Komportashon indebido di fanatikada por kousa ku beisbòl AA ta para
FEBEKO ta urgi un i tur pa sigui reglanan di outoridatnan
Willemstad 17 di sèptèmber 2020 ̶ Durante e partido di AA entre e eterno rivalnan di Sta. Maria Pirates, Chippie i Wildcats, Guardian/KJ 74, di djaweps 17 di sèptèmber 2020, tabatin un situashon lamentabel ya ku surgi un interupshon temporal den e partido despues ku outoridatnan polisial a presentá aya na Tio Daou Ballpark i a para esaki. Motibu di e petishon tabata a konsekuensia di komportashon indebido di fanatikada na parti pafó di stadion kaminda ku a aglomerá pa por sigui e partido ya ku manera a keda indiká, por lo pronto no ta pèrmití fanátiko na ningun evento deportivo. Outoridatnan mester a aktua i a yega ku vários patruya reforsá pa VKC ya ku a forma un ‘happening’ kompleto parti patras di stadion i esaki sigur ta bai kontra di e reglanan ku tin stipulá n’e momentonan aki pa ku aglomerashon, distansia sosial i higiena pa ku Covid-19.
FEBEKO ta sumamente agradesido i kontentu pa ku e gran entusiasmo ku ta reina pa sigui nos beisbòl lokal. Sinembargo, FEBEKO pa ningun motibu no por aprobá e komportashon aki ku por keda denominá komo asta peligroso mirando e situashon di pandemia ku nos ta aden komo pais. Komo organisashon FEBEKO no ta responsabel pa loke públiko hasi pafó di tereno, sinembargo ke enfatisá ku e komportashon aki por kousa ku nos outoridatnan i instansianan di salú lokal ta kanselá resto di temporada di AA ku ta den su rekta final, si akaso públiko no mantené su mes n’e reglanan stipulá. Esaki a keda klaramente indiká na FEBEKO komo federashon. Esaki sigur lo ta algu sumamente lamentabel i no ta loke niun bon fanátiko ta deseá i sigur no e ekiponan ku a bin ta brinda un tremendo espektákulo pa ku temporada 2020, apesar di tur e diferente retonan ku a haña konfrontá kuné debí na e pandemia.
Manera indiká, teniendo na kuenta ku a introdusí toke de keda entrante djaweps 17 di sèptèmber 2020, FEBEKO a adaptá e orario di komienso di partido i hasi esaki 7or di anochi durante di siman en bes di e orario usual di 7:30pm p’asina por duna espasio na tur esnan enbolbí pa por tèrminá i yega nan kas debidamente. Durante wikènt e orario di komienso di partido lo ta 6’or pa mes motibu.
FEBEKO ke rekordá un i tur riba e posibilidat di sigui e partidonan via di e plataforma di e matutino Vigilante. Pues, no opstante ku no por ta presente den stadion, fanatikada tin e posibilidat pa sigui tur partido i sigui sostené nan ekipo faborito na un manera muchu mas seif for di komodidat di kada ken su kas. Pa mas informashon i tambe kon pa sigui e partidonan online por bishitá página di Facebook di FEBEKO @baseballcuracao pa keda debidamente informá.
Kòrda... nami 2... Un p’ami, Un p’abo!
