Play-of Liga 50 ta start djasabra 7 di òktober sifra final Liga 50 i informashon di MLB play off
WILLEMSTAD- Play-off semi-final di Liga 50 ta start djasabra 7 di òktober na Van Engelen Ballpark. Ekiponan Baranka, Ban Serio, Jaws i Marlins a klasifiká. Weganan ta lo sigiente. Djasabra 10’or Ban Serio vs Jaws, 12’or ta Baranka kontra Marlins. Djadumingu 10’or ta Baranka – Marlins i 2’or Ban Serio vs Jaws. Nos tin resultadonan di e último dos weganan di e buelta regular. Djasabra 30 di sèptèmber tabatin e 2 último weganan pa loke ta trata kampionato regular di Liga 50. Baranka a topa ku Flamboyan Tigers i a bai ku e viktoria di 16 pa 11. Den e otro wega e ekipo Sluggers a derotá Pitufos ku skor di 16 pa 8.
Djasabra 30 di sèptèmber
Baranka 16, Flamboyan Tigers 11
Baranka tabatin 16 hit i nan a kometé 1 eror. Fisel Pereira a gana i Rignald Jonis a bai di 1-1. Edmar Cornelia ku Joseph Everon a bai di 2-1, Gregory Reina di 3-1 i Myron Wijman a bai di 2-2. Emmeric Agata ku Robertico Ramazan a bai di 3-2. Sedeney Lourens i Fisel Pereira di 3-3. Joseph Everon, Myron Wijman, Sedeney Lourens ku Fisel Pereira, tur a konektá 1 homerun i Emmeric Agata a konektá 2. Flamboyan Tigers a dal 13 hit i hunga sin eror. Gilbert Keller a pèrdè. Luis Alcantara ku Gilbert Keller a bai di 1-1, Stanley Palm i Rudolph Garmes di 2-1. Juan Trinidad a bai di 2-2, Gilbert Juliet i Gerthon Matrona a bai di 3-2. Gerthon Matrona a konektá 1 homerun.
Sluggers 16, Pitufos 8
Sluggers a dal 17 hit i hunga sin eror. Junny Wawoe tabata ganadó. Gilbert Adriana ku Junny Wawoe, ámbos a bai di 2-1 i Humphrey Antonia di 2-2. Albertico Leito i Hilbert Cicilia a bai di 3-2 i Dudley Felida di 4-2. Gerald Zimmerman ku Raymond Lieuw a bai di 3-3. Raymond Lieuw a konektá 1 homerun. Pitufos tabatin 15 hit i nan a hunga sin eror. Sidney Lourens a resultá pèrdèdó. Randall Constancia i Angelo Martiena a bai di 1-1. Juburnie Davelaar i Sidney Lourens a bai di 2-1 i Robertson Josepha a bai di 3-2. Omar Valies ku Norwin Moesquit a bai di 3-3. Juburnie Davelaar ku Robertson Josepha a konektá 1 homerun i Omar Valies a konektá 2.
Eksitoso Torneo Dutch Caribbean Master 60+ organisá pa Los Amigos
WILLEMSTAD- Wikènt pasá tabatin e eksitoso Dutch Caribbean Master 60+ organisá pa Los Amigos. E torneo tabata dediká na Rudy Brunken i Ibi Soerka. Los Amigos ta gradisi tur ku di un manera òf otro a koperá pa e torneo por a bira un éksito. Den 2024 lo tin 3 torneo, entre otro ABC 60+, torneo Himno i Bandera na Aruba na mart, Torneo ABC na mei na Aruba i na òktober Torneo Dutch Caribbean Master 60+ organisá pa Bonaire Stars na Boneiru.
%20copy.jpg)
RESULTADOAN
Djabièrnè 29 di sèptèmber
Aruba Junior 10, Tigers 60+ Vets 2;
Bonaire Stars 5, Boomerang 4;
Nos Tambe Por 5, Lions 0;
Nos Tambe Por 6, Florsheim 2.
Djasabra 30 di sèptèmber
Lions 7, Florsheim 1;
Jaws 4, Tigers 60+ Vets 0;
Pitufos 6, Boomerang 2;
Jaws 8, Aruba Junior 0;
Pitufos 5, Bonaire Stars 0.
Djadumingu 1 òktober
Nos Tambe Por 4, Jaws 2;
Pitufos 7, Lions 2;
Jaws 7, Lions 0;
Nos Tambe Por 7, Pitufos 1.
PREMIASHON
Kampion: Nos Tambe Por.
Supkampion: Pitufos
Di tres lugá: Jaws.
Hungadó Mas Balioso, Percey Schoop di Nos Tambe Por.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bontardi i felis fin di siman. Nos ta bai drenta play-off semi-final di e popular Liga 50 ku ta tuma lugá tur djasabra na Van Engelen Ballpark. E momentu di bèrdat a yega kaminda ekiponan Baranka, Ban Serio, Jaws i Marlins lo topa ku otro. Ekipo Marlins a klasifiká for di aña 2019 pa play-off, miéntras Baranka a drenta play-off na 2021 i 2022 i na tur dos okashon a bira kampion. Ban Serio a bai play-off tur aña durante e ekipo su eksistensia den Liga 50 i aña pasá nan a keda eliminá pa Baranka, mièntras Jaws a gana ekipo Flamboyan Tigers den semi-final.
* * * * *
Djasabra ekipo Ban Serio lo topa ku Jaws pa 10’or i despues pa 12’or ekipo Baranka lo hunga kontra Marlins. Djadumingu e serinan ta sigi, pero e weganan lo ta 10’or di mainta Baranka kontra di Marlins i despues ta ekipo Ban Serio kontra di Jaws pa 2’or djadumingu. Mas despues den e kolumna nos tin sifra di e ekiponan ku a partisipá den play-off i kon e serinan a bai. Ekiponan Baranka i Ban Serio a swip e serinan kontra nan kontrinkante. Faboritonan naturalmente ta Baranka i Ban Serio, pero hopi ta mira sorpresa e aña aki den Liga 50.
* * * * *
MLB Play-off ta bai start despues ku ekiponan Texas Rangers, Minnesota Twins, Philadelphia Phillies i Arizona Diamond Backs a swip nan kontrinkante djamars i djarason. Serinan di divishon ta start djasabra aya na USA. Texas lo topa Baltimore pa 1’or, despues Minnesota kontra Houston pa 4.45, sigi pa Atlanta Braves vs Philadelphia Phillies. E último wega di e serinan di divishon lo ta Arizona kontra Los Angeles pa 9.20 pm. Telecuracao a skohe pa transmití e weganan di Atlanta ku chèns di transmití e weganan di Los Angeles Dodgers tambe. Den Liga Nashonal ta ekiponan di mesun divishon lo bai topa otro den e seri divishonal. Interesante ruman. Na 2022 ekipo Philadelphia a sorprendé e ekipo di Atlanta Braves ku tabata den gran forma tambe, pero ya. Phillies ta parse mas mihó ku den 2022 i Atlanta Braves ta ekipo to beat den 2023.
* * * * *
Tene kuenta ku nos Ozzie Albies ta den akshon ku Atlanta Braves. Ozzie Albies ta bini di un tremendo temporada kaminda ela bati 33 homerun i empuhá 109 kareda i bati pa un averahe di .280. Ozzie Albies a hunga 148 wega i a poncha na solamente 109 okashon. Batiadónan ku ta konektá riba 30 homerun ta poncha kasi 150 pa 200 biaha. E batiadó Kyle Schwarber di ekipo Philadelphia a dal 47 homerun, pero a poncha na 215 okashon. Atlanta Braves tin 5 batiadó ku a konektá riba 30 homerun. Albies 33 homerun, Riley 37, Acuña 40, Ozuna 41 i Olson 54. Atlanta ta faborito leve pa gana e seri, pero ban wak kiko ta bai pasa.
* * * * *
Kampionato di Karibe (Caribbean Cup) ku partisipashon di selekshon di Beisbòl a kambia skema. Kòrsou
a pèrdè kontra Cuba ku skor di 3-1 djabièrnè mèrdia. Laga nos bai pa e sifranan kolektivo pa loke ta trata e play-off di Liga 50. Baranka (17-1) ku a terminá number 1 a bati pa averahe di .505 den bateo, picheo kolektivo ku un ERA di 6.19 i defensa .947. Nos ta sigi ku Ban Serio (16-2) ku a bati pa .551, picheo ku un ERA di 7.94 i defensa .949. Segidamente sifranan di Jaws (13-5) ta bateo .465, picheo (ERA .7.36) i defensa .903. Por último nos tin Marlins ku tin un bateo kolektivo di .437, picheo 9.33 i defensa .926.
* * * * *
Beisbòl Veterano ta sigi kayente e wikènt aki na Vi Jansen Ballpark. Nos tin weganan di e siman aki. Djasabra 7 di òktober pa 10.30 Vosama – Yesterday, 13.00 Santa Maria Pirates – The Brothers (kandela ruman), 15.30 Otrabanda – Azucar. Djadumingu 10.30 Isla Crackers – Quality, otro kandela grandi, 13.00 Marchena Stars – Marlins i pa 15.30 ta Santa Rosa kontra di Jandoret Raiders. Liga 60 tambe ta sigi na Frank Curiel Ballpark. Pa 11.00 ta Pitufos vs Los Amigos, 13.00 ta Curacao Super Stars vs Jaws i último wega ta 3’or entre Amigos i Nos Power. Nos ta keda te aki pa awe i te mayan ku Poder di Dios.
