Junny Obispo manager di Isla Crackers den Beisbòl Veterano i mas informashon di Beisbòl i Sòftbòl
WILLEMSTAD- Jersley ‘Junny’ Obispo lo manehá ekipo Isla Crackers den Beisbòl Veterano temporada 2022. Fuentenan ligá ku ekipo Isla Crackers a konfirmá e notisia pa Deporte Korsou. Junny Obispo tabata manager di ekipo Quality Stars durante kampionatonan 2019 i 2020. E tabata e manager ku a bira kampion ku ekipo Quality Stars na 2020. Junny Obispo ta èks gran hungadó di Beisbòl Dòbel A ku a militá hopi aña den Blue Hawks den añanan 80 den Sentro Deportivo Kòrsou.
Un tremendo manager i entrenadó. Ekipo Isla Crackers a bai final na 4 okashon den Beisbòl Veterano i no a logra bira kampion. Segun fuentenan e maneho i e motivashon di e hungadónan den final ta bira otro kompará ku durante kampionato regular.
INFORMASHON DI BEISBÒL I SÒFTBÒL
Fanátikonan di Deporte Kòrsou, bondia. Nos tei atrobe karga ku informashon, kaminda awor si varios ekipo a kuminsá move pendiente pa torneonan Warm-up kuminsá. Kambionan ta drenta unu tras di otro tantu riba nviel di Sòftbòl Liga 50 komo Beisbòl Veterano. Den pitu nos a risibí un tep, ku Isla Crackers a gara un gran manager pa 2022. Isla Cackers tin Junny Obispo pa manager den 2022. Junny Obispo a traha su nòmber kaba den Beisbòl Veterano, momentu ku ela bira kampion ku ekipo Quality Stars na 2020. Junny a yega Quality, klasifiká e ekipo den e promé 4-nan na 2019, pa despues bira kampion ku e ekipo menshoná na 2020.
* * * * *
Ekipo Marlins ta a la karga. Djaweps 10 di febrüari e ekipo a firma Michelangelo ‘Galbao’ Boekhoudt i otro gran picher ku ta Marlon Noor tambe ta na kaminda. Galbao a hunga ku ekipo Ban Serio den 2021. Marlon Noor no tabata aktivo den 2021, miéntras ku 2020 Marlon tabata ku ekipo Pitufos. Marlon Noor ta bèk den gran forma i den su ekipo di ántes esta Marlins. Galbao tambe tabata ku Marlins te ku aña 2019. Gilbert Henrietta ta bai keda, ké mèn Marlins tin un staf di picheo hopi serio ku pichernan manera Galbao Boehoudt, Marlon Noor, Gibi Henrietta, Lionel Li, Dudley Penso ets. For di 2021 Marlins a reforsá ku hungadónan manera Vriendjes Cicilia, Skippy Sambo i Eugene Antonia. Keda pendiente pa mas informashon di Marlins i di Liga 50. Te ainda ‘mute’ pa loke ta trata e partisipashon di Jerry Booi ku e ta wanta un ratu ku Liga 50 i ekipo Ban Serio.
* * * * *
Kondolensia na Hensley Meulens ku fayesimentu di su bon amigu Gerald ‘Ice’ Williams. Gerald Williams a fayesé djamars 8 di febrüari na edat di 55 aña. Gerald tabata bon mes ku Derek Jeter i Hensley Meulens. Dia Hensley a kasa algún aña pasá Gerald Williams tabata presente. Djaluna 7 di febrüari último, Hensley Meulens tabata papia ku Jeffrey Martina, Robertico Castillo, Junny ‘Ko’ Orcadio na Bam Bam Tech na Sambil. Awèl, nèt un dia promé ku Gerald Williams a fayesé Hensley a papia entre 10 pa 15 minüt di Gerald Williams, sin pensa ku Gerald Williams lo a bai su manisé. Gerald Williams a bira kampion ku Yankees na 1996 kontra Braves i despues a hunga den Braves kontra Yankees na aña 1999. Forsa na Hensley Meulens i demas amigunan di Gerald Williams.
* * * * *
Ban pa Beisbòl Veterano. Hopi kambio den vários ekipo. Algún ekipo lo kambia di manager i tin rumor ku hóbennan bou di 40 aña lo no por manehá i coach mas den Beisbòl 40+. Quality Stars lo kambia di manager den 2022 i manera ariba menshoná Isla Crackers tin manager nobo, The Brothers ta sigi haña e mihó hungadónan den Beisbòl Veterano pa 2022. Moises Zimmerman, manager i doño di ekipo Sigi Hunga lo stòp ku e ekipo i lo pasa pa Jandoret Raiders tantu den Liga 40 komo 50. No ta konosí ku Julien Ignacio lo sigi ku e ekipo Sigi Hunga. Resientemente tabatin rumor ku Sherman ‘Cai Ben’ Leonora ta bèk den Beisbòl Veterano i lo ta manager di ekipo Sigi Hunga den 2022.
* * * * *
Siman pasá nos a risibí e notisia ku e Fabian Seraus, èks picher di ekipo Bou di Palu i Jandoret Raiders a bai sosegá. Seraus tabata un picher slengu basta inkomodo ku a picha hopi wega tempu di Liga Un i Tur ku Bou di Palu i Jandoret Raiders. E tabata biba na Jandoret tambe. Deskanso i forsa na famia i amigunan di Fabian Seraus. Kosnan ta ketu den Beisbòl Dòbel A e dianan aki. Dirigentenan di Wild Cats parse lo no bai saka e 3000 i e 6000 florin pa hungadónan ku ta bou di kontrakt ainda. Hopi interes di varios Cubano pa hunga na Kòrsou, pero e regla ku estranhero por hunga mester pasa promé.
* * * * *
E siman aki nos a skibi di Sòftbòl Little League. Tin un direktiva nobo ku a keda formá resientemente. E aña aki ta 20 aña di Sòftbòl Little League ku ta Liga Soraida Juliana. Tin un direktiva nobo enkabesá pa Shanita Manuela. Ayera den Extra a publiká e direktiva nobo ku tin Anthony Guillermo komo direktor di kampionato. Djasabra tabatin tin charla pa coachnan i entrega di material na VSBO Sint Jozef.
