inning kompletu, tuma 9 hit i 5 kareda limpi pa bai ku e viktoria. Di otro banda Isla Crackers a trata na sorprendé i a habri ku Rainier Martis ku a tira solamente dos tersio di inning  tuma 5 hit i 6 kareda limpi. Isla Crackers a usa relevistanan manera Michelangelo Celestina ku a tira 2 inning i Orsendo Clemencia ku a tira 3.1 inning. Orsendo Clemencia a dominá Santa Rosa un tiki tumando solamente un kareda sushi, pero ya e daño tabata hasi.

‍

* * * * *

Michelangelo Celestina a tuma 5 kareda di kual solamente unu tabata limpi. Bon públiko pa mira e wega desisivo ei djasabra último na Vi Jansen Ballpark. E gran final lo start djasabra awor pa 1.30 pm na Vi Jansen Ballpark, kaminda Santa Rosa Memories lo bai topa Quality Stars ku tin 24 wega ganá stret e temporada aki. Quality Stars kampion di temporada 2022 a gana 22 wega durante kampionato regular i 2 wega den play-off.  Na algun okashon Quality Stars a hera di pèrdè nan invikto entre otro kontra Isla Cracker den di dos buelta, nan a gana 4-3, Santa Maria Pirates 7-5, kontra Isla Crackers, Azucar i Santa Rosa den prome buelta ets. Nos no ta kòrda un ekipo ku a terminá kampionato regular di Beisbòl Veterano i play-off invikto. Jandoret Raiders a terminá 26-2 overall na 2014 i titulá kampion pa promé bes den nan historia di Beisbòl Veterano.

* * * * *

Beisbòl Veterano 50+ mester a sigi djadumingu ku play-off na Vi Jansen Ballpark. Ekiponan Jandoret, Sigi Hunga, Yesterday i Otrabanda. Nos a traha e kolumna promé ku e weganan aki kuminsá i terminá. Final lo tuma lugá djadumingu 3 di desèmber, promé ku wega number 2 di e gran final di Liga 40 ku ta entre Quality Stars i Santa Rosa Memories. Beisbòl Veterano lo terminá den desèmber atrobe, despues ku na 2021 i 2022 kampionato a terminaá den òktober i novèmber.  Djadumingu tabatin play-off di Liga 60 tambe na Frank Curiel Ballpark. Ekiponan Nos Tambe Por, Pitufos, Jaws i Nos Power a kompetí den play-off page system. Pitufos i Jaws a gana, Nos Tambe Por lo topa Jaws i Nos Power a kai afó.

* * * * *

Selekshon di Beisbòl U-23 di Kòrsou a pèrdè ku skor di 7-0 kontra Venezuela djasabra.  Djadumingu Kòrsou mester a hunga kontra di Cuba. Kòrsou a dal solamente 2 hit den e promé wega ku tabata hitnan di Tahir Meulens i Denzel Gregg.  Pichernan di Kòrsou ku a tira ayera tabata Arlison Rodriguez, Denverick Martinus, Elchero Francisca i Lousandry Henriette. Un kompetensia bastante fuerte ku paisnan konosí pa bon Beisbòl, manera entre otro Meksiko, Puerto Rico, Colombia, Cuba ets. Kòrsou ta nr 28 riba ranking i ta solamente Argentina (30) i Costa Rica (59) ta mas abou ku nos den ranking pa loke ta trata ekiponan ku ta partisipá na e kompetenisia.  Kòrsou ta den grupo B ku ekiponnan manera Colombia, Costa Rica, Cuba, Panama i Venezuela. Den e otro grupo, grupo A tin Argentina, República Dominicana, Meksiko, Nicaragua i Puerto Rico.  Kòrsou a pèrdè despues kontra Cuba, kontra Venezuela, i pèrdè dos wega mas sigi pa despues gana Costa Rica 3-1.

* * * * *

Mientras tantu kampionatonan di Beisbòl Little League ta den full swing ku weganan di Liga Pariba, Liga Pabou i Liga Willemstad.  Djabièrnè dia 17 di novèmber tabatin apertura kaminda tur liga tabata presente na Frank Curiel Ballpark. Pa otro aña e kampionato ta bai sinta pendiente pa play-off i kampionatonan regional. Na Kòrsou lo tin sigur dos kampionato riba nivel di Karibe/Latino America atrobe.

* * * * *

Hopi moveshon di nos peloteronan pa loke ta trata Beisbòl Internashonal. Andrelton Simmons, Jair Jurrjens, Didi Gregorius a move djabièrnè i djasabra den e All Stars Showcase Games aya na Dubai. E tim di Simmons United East  a gana 3-2 djabièrnè. Jair Jurrjens i Didi Gregorius tambe a move bon pa West All Stars.  East a gana 3-2 djabièrnè i 9 pa 5 djasabra. Pendiente di resultadonan di play-off di Liga 50+ Beisbòl i Liga 60+ Sòftbòl nos ta keda aki pa awe, te mayan ku Poder di Dios.

‍