Kampionato Mundial ta start awe 20 di novèmber na Qatar
QATAR – Awe, djadumingu 20 di novèmber 2022 e kampionato Mundial di Futbòl, e tradishonal Magno Evento ku ta tuma lugá despues di kada 4 aña ta start. Lo hunga na 5 suidat i den 8 diferente stadion. E 32 ekipoan lo ta reparti den 8 pul. Hopi kontroverisa naturalmente tokante froude i tumamentu di plaka bou di mesa pa haña sede di e kopa Mundial di Futbòl na Qatar. Mas ku 6000 obrero di otro paisnan ku a muri trahando bou di sirkustansianan inhumano durante konstrukshon di e stadionnan ets ets. E promé wega lo ta entre Qatar i Ecuador pa 12’or pm ora di Korsou.
Laga nos bai dirèt pa e skèdjel i e pulnan.
E 32 ekiponan ta repartí den 8 grupo, A te ku H. Kada pul tin 4 ekipo. Tur ekipo lo enfrentá otro den e promé rònt. Ta 6 wega pa kada grupo i e último wega di kada grupo lo tuma lugá pareu pa evitá hisamentu di pia. Despues ta sigi 16 ekipo ku a klasifiká i lo hunga sistema di nòkout ke men dal saka. Ekipo ku pèrdè ta kai afó.
E 8 ekiponan ku gana den e rònt aki ta pasa pa kuart final, pa sobra 4 ekipo ku ta bai hunga e semi-final. E dos ekiponan ganadó di semi-final lo sigui pa e final pa saka sup-kampion i kampion. Pèrdèdónan di e semi-final lo bai hunga pa di 3 i 4 lugá.
