Maishi Tigers ta titulá kampion Bola 8 2021
WILLEMSTAD- Federashon Biyar Kòrsou, adaptando na e situashon aktual, a organisá su kampionato di ekipo Bola 8. Esaki a sosodé, “kort maar krachtig.” Un evento no di larga durashon i manteniendo na e reglanan di higiëna. Sinku ekipo a partisipá i tur kos a kana sublime. Tabata reina un bon ambiente durante e anochinan di kompetensha i asina a bin yega na e tres anochinan final kual tabata dianan 21, 22 i 23 di desèmber.
E final a keda disputá entre e ekiponan di Maishi Tigers i D – Stingray. Tabata e último ekipo ya menshoná ku a pika dilanti den e seri final ganando 5 pa 4. Riba e di dos anochi e veteranonan di Maishi Tigers ta empatá e seri ku mesun skor, pues 5 pa 4.
E resultado aki a duna muestra ku ta kandela lo tabata bai tin riba e anochi final i esaki a resultá e gran bèrdat. Ningun di e dos ekiponan no kier a baha kabes. Ku e partido empatá na 4, e hóben tigernan ta sera man i bai ku e viktoria, atrobe ku skor final di 5 pa 4.
Un pabien na Maishi Tigers ku a titulá kampion i na e supkampionan D- Stingray.
Federashon Biyar Kòrsou ta gradisí tur medio di komunikashon pa nan bon kolaborashon duná durante 2021. Pa medio di e komunikado aki Direktiva di Federashon Biyar Kòrsou ta deseá pueblo di Kòrsou un Felis Fin di Aña i un komienso di 2022 yená ku Bendishon.
