Kòrsou kampion Torneo di Karibe di Beisbòl
WILLEMSTAD- Selekshon di Kòrsou ku bon picheo i bateo oportuno a gana Cuba 4-3 i bira kampion di Torneo di Karibe di Beisbòl (Caribbean Cup) . E wega final a tuma lugá djasabra anochi dilanti un públiko grandísimo na Tio Daou Ballpark. Kòrsou su ofensiva tabata barbaro ku 12 hit kontra di e picheo Cubano. Stephan Vidal i Urlich Snijders tabata den gan forma bayendo di 4-3. Stephan Vidal tabatin 1 empuhá, Urlich Snijders 2 empuhá i Sherman Lacrus a empuhá e otro kareda.
Tabatin un hungada importantisimo den bòm di di 8 inning kaminda riba hit pa lèft di Cuba ku dos na base, e leftfielder di Kòrsou, Aldair Daal a hasi un tremendo hugada kortando un bala ku tabata bayendo pa muraya riba liña den leftfield. Daal a manda un tremendo relevo aden pa e shòrstòp ku a tira tersera riba e koredor Cubano ku a habri dimas na tersera base. Un out grandi ku a salba e wega i evitá ku Cuba lo a empatá e wega den bòm di di 8. Den último inning e picher Hershelon Juliana a saka Cuba 1,2,3 pa terminá e wega. E último out tabata un flai den teritorio foul, fásil pa primera base Alexander Rodriguez. Pavel Quasada kuarto bate di Cuba a bira MVP. Ela bati pa 833 ku 2 homerun, kuater doblete i 12 RBI. Despues di wega tabatin entrega di premio dor di dirigentenan di Copabe i Minister di Deporte Sythree van Heydoorn.
NUMERITONAN
Kòrsou tabatin 4 kareda, 12 hit i 2 eror. Nelmerson Angela tabata e picher ganadó. Ela tira 3 inning i tuma un kareda den relevo pa Ruderly Manuel. Ruderly Manuel a habri a tira 4 inning i tuma un kareda. Hershelon Juliana a tira e dos último inningnan pa haña e wega salba.
Cuba tabatin 3 kareda, 6 hit i 0 eror. Madam Montejo Frank Edelmiro tabata e picher pèrdèdó. Andrys Perez Garcia a bati di 4-2.
