Komishon organisadó pa torneo Creme de la Creme su di 19 edishon
Fundashon Baseball Team Tra’i Seru a nombra komishon organisadó di e di diesnuebe edishon di torneo di baseball Little League Creme de la Creme.
E torneo ta hunga di 11 di sèptèmber te ku 4 di òktober próksimo. Kontrali na e otro añanan, Creme de la Creme lo konsistí e aña aki di solamente e parti lokal.
Manera ta konosí, t´asina ku pa motibu di Covid-19, e aña aki no tin torneonan Latinoamerikano, di Caribe ni tampoko Mundial.
Konsiderando esaki, ta e intenshon pa e torneo konta ku partisipashon di tur ekipo di tur e tres liganan di divishonnan Little i Minor di Kòrsou. Tambe nos lo rekonosé i honra nos baluartenan ku pa hopi aña ta dedikando nan tempu boluntariamente na nos hóbennan.
Nos ta probechá informá ku e komishon organisadó, meskos ku añanan anterior, ta konsistí di un grupo di persona ku boluntariamente a aseptá pa yuda e organisashon i a hinka nan skouder bou di e torneo aki. E komishon ta konsistí di e siguiente personanan: Monique de Haseth presidente, Rolando Chirino Vice Presidente, Ghisyiska Jansen tesorero Oswin Lint direktor di torneo, Javier Specht sekretario, Carlos Evertsz, Eraina de Medeiros, i Emmylou Jakoba Komisario, Urny Florán i Shelwyhn Salesia Konsehero.
