Nos Tambe Por kampion Sòftbòl 60+ di 2024
WILLEMSTAD- Nos Tambe Por a gana Jaws ku skor di 9 pa 1 pa bira kampion di Liga
60 djadumingu na Frank Curiel Ballpark. Siegfried Lopez i Michelangelo ‘Galbou’
Boekhoudt a kombiná pa logra e viktoria. Siegfried Lopez a bira MVP di e seri final.
Frank Curiel Ballpark tabata yen yen di fanátiko pa mira e wega final.
Despues di final tabatin entrega di premio na ekiponan i hungadónan individual. E ekipo fundá pa Frank Curiel i amigunan, ekipo Nos Tambe Por a titulá kampion. E kampionato 2024 tabata dediká na tres baluarte, Nelson Candelaria, Irwin Leito i Lionel Francinet ku a risibí honor atrobe pa entregá e premionan.
MAS INFORMAHSON DI SÒFBÒL I BEISBÒL
Fanátikonan di Deporte Kòrsou, bonochi. Pueblo di Kòrsou sali kas i a apoyá selekshon di Futbòl djabièrnè i djaluna anochi. Nos a pèrdè nos promé enkuentro kontra Sint Vincent di un manera ineksplikabel, pero despues otro gai a kanta. No sa klasifika i bai bek Liga A di Concacaf. Baranka a pika dilanti den e final di Liga 50 ku un viktoria pèrtá ku skor di 6-5 riba Ban Serio. Bon públiko pa mira e promé wega di e seri mihó di 3 di e gran final. Ban Serio tabatin base yen ku dos out, pero Kenny Hellement ta dominá Kevin Winklaar ku flai pa shortfield pa terminá e wega.
* * * * *
Na 2023 Kenny Hellement no tabata disponibel pa picha i ekipo Ban Serio a pasa relatívamente fásil riba Baranka den e gran final. Kenny a tira wega kompletu (116 lansamentu) i tabatin un hit klave den di 6 inning kaminda e kuadro di Ban Serio a kometé un eror krusial ku e wega 3-2. Einan e wega a bira 6 pa 2. Ban Serio a nota 2 kareda den bòm di e di 6 inning riba homerun di Miro Daal ku a drenta di relevo pa Michelangelo ‘Galbao’ Boekhoudt. Miro a relevá bon tirando 2 inning sin permití kareda i dal un homerun di dos kareda den su úniko turno. Fisel Pereira a bati di 3-2 ku 1 RbI pa ekipo Baranka i Rubiano Josoef Everon a bati di 2-1 ku hit pa empuhá dos kareda importante den di dos inning pa empatá e wega na 2. E di dos wega di e play-off final lo tuma lugá djasabra 23 di novèmber na Van Engelen Ballpark.
* * * * *
Djasabra ekipo Yesterday a pasa relatívamente fásil riba Broncos den e promé wega di wild card di Beisbòl Veterano . Yesterday ku a terminá number 5 durante e temporada regular a dal Broncos 14-5 ku bon picheo di Andley Simmons pa e ekipo Yesterday. Byron kook ku a karga e ekipo Broncos durante henter e temporada tabata e picher pèrdèdó. Broncos a habri ku piloto Jarl Henriquez ku a wanta basta bon i despues a traha lugá pa Byron Kook. Yesterday su bateo tabata bárbaro ku un atake di 14 hit. Sambo, Simmons, Pieternella, Ilaria, Aniceta i Schoop a konektá dos hit kada unu. Santa Rosa a laga Yesterday den tereno i bira number 4 lugá riba e standing.
* * * * *
Pa loke ta Liga Amstel ekipo Terremoto a gana Thrillers ku skor di 5 pa 2 djasabra i klasifiká pa semi-final. Luiz Veloz tabata den gran forma ku homerun, Zaino ‘Ami ta Gusta’ Everett a bati di 3-3 ku gran fildeo den short pa Terremoto. Terremoto a swip e seri ganando den dos wega stret. E promé wega di e final tabata for di djabièrnè 8 di novèmber i despues e weganan a keda kanselá na 3 okashon pa motibu di awaseru i mal estado di tereno. Den e otro seri Gamers a derotá Cicoza ku skor abultá di 22-6 i klasifika pa final. Cicoza ku tin hungadónan manera Yurendell de Caster, Roderick Bernadina, Edinho Meyer, Urlich Snijders, Andley Simmons, Dashenko Ricardo, ohochinan Polonius a anotá solamente 6 kareda. Gamers a klasifiká pa final di Liga Amstel. Gamers ta kampion di Liga Amstel di 2023.
* * * * *
Djamars semi-final di Liga 40 a start ku wega entre Cicoza i ekipo Gamers. Baranka ya ta den final di Liga 40 i ta pendiente di Cicoza i Gamers. Cicoza a gana ku skor di 8-3. Baranka ta super kampion di Liga 40 i kampion di 2022 i 2023. Na 2021 Swift ku picheo extra ordinario di Emilio Velarde a bira kampion, kaminda Emilio tabata tira 10 ponche pa wega den Slowpitch. A stòp Emilio di picha i Swift no a logra bira kampion mas. Na 2019 ekipo Crazy Tigers a bira kampion i despues e ekipo a stop di partisipá. Na 2020 debí na Covid no tabatin kampionato di Liga 50. Nos ta keda te aki pa awe. Te mayan ku Poder di Dios.
