Levi Carolus i Riordan Windster pa Royal Scorpions den Beisbol Dobel A
WILLEMSTAD – Moveshonan a sigi den Beisbòl Dòbel A pa loke ta trata kambionan despues di e eksitoso temporada 2020. Levi Carolus, hungadó di utilidat i batiadó di gran poder, lo ta práktikamente klá pa pasa pa Royal Scorpions. Hopi aña pasá Levi a hunga den ekipo Royal Scorpions i a bira kampion na dos okashon ku e ekipo menshoná. Levi Carolus tin basta aña den Wild Cats i ta rumbo pa bai bèk Royal Scorpions kaminda Levi a bira kampion na 2011 i 2012. Levi por hunga tur posishon den infield i outfield. Un dje hungadónan ku mas homerun último tempunan den Beisbòl Dòbel A.
Levi Carolus di Wild Cats bèk pa Royal Scorpions. Riba potrèt Levi Carolus e aña aki durante wega di Wild Cats.
RIORDAN WINDSTER
Riordan Windster ta shortstop estelar di Santa Rosa Indians i ta bati mayoría biaha number 1 den alineashon. Tremendo bate, bon spit, bon wante i brasa i tin algun aña kaba ku Royal Scorpions ta tras di e infielder aki. Royal Scorpions tin un bon oferta i trabou pa e talentoso shortstop aki yu di Rodney ‘Rockey’ Windster. Santa Rosa lo no laga bai fásil, pero konosiendo direktiva di Santa Rosa mester bisa pa un bon por venir di e hungadó (no sèn, pero trabou) nan lo habri man laga bai. Riordan ‘Jordi’ Windster a bati .320 ku play-off adén i tabata grandi den play-off final. Riordan a bati .393 den play-off final ku ekipo Santa Rosa. Parse ku negosashonnan no ta klá ainda, pero direktiva i fanátikonan di Scorpions ta sigur ku Riordan lo ta den Royal Scorpions. Parse ku Urwin Juaquin lo no tei den 2020 komo shortstop pa Royal Scorpions i lo move pa eksterior. Sheryvien Newton tambe lo move bèk pa USA. Kevin Moesquit lo keda na segunda base i parse ku Shurendell Mujica tambe ta rumbo pa Royal Scorpions.
CHRIS KOEIMAN
Fanátikonan di Santa Rosa ta insistí ku Chris Koeiman no a pasa pa Wild Cats ainda. Un gran fanátiko ta sigur ku Chris lo ta bèk ku Santa Rosa den 2021. Tin interes di ekiponan pa Sidney Antonia di Wild Cats tambe, pero nos no por a konfirmá e notisia i detayenan. Parse ku Chris Koeiman a firma ku Santa Maria PIrates, djabièrne 30 di òktober.
