Ora di bèrdat a yega, ban apoyá nos selekshon
4-2-3-1 ta nos mihó opshon kontra ‘Los Chapines’
Skibi pa Pepi Sulvaran
WILLEMSTAD.- Den futbòl meskos ku den bida, tur hende tin mag di tin nan opinion. Esei ta derechi di e fanátiko. ‘Pantera Negra’ ta bai konfrontá su promé wega desisivo den nos ambishon pa yega oktagonal. E por ta e promé di 3 wega di ‘bida òf morto’. Si nos pasa riba Guatemala, ku tur probabilidat Panamá ta warda nos den un dòbel tanda dianan 12 i 15 di e luna aki.
Lo siguiente ta un simpel opinion: 4-2-3-1 ta e sistema di wega ku ta duna nos mas posibilidat riba éksito. Na promé lugá, e ta un sistema konosí pa nos selekshon i ku un defensa ku tin su duda, bo mester probechá ku bo tin den bo filanan dos di e bon kitadónan di bala den futbòl profeshonal hulandes. Tin un realidat ku nos no por skonde. Nos defensa te ainda ta e parti debil di nos onsena. Kontra kontrinkante manera Isla Bírgen Ingles, Sint Vincent i Cuba, ku ta entre esnan mas debil den CONCACAF, bo por kamuflá esei.
Realidat ta ku Cuco Martina i Suently Alberto huntu, tin mas ku 38 luna sin hunga bala organisá riba nivel. Gaari ku Maria no ta estelar den nan ekipo. Cuco tin e bentaha ku e tin eksperensia riba nivel mas haltu na Inglatera i Hulanda. Gaari ta haña su pidanan den RKC i semper a hunga bon den selekshon. Sigur no tin niun espasio awor aki pa kontra Guatemala i sigur Panamá bai eksperimentá ku un defensa di 3, kaminda 2/3 parti di bo defensa huntu tin mas ku 3 aña sin hunga bala organisá.
Kontra Guatemala kisas, pero sigur kontra Panamá esei lo ta suisidio. Darryl Lachman ta indispensabel si nos tin ambishon pa sigui. Ku Lachman hungando sentral nos a yega kaminda nos ta awe. Ta un defensor sentral ku a yuda Zwolle gana kopa ulandes. E ta bin di e skol di Ajax i tin hopi eksperensia di kasi 250 wega den Eredivisie ulandes so kaba ku Groningen, PEC Zwolle i Twente. E no por ta for di aliniashon manera a pasa kaba kontra Costa Rica, ku konsekuensia serio. E mester ta den e weganan benidero.
-
Lokual ta konta pa Lachman ta konta mes òf mas tantu pa Kevin Felida. Mi tin idea ku nos no sa mes ken Felida ta. Voetbal plùs, aprel e aña aki a skohe Felida den e 11 mihó talentonan ku mas futuro den di dos divishon ulandes i den e 3 mihó bolantenan. Kevin ta tambe entre e 11 mihónan di e divishon. Voetbalzone tambe a apunt’é komo un di e mihónan den su divishon aktualmente i ku un futuro grandi su dilanti. Diferente ekipo ta bringando pa su servisionan, entre otro FC Groningen i Toulouse. Tur ku konosé futbòl sa e balor di un hungadó di e tipo manera N’Golo Kanté.
Felida tambe ta hasi tur kos riba téknika i ta bon ku òf sin bala. E tin bista riba e wega, ta kita hopi bala i pasa bala bon pa e hungadó korekto, paso e tin un bon pase i semper ta entrega tur kos. Ta un krímen pa lag’é afó i laga hungadó ku tin 6 luna, 1 aña i hasta mas ku 2 aña sin hunga bala hunga promé kuné manera a pasa na Guatemala. Nos mester tene kuidou pa no pasa meskos ku Nigel Robertha i Quinten Martinus, kendenan a bin selekshon pa sinta wak hungadó di nivel mas abou hunga promé ku nan i despues a ‘bedank’.
Martinus, hungadó di Eredivisie i J-League na Hapon tabata biaha dos dia pa sinta mira hasta hungadó amatùr drenta wega promé kuné. Pa e tipo di komplasementu aki no tin apsolutamente niun lugá den topsport, lokual djasabra a hera di kosta nos promé puesto den grupo C. Mester siña for di fayo di pasado.
Room (Columbus Crew) den gol. Lachman (Perth Glory) ku Leandro Bacuna (Cardiff) pa sostené komo sentralnan. Gaari (RKC) rèksbèk. Cuco Martina links bèk, ku den Everton tambe a hunga einan. Esaki ta un linea defensivo sólido. Anita (RKC) ku Felida (Den Bosch) komo ‘stofzuiger’ dilanti e defensa. Anita por hunga na e banda di Gaari manera nan ta hasi den RKC i Felida por sostené e parti robes di defensa ku su velosidat i kapasidat pa rekuperá bala. Por sierto ku Felida sa hunga bèk sentral tambe den Den Bosch.
E tres bolantenan ofensivo mester ta Juninho (Huddersfield), kende mester hunga meimei i no na banda, i den banda Kuwas (Al Nasr) ku Antonia (Cambuur). Nan por kambia di ala tambe. Benschop (Apollon Limassol) den punta di atake. E unidat den e team ta hopi bon i pa e kalidat di hungadó ku nos tin, ta gana mester gana ‘bicolor’ mañan pa por sigui den nos kareda pa Mundial. Asina aki nos ta mira e ekipo ideal pa por yega leu.
Pa: Peppie Sulvaran.
