Marlins i Ban Serio ku dos viktoria na Sint Maarten den Kopa ABC&S 50
WILLEMSTAD – Ekipo Marlins tin dos wega ganá i 0 pèrdí den Kopa ABC&S 50+ na Sint Maarten. Ban Serio tambe tin 2 ganá i 0 pèrdí. Djaweps den e promé wega di Marlins, nan a gana pa defolt i ayera nan a gana di Dragons di Boneiru pa blackout ku skor di 20 pa 0. E ekipo Marlins a klasifiká pa semi-final. Djasabra Marlins lo topa e fuerte ekipo di Tigers di Sint Maarten i parse ku Marlins i Tigers lo klasifiká den nan pul. By the way último resultado ta indika ku Marlins a pèrdè kontra Tigers 9 pa 8.
Otro resultado ta ku Tigers di Sint Maarten a gana Dragons di Boneiru 12 pa 3. Lions di Sint Maarten a gana Astros di Aruba 14 pa 6. Jakspanias di Sint Maarten a gana Astros i nos ta pendiente di e skor aki. Ban Serio a yega Sint Maarten hunga mesora i gana di ekipo Jackspanias ku skor di 9 pa 6. Ban Serio tabata pèrdí 6 pa 0 den e wega aki. Di dos wega ekipo Ban Serio a gana di Lions pa medio di Blackout 17-0. Ban Serio mester gana wega number 3 tambe djasabra atardi i keda invikto rumbo pa playoff semifinal. Nos ta pendiente pa mas resultado.
Liga Pabou a bai misa pa gradisi Dios.
WILLEMSTAD - Resientemente selekshonnan di Liga Pabou a bai misa di Suffisant pa gradisí Dios pa e kuida nan durante e play-off i naturalmente pa e éksitonan. Eksito na selekshonnan di Pabou i di Kòrsou durante weganan regional den e lunanan benidero.
MAS INFORMASHON DI SÒFTBÒL
Fanátikonan di Deporte Korsou bon dia i felis wikènt. Nos ta riba un djasabra speshal en konekshon ku Kopa nan ABC&S ku ta tumando lugá Kórsou i Sint Maarten. Pa loke ta trata e ABC&S na Kòrsou, nos tabata presente djaweps pa gosa di e ambiente i kompetensia formal entre e ekiponan. Nos a wak e wega bon bringa entre dos ekipo di Boneiru ku tabata The Crushers i The Dreamers. The Dreamers a gana e wega ei ku skor di 9-5. Mesun dia The Dreamers a pèrdè ku skor di 8-3 kontra Cicoza i The Crushers a gana Redskins 10-1. Den e edishon di djabièrnè nos tabatin práktikamente tur resultado faltando solamente un wega.
• * * * * * *
Ekiponan di Boneiru ta kompetí den gran forma i ta spera ku un di e ekiponan aki lo yega semi-final. Vários pelotero yu di Kòrsou a bai establesé na Boneiru i hopi di e hobennan den e timnan aki ta hungando Beisbòl foi chiki den Little League. Kompetensia lo bai bira fuertisimo na momentu ku e promé 8-nan lo topa awe, pa despues saka e 4-nan ku lo hunga semi-final djadumingu mainta pa despues e ganadónan hunga final den oranan di atardi. Faboritonan naturalmente ta ekiponan Swift i Cicoza atrobe. Awe nos lo bai den pasado pa loke ta trata Kopanan ABC&S tantu riba nivel di e hobennan.
• * * * * *
Nos tin algun detaye tambe di Sint Maarten kaminda ekipo Tigers di Sint Maarten a gana Dragons di Boneiru 12 pa 3. Lions di Sint Marten a gana Astros di Aruba 14 pa 6. Di tres wega Marlins a gana Invaders pa defolt. E ekipo di Sint Eustatius no a logra yega ku un tim kompletu. Jakspanians di Sint Maarten a gana Astros. 15 hungadó di Ban Serio a yega den oranan di mainta pa topa Jackspanians. Ban Serio a gana e promé wega 9 pa 6. Un otro grupo di Ban Serio lo mester a yega den oranan di atardi pa hunga e doubleheader. Promé ku nos sigi ku Kopa ABC&S, den Beisbòl Veterano nos a tende ku ekipo Yesterday lo bira un kos serio den 2025 ku vários hungadó nobo ku lo kumpli 40 aña i otro hungadónan di otro ekipo ku lo djòin Yesterday den 2025 aki. Keda pendiente pa e desaroyonan.
• * * * * * *
Kopa ABC a start na 1984 na momentu ku Chai Curie i Ronny Gomez (Aruba) a disidí start ku un asina yama Kopa Antiano di Bush League na Aruba. Terremoto ekipo di Chai Curie ku trahadónan di Banko Maduro a bira e promé kampion. Despues e torneo a kuminsá yama Torneo ABC i mas despues ABC&S. Swift tin 13 titulo total despues ta sigi Astros ku tin 10 titulo. Astros tin un rekòrt di 6 titulo sigí di 1989 pa 1994. Bou di Palu tin un titulo, Cicoza tin dos titulo, Baranka tin dos titulo. Calabas, Carpatula, Tirado di Besitos, Buena Vista Power i Happy Brohters tin un titulo. Ekiponan di Boneiru i Sint Maarten no a logra tiítulo den e 41 aña i 39 kampionato di Kopa ABC&S.
• * * * * *
Nos tin algun momentu di Kopa ABC&S. Na 2003 na Boneiru Baranka a gana Carpatula den final pa nòkout 22-8. Carpatula tabata atras ku skor di 22-1 bayendo i den nan último chèns ta logra nota 7 kareda pa trata na bini bèk pero ta keda kòrtiko. Luigi Virginia ku a konektá 2 homerun den final i dal masha homerun den Kopa ABC/Amstel 2003 a bira MVP di e prestigioso torneo. Wim Felicia a tira wega kompletu pa resultá e picher ganadó.
• * * * * *
Na 2003 ainda e fundadó di Kopa ABC&S (Chai Curie) tabata picha pa su ekipo Terremoto. Teremoto/Giants a gana La Sonrisa Heineken 15-12. Teremoto ta sorprendé e organisadónan ganando ku skor di 15-12 ku tres homerun di Tyron De Palm den e wega inougural. Signald ‘Veteranísimo’ Curie a gana e wega, miéntras Tyron de Palm a bai di 3-3. Erling Gosepa a bai di 4-3. Gilford ‘Gelito’ Schmidt a bati un homerun, lokual tabata e promé homerun di Kopa ABC 2003. Pa La Sonrisa Glenn Bernabela a bai di 4-3 i Edgar ‘Edichi’ Agostien di 3-2. Glenn Bernabela a dal dos homerun, miéntras Edichi Agostien a bati e otro. E hungadónan ei ta den Liga 50 i 60 aworaki. Cicoza a bira kampion na 2015 i 2024 e otro añanan Swift a bira kampion esta 2016, 2017, 2018 i 2019. 2020,2021 i 2022 no tabatin kampionato ABC&S i Swift a bira kampion na 2023. Nos ta ta keda te aki pa awe te djaluna ku Poder di Dios.
