Jurgen Locadia i Richairo Zivkovic dos grandi ku ta kla pa debutá ku selekshon di Futbòl di Kòrsou
WILLEMSTAD- Resientemente dos gran hungadó di famia yu di Kòrsou a duna OK na direktor tékniko Remko Bicentini pa hunga pa selekshon di Futbòl di Kòrsou. Pepi Sulvaran analista di futbòl ku ta sigi e selekshon djaserka ta komentá e atkisishon di e ‘Big Fishnan’ aki i algu di nan historia den Futbòl.
KONOSE BO SELEKSHON: JÜRGEN LOCADIA MESTER BIRA E LIDER DEN ATAKE DI ‘PANTERA NEGRA’.
Jürgen Leonardo Locadia (29) ku a mira su yamada pa selekshon Hulandes kai na awa kuater be pa motibu di leshon i menasa terorista promé ku un wega di Hulanda kontra Alemania, porfin a skohe pa nos baranka. Jürgen ta bin di un famia Kurasoleño ‘pura sangre’. E delantero peligroso di 29 aña a wòrdu selekshoná pa e weganan di klasifikashon pa ‘Kopa di Oro’. E eks delantero di PSV aktualmente ta aktivo pa Guangzhou Mighty Lions den e divishon máksimo na China, kaminda e ta pasando den un bon momento.
E último añanan Locadia a kwe hopi eksperensia den eksterior, hungando den Liga Premier di Inglatera, Bundesliga Alemán, MLS na Merka i na Iran. Ku Jürgen nos tin un piska grandi den kanaster i ta un for di e lista di hungado tòp ku nos tin basta tempu ta mik riba dje, manera Riechedly Bazoer (AZ), Armando Obispo (PSV), Tommy St. Jago (FC Utrecht) i según mi awor mester agrega tambe Joshua Brenet (FC Twente), Sontje Hansen (NEC) i Quinten Timber (Feyenoord), si e lastu aki no logra yega ‘Oranje’.
Tambe ku mira riba pre-mundial, Jürgen ta un atkisishon balioso pa nos parti ofensivo. Locadia ku yüni awor ta bisti nos kamiseta pa promé bes, a hunga den tur selekshon hubenil Hulandes for di U-17 te ku Jong-Oranje. Jürgen a debuta den Eredivisie ku PSV 30 di september 2010. Ela drenta na di 68 minüt i mes ora a anota tres gol. Locadia su prome gol den Champions League pa PSV tabata 3 di novèmber 2015. E la sali dos be kampion di Ulanda ku PSV. Den PSV ela hunga tantu komo sentro delantero i komo delantero riba ala robes pa motibu di presensia di Luuk de Jong, pero di naturalesa e ta sentro delantero. Na yanüari 2018 e la firma ku e ekipo di Liga Premier Brighton & Hove Albion pa un suma rèkort e tempu ey pa e ekipo Ingles di 17 mion euro.
E ekipo Ingles después di tempu a fie na Hoffenheim den Bundesliga, kaminda otro di nos muchanan ku nos ta mik riba dje tambe tabata hunga, Joshua Brenet. Ela bai Merka tambe mitar aña den Cincinnati di MLS pa después regresa Bundesliga ku Bochum, kaminda e la bora tantu Bayern Munich komo Borussia Dortmund. Resientemente ela bandona Iran pa problema interno den e país i awor después ku diferente ekipo di Eredivisie tabata su tras, a será un kontrakt lukrativo na China. Den hubenil na 2009, Locadia a yuda Ulanda gana Koninkrijkspelen na Aruba ku U-16. Den tòp di su karera te ahinda, na 2018 e tabata bal no menos ku 15 mion euro. Den 176 wega ku PSV su promé ekipo den tur kompetensia, e tabata enbolbi den no menos ku 101 gol ku ta un sifra eksepshonal. E mes a anota 62 i a duna 39 pase desisivo pa gol.
Den China su Super League e ta bai bon atrobe. Den 8 wega e la anota 3 gol i a duna 2 pase desisivo di gol. Locadia no solamente ta anota, pero ta krea oportunidat pa otro golia tambe. Dor di su forsa físiko i su empuhe, e ta difísil pa dèk i ta eksigí hopi trabou i energía di e defensa kontrali. Locadia su forsa i Zivkovic su velosidat ta primintí di bira algu serio, esei ta si nan dos wòrdu alinea. Locadia ku a span ala rònt mundu, meskos ku Zivkovic ta trese eksperensia den selekshon. Locadia ta remata duru ku su pia drechi i semper ta lur riba un chèns oportuno. Su tiru ta devastador pa e velosidat di e bala. Apesar di su estatura i forsa en no ta anota hopi ku kabes, ku no ta su parti mas fuerte.
Tira riba gol ta su punto fuerte. Jürgen mester a traha duru pa yega kaminda e ta. Su mama mester a lanta e ku tres ruman muhe chikitu su so. Paso su mama no tabatin lisensia pa kore auto, Jürgen mester a biaha hopi ku trein na chiki temporada ku e tabata prospekto ku FC Emmen i Willem II. Kos tabata difisil i pèrta finansieramente na kas. Ela bisa hopi be ku hamas e por lubidá lokual su mama a hasi p’e i komo úniko hòmber na kas i komo e yu mayo, e la pone su dilanti ku e mester logra den futbòl. Jürgen gusta musika i a graba dos kantika di su mes kaba: “Take off” i “Epok”. Tur kos ta indika ku Locadia lo bira un “Pantera Negra’ hopi importante.
KONOSE BO SELEKSHON: RICHAIRO JULIANO ŽIVKOVIĆ
Richairo nase dia 05 di sèptèmber 1996, tabata eligibel pa hunga pa kuater país. Di parti di su mama, pa Serbia i Montenegro i di parti di su tata, pa Kòrsou i Hulanda. Pa Hulanda e la hunga den selekshon U-19, U-20 i U-21. E sentro delantero di 26 aña después di a hunga na diferente parti di mundu a regresa Hulanda kaminda awor e ta ‘spits’ di e ekipo di Eredivisie Ulandes FC Emmen.
Tur kaminda ku ela bai e ekspektativanan tabata haltu, pasobra na edat hoben e la wordu denominá komo un talento grandi. Esei tabata un peso grandi pe i na edat hoben e no tabata tur ora serio ku su deporte. Foi chiki ela impreshoná pa su agilidat i velosidat i ku 11 aña a keda inkorporá den e akademia hubenil di FC Groningen. Na 2012 ela firma su prome kontrakt profeshonal ku e ekipo Hulandes i mes ora a bira e debutante di mas hóben di tur tempu den e promé onsena.
Ela bira tambe e hungadó di mas hóben ku a yega di anotá pa Groningen, kitando e honor ey for di e eks strea grandi Ulandes Arjen Robben. Palabra di su talento a kore lihé i diferente ekipo grandi, entre otro Real Madrid i FC Barcelona a tira riba dje. Pero na 2014 Ajax a logra firme. Siendo hopi hóben, e tabata wega ainda i no a mustra masha seriedat. Esei a pone ku Ajax a fié na Willem II i FC Utrecht, promé ku ela pasa definitivo pa e ekipo den divishon maksimio di Belgika, KV Oostende pa después resulta te na China ku a fié na Inglatera den Liga Premier ku Sheffield United, pa después e regresa China.
Di einan ela bai hunga na e país di su mama, Serbia den Strea Kòra di Belgrado, kaminda ela hunga entre otro kuater wega den Europa League. Kansa di ta for di kas i sintiendo falta di su mama, su amiga i su amigunan ela disidí di regresa kas. Richairo ta bin ku un makutu di eskperensia riba e nivel maksimo di futbòl. Apesar ku nunka e no a kumpli ku e ekspektativa grandi ku a pone riba dje, paso e kier a disfruta mas di bida na edat hoben i a kana su mes kaminda, e ta sigur un piesa klave pa nos selekshon i ahinda tin solamente 26 aña i ta den flor di su bida.
Apesar di tur kos e tin un promedio di un gol kada tres wega, kual riba nivel máksimo ta un bon promedio. E ta ágil, tin un teknika superior, tin bon velosidat, tambe ku bala na pia i por tira bon ku tur dos pia. E ta un sentro delantero nato. Awor ku nos tin tres sentro delantero di nivel si Jǜrgen Locadia (Cangzou) bin, lo bai bira interesante pa wak si Bicentini ta bai sigui hunga ku un punta di lansa so of lo skohe pa un sistema di dos delantero i skohe pa probecha di e eksperensia ku Živković i Locadia tin riba e podionan máksimo di futbòl mundial.
Kòrda ku tin tambe Rangelo Janga (CFR Cluj) ku tei ahinda i ta hòmber di konfiansa di Bicentini pa e puesto di rematado den punta di atake. Awor mas madurá i ku mas eksperensia Živković sigur ta un balor agrega pa ‘Pantera Negra’. Ku Floranus, Troupée ku awor si ta hungando regular den su ekipo, Locadia si e bin i Živković, e selekshon di nos aki a gana na hungadó ku tin eksperensia riba e nivelnan máksimo na Europa i na mundu i nos por forma un kos serio pa e futuro serkano ku ta bin . Un delantero ku Živković i Locadia bo por presentá tur kaminda kune. Nan tur dos tin eksperensia riba e nivel mas haltu na mundu ku ta Liga Premier. Huntu ku Cuco, e dos Bacunanan i Anita nos por presenta un elenko ku no ménos ku seis hungado ku a hunga den Liga Premier i si nos traha un onsena na drechi i pone e piesanan bon riba tereno, nos por kompeti ku tur den nos región. Richairo Juliano Živković sigur ta un balor agrega.
