Play-off Final Beisbòl Veterano entre Santa Maria i Quality Stars ta empatá
WILLEMSTAD- Durante wikènt ku a pasa tabatin 2 wega di e play-off final di Beisbòl Veterano entre e dos ekiponan Sta Maria Pirates i Quality Stars. E weganan aki a tuma lugá na Vi Jansen Ballpark ku asistensia di bon públiko ku por a disfrutá di e weganan. Riba djasabra e ekipo Sta Maria Pirates a derotá Quality Stars ku skor di 16 pa 6 i djadumingu Quality Stars ku picheo di Hayzem Martina a gana Sta Maria 11 pa 1. Pues tur 2 wega a terminá pa medio di nòkout i di e forma aki e seri a empatá na unu.
E di 3 wega di e seri di 3 lo kontinuá djadumingu 13 di novèmber na mesun Vi Jansen Ballpark.
RESULTADONAN:
Djasabra 5 di novèmber
Sta Maria Pirates 16, Quality Stars 6
Sta Maria tabatin 6 hit i nan a kometé 1 eror. Amador Nita a gana i Rodreck Zimmerman a bai di 1-1. Rayon Samuel i Randolph Balentina, ámbos a bai di 2-1. Signald Paz a bati di 3-1. Quality a dal 6 hit i nan a hasi 4 eror. Dayron Puriel a pèrdè i Ian Ignacio a bai di 1-1. Raydell Isabella a bai di 2-1 i Dayron Puriel a bai di 2-2.
Djadumingu 6 di novèmber
Quality Stars 11, Sta Maria Pirates 1
Quality a dal 9 hit i nan a hunga sin eror. Hayzem Martina tabata picher ganadó i Emile Haswell Jr. a bai di 2-1. Vernon Isabella a bai di 3-2 i Raymond Leonora di 4-3. Sta Maria tabatin 4 hit ku 4 eror. Amador Nita a resultá pèrdèdó. Rayon Samuel ku Randolph Balentina, ámbos di 2-1. Rodreck Zimmerman a bai di 2-2 inkluyendo 1 homerun.;
Fanátikonan di Deporte Kòrsou, bon dia i bon siman. Play-offnan a sigi den wikènt na Kòrsou. Play-off final di Beisbòl Dòbel A a sigi djasabra i ekipo Wild Cats a bai dilanti den e seri 2-1 ganando Santa Maria Pirates ku skor di 13-3. Shai Martis ku tabata picher pèrdèdó den wega number 1 a bini fuerte bèk tirando 6 inning kompletu pa bira e picher ganadó. Shai Martis a risibí relevo di Nigel Calmes den di 7 inning. E wega a bai 7 inning debí na regla di nòkout. Nigel Calmes a tira 1 inning, dos ponche i un base por bola. Play-off di Beisbòl Dòbel A a sigi djaluna 7 di novèmber ku wega number 4. Wild Cats a gana wega number 4 i pone Santa maria lomba kontra muraya. Wega number 5 lo ta djaweps 10 di novèmber i wega number 6 si ta nesesario djasabra 12 di novèmber. Wega number 7 tambe si ta nesesario lo ta djadumingu 13 di novèmber.
* * * * *
Den e promé wega Shai Martis a tira 7 inning i tuma 6 kareda di kual 4 tabata limpi. Pa e wega di dia 10 di novèmber ya Shai lo ta disponibel pa picha atrobe despues di 4 dia di sosiegu. Tin indikashon ku shai Marits lo tira e wega aki sigur. Di otro banda e estelar di Santa Maria, Scott Prins tabatin su mihó dia komo picher. Ela tira solamente 2 inning tuma 5 hit i 3 kareda. Den e otro weganan ku Scott Prins a tira tantu den temporada regular komo play-off i tabata hermétiko. Den play-off semi-final Scott Prins a tira un wega kompletu kontra Royal Scorpions (9 inning) i tuma un kareda so i tirando 9 ponche.
* * * * *
Houston Astros a gana World Series ganando di ekipo Philadelphia Phillies 4-2 den e seri manera hopi kronista deportitvo i analistanan di Beisbòl a pronostiká. Houston ta un ekipo hopi kompakto, tantu na picheo, defensa komo bateo. E ekipo tin algun hungadó ku por roba base tambe i e relevistanan ta tremendísimo. Naturalmente doñonan di ekipo mester bai saka mas sèn pa mantené e ekipo aki. Bon moveshon tabata pa laga tantu e centerfielder George Springer i e shortstop Carol Correa bai, pasobra mester di sèn pa por paga hungadónan hóben ku Houston a mara riba kontraktnan largu, pero no di hopi sèn. Pabien na Houston Astros i tur fanátiko di Houston Astros aki na Kòrsou.
* * * * *
Santa Maria a pika dilanti den e seri final di Beisbòl Veterano djasabra. Santa Maria a gana ku skor di 16-6 den un wega di hopi base por bola. Djadumingu Quality Stars a gana wega number dos ku skor di 11-1 i empatá e seri. Djadumingu mainta tabata Jandoret Raiders 50+ ku a topa ku Yesterday i Jandoret a gana ku skor di 15-3. Yesterday supkampion di temporada pasá di 50+ tabata invikto promé ku e wega menshoná. Miéntras tantu Jandoret a bira number 3 den Liga 40+ di Beisbòl Veterano. E wega entre Isla Crackers i Jandoret Raiders no a tuma lugá. Isla a partisipá na direktiva di Beisbòl Veterano ku nan lo no tei pa e wega bálido pa di 3 lugá.
* * * * *
Wega semi-final di 50+ Sòftbòl entre Jaws i Flamboyan Tigers djasabra na Van Engelen Ballpark a keda suspendé pa motibu di mal estado di tereno. E wega lo bai djasabra awor 1.30’or na Van Engelen Ballpark. Weganan di Liga Amstel lo hunga promé i despues di weganan di 50+. Ke mèn, Liga Amstel lo move pa vèlt A pendiente e play-off ku lo start pronto. Liga 50 ta hunga un wega so pa dia i a traha espasio pa Liga Amstel hunga riba vèlt B.
* * * * *
Pa loke ta trata play-off di Sòftbòl Femenino Fastpitch, djaweps Pichingolo a pika dilanti 1-0 ku un viktoria tòg bastante fásil riba e ekipo Souax ku ta faborito a base di nan fuerte picheo ku tin J’Dah Girigorie i e Hulandes Eva Voortman. Djadumingu Pichingolo a gana i djaluna Souax a gana. Pichingolo ta dilanti 2-1 den e seri mihó di 5.
