Kampionato Liga 60 dediká na Rudy Brunken a start
WILLEMSTAD- Kampionato 2023 di Liga 50, dediká na Rudy Brunken a start den Stadion Post 6 djasabra 8 di aprel. Rudy Brunken ku ta fundadó di Liga 50, Liga 40 i Liga 60. Djasabra 8 di aprel ekiponan Baranka, Flamboyan/Tigers di Rudy Brunken i Pitufos a gana. Nos tin un historia kòrtiku di Rudy Brunken. E apertura ofishal lo tuma lugá dia 16 di mei, fecha ku liga 50 lo bai e parke di kustumber ku ta
Van Engelen Ballpark.
Ciril ‘Rudy’ Brunken, ko-inisiadó i motor di nos liganan 40, 50 i 60 a nase 19 di mart 1947
na Kòrsou, den bario di Groot Kwartier. Den Groot Kwartier tambe ela bai skol i praktiká
tur deporte di bario. Ela sobresalí den baseball i tabata forma parti di Groot Kwartier Stars bou di maneho
di Ganga Chirino. E tabata pitcher i tabatin un tremendo fastball. Ademas e tabata hunga den rightfield.
Durante basta aña Rudy a hunga den baseball AA. Den añanan ’80 Rudy a pasa di beisbòl pa sòftbòl (Softball Modified Slow Pitch) i tabata instrumental den lantamentu di Liga Unitur ku a hunga na tereno di Post 6.
Rudy a partisipá ku su ekipo ‘Family’.
Liga 40 (1989)
Na 1989 a lanta Liga Amstel 40 na tereno di Suvek (awendia Van Engelen Ball Park) pa praktiká Softball Modified Slow Pitch. Sr. Franklin Halley ku koperashon di Rudy Brunken a lanta Liga 40. E Liga aki a dominá den añanan ’90 i ketu bai ta un Liga importante den Softball Modified Slow Pitch. Den e Liga aki Rudy a partisipá ku su ekipo ‘The Real Team’.
Liga 50 (2000)
Na aña 2000 e hungadónan di mas edat den Liga 40 a tuma nota ku ya no ta tin lugá pa nan mas i Rudy a tuma e inisiativa pa lanta Liga 50 na Chirino Ball Park. Den esaki e kontribushon di Tèti Chirino tabata grandi i generoso, pasobra gratuitamente ela pone su tereno na disposishon di Liga 50 pa mas ku un dékada. Liga 50 a konosé un kresemente rápido di 6, 8 i finalmente 10 ekipo, ora Direktiva di Liga 50 a disidí ku deportivamente i organisatoriamente no ta sano pa laga e Liga sigui krese.
Pa a partisipá den Liga 50 Rudy a funda e ekipo ‘Flamboyan’ na aña 2000. Flamboyan ta ketu bai aktivo, awor komo ‘Flamboyan Tigers’. Liga 50 den e último 2 dékadanan ta e Liga ku a keda mas konsistente pa loke ta partisipashon di ekiponan. Caterpillar/Cat Power, Jaws, Sluggers, Marlins, Lions i Flamboyan ku ta t’ei for di aña 2000, t’ei ainda. Despues e ekiponan Ban Serio, Baranka, Pitufos i Artemisia a bin forma òf nase for di ekiponan eksistente di Liga 50 i esaki indudablemente a hasi Liga 50 mas fuerte’. Ekiponan ku no t’ei mas i/òf a keda remplasá den Liga 50 ta Century Stars, Los Amigos i Sharks. Rudy en todo kaso a pone un base sólido pa Liga 50, ku awe ta mas fuerte ku nunka.
Liga 60 (2007)
Pa mesun motibu ku a lanta Liga 50 Rudy a tuma e inisiativa pa lanta Liga 60, esta, ku e hungadónan di mas edat den Liga 50 a tuma nota ku ya no ta tin lugá pa nan mas, pasobra esnan mas hóben a hasi e Liga sumamente rápido i kompetitivo i atrobe Rudy na aña 2007 a lanta Liga 60 na Frank Curiel Ball Park. Aki Rudy ta partisipando ku su ekipo ‘Curaçao Super Stars. Liga 60 ta drai zetá i tur djadumingu ta hala un públiko respetá ku ta bin gosa di estreyanan 60+.
Direktiva di Liga 5O ta gradisí señor Ciril ‘Rudy’ Brunken pa su kontribushon na desaroyo di Liganan di Softball Modified Slow Pitch 40-50-60, en espesial pa su kontribushon na Liga 50.
Ku dedikashon di KAMPEONATO LIGA 50 2023 na Rudy, Direktiva di Liga 50 ke mustra su gratitut i rekonosementu pa e gran trabou ku Rudy a hasi kada bes di nobo pa garantisá ku esnan ku ta bira mas grandi tin un ambiente sigur pa por praktiká nan deporte stimá, Softball Modified Slow Pitch.
Danki Rudy!
