Resumen Slowpitch
Jandoret Raiders i Lions kampion Torneo Boy Constancia
WILLEMSTAD – Awe nos ta sigi ku e resuman di Slowpitch di aña 2025. Torneo Boy Constancia a yega na su final djadumingu 30 di mart den Stadion Post 6. Despues ku ekiponan a klasifiká den e 4 kategorianan, 60+, Soshal 40+, 50+, . Den kategoria 60+, ekipo Lions a gana di Los Amigos den Tie Break ku skor di 4 pa 2, den e sigiente wega SDKK/Damen/GGZ a dal CRU i Jandoret Raiders a derotá Pitufos 14 pa 8. Finalmente Treasure a dal Golden Girls 11 pa 4. Despues di wega presidente i fundadó di Pitufos, Edgar ‘ Gachi’ Zimmerman a dirigí palabra e rekordá Raymond ‘Boy’ Constancia na ken e torneo ta dediká.
Mas resumen Slowpitch
Jaws kampion Torneo Kid Boca Chica 2025
WILLEMSTAD- Liga 60 tabatin dos torneo promé ku e kampionato regular, Torneo Jaws (Torneo Kid Boca Chica) i Torneo Lions. Den e promé torneo Jaws ku viktoria di 5 pa 4 riba Lions den final a bira kampion di Torneo Kid Boca Chica 60+. E wega final a tuma lugá djadumingu 13 di aprel den Frank Curiel Ballpark dilanti un bon públiko. Tantu Jaws komo Lions a sali na promé lugá den nan pul. Tur dos ekipo a klasifiká invikto den e torneo menshoná ku a start dia 5 di aprel i dura dos wikènt. Riley Toppenberg a habri pa Jaws i ela risibí relevo di Juny Pieter. Gregory Martijn a picha kompletu pa Lions. Despues di e wega final Ivan Schoobaar alias Kid Boca Chica na ken a torneo ta dediká tabata presente pa entregá kopa na ekipo Jaws ku a titulá kampion.
RESULTADONAN
Nos Power 5, Sluggers 3.
Los Amigos 5, Curacao Super Stars 3.
Jaws 5, Lions 4.
MAS INFORMASHON DI SÒFTBÒL I BEISBÒL
Fanátikonan di Extra Inning, bon dia. Awe nos ta sigi ku resumen di temporada 2025 pa loke sòftbòl i beisbòl. Awe nos tin detayenan di Torneo Boy Constancia ku a yega su final fin di mart den Stadion Post 6. Pa promé biaha ekipo Pitufos a organisá e torneo aki ku ta na memoria di un dje grandinan di Sòftbòl Slowpitch ku ta Boy Constancia. Boy Constancia a fayesé den luna di novèmber 2024 i na 2025 Pitufos a organisá e promé Torneo Boy Constancia den luna di mart ku partisipashon di ekiponan di 60+, 50+ i komersial 40+ i femenino. Intenshon ta pa sigi ku e torneo aki den 2026 i añanan ku ta sigi. Awe nos tin e resumen di Torneo Boy Constancia i djabièrnè nos lo tin resumen di Torneo Hope.
* * * * *
E aña aki pa di dos biaha den historia kampionato di Beisbòl Veterano a terminá den e sigiente aña. Kampionato 2024 a terminá den 2025 despues di un impase ku a surgi entre direktiva di BEVEKO i Santa Rosa Memories. Yesterday a protestá riba un kambio ku no a keda hasí ofishalmente, pérdé e protesta i despues gana den apelashon. E kampionato a keda wantá for di novèmber 2024 i a terminá den luna di mei, pa algun siman despues start ku kampionato di 2025. Ekipo Quality a gana e kampionato di 2024 i despues den òktober 2025 sali kampion di e kampionato di 2025 tambe. Torneo Hope tabata un éksito rotundo atrobe i pa promé biaha FDDK a organisá e prestigioso torneo aki despues ku e tabata algun aña den man di Fundashon van Engelen Ballpark.
* * * * *
Dos siman pasá nos a skibi ku Suffisant Eagles a selebrá 25 aña di eksistensia. Un ekipo ku a lanta i hasi nan esfueros pa tene Sòftbòl Maskulino Fastptich bibu, pero enbano. Na 2009 Suffisant Eagles a blackout Harlem Power den final i bira kampion di Sòftbòl Maskulino Dòbel A. Norman ‘Bosh’ Lucasius a bai henter e ruta pa bira picher ganadó i MVP di e seri final. Kampion bate tabata Gedion Sambo i lider di homerun Jair Josepha, tur dos di Suffisant Eagles. Edison Sambo di Harlem Power tabata kampion picher. Suffisant Eagles tabatin hungadónan manera Sevard ‘Chollie’ Seferina, Dave Kirindongo i Jair Josepha. Dave i Jair nos ta mira ainda na weganan di Sòftbòl. Chollie Seferina tabata na Kòrsou den luna di òktober i Bosh Lucasius si nos no a mira masha ten. Sòftbòl Maskulino Fastpitch hopi historia ku dos kampionato regional ganá na 1978 i 1985, tur dos biaha na Colombia, segun nos Medellin i Cartagena. Nos tabata konta entre e mihónan di region den Femenino Fastpitch tambe i nos a logra bira kampion na Meksiko na 1976.
* * * * *
Selekshon di Kòrsou a hunga final kontra di Bahamas djaluna i bira kampion ganando 5-1. Kòrsou a bai ku un bon selekshon i lástima ku nos no por a mira e weganan manera tabata e kaso di e Juegos Bolivarianos, pero e wega final si nos a risibí e señalnan den pitu djaluna anochi. World Baseball Classic lo bira kandela. Den e kaso aki Hulanda tin un tremendo tim, naturalmente tin kontrinkantenan fuerte manera USA, Hapon, Venezuela, República Dominicana, Puerto Rico, Meksiko ets. Hapon ta mustra fuertísimo atrobe i den 5 WBC nan tin 3 título, 2006, 2009 i 2023. República Dominicana a gana na 2013 i USA na 2017. Boso ta kòrda e último out di 2023 kaminda Ohtani a topa ku Mike Trout i tira algun rekta di 100 mia sin kalentá manera mester ta i mester a warda dos aña pasá pa picha atrobe. E WBC aki lo hala hopi atenshon atrobe. Andruw Jones ta manager di e selekshon di Hulanda ku tin Big Leaguer na kasi tur posishon.
* * * * *
Bèk pa Slowpitch. Nos a dal den un artikulo ku Liga Amstel ku 9 tim na 2008. Ekiponan manera Bombers, Skarlo, Padres, Chincho Sharks, Omel, Los Unidos, Bad Boys i Latino Caribe. E manera ku e Slowpitch Komersial a desaroyá ta bira difísil pa Modified Slowpitch di Liganan lanta kabes atrobe. E picheo habri a kaba di mata e kos. Den e torneonan Latino e pichernan ku ta tira picheo liber no mag picha i e tornenan aki ta drei ku chèns chikí di bira Liga. Nos ta keda te aki pa awe i te mayan ku Poder di Dios.
