Polis i SDKK kampion Torneo SIPS
WILLEMSTAD- Polis a gana den e kategoría Soshal i SDKK den 40+ djadumingu último den Torneo SIPS ku a tuma lugá den Stadion Post 6. Polis 1 a gana Quick 60+ ku skor di 9 pa 2 den e final di Soshal Maskulino di e hóbennan i SDKK a gana Polis den 40+ ku skor di 9 pa 5. Bon públiko riba e fechanan final pa mira e weganan semi-final i final. Despues di wega tabatin entrega di premio. E torneo a start djasabra 4 di yüni ku partisipashon di 10 ekipo den 2 diferente kategoría. E organisadónan por mira atras riba un torneo eksitoso. Keda pendiente pa Torneo SKAK (Sòftbòl Komersial Aruba Kòrsou) ku lo tuma lugá fin di yüli den Stadion Post 6. Nos tin numérito di e weganan final di torneo SIPS (Stichting Internationale Politie Sportweken.
KPC (1) 9, Quick (’60)
KPC dal 12 hit i hasi 1 eror. Richendley ‘Chino’ Isenia tabata e picher ganadó. Willy Lichtenberg, Gabriel Engelhardt, Gerson Adamus i Churandy Lacrus a bati di 3-2. Quick 60 a bati 5 hit i hasi 3 eror. Rodriguez a resultá e picher pèrdèdó. Antonia a bati di 2-1.
SDKK 9, Polis 5
SDKK a dal 14 hit i hasi 3 eror. Eldrin Ortega a gana i Monte a bati di 2-2. Eldrin Ortega, Gosepa i Remick Bernadina a bati di 3-2. Polis a konektá 7 hit i hasi 2 eror. Lionel Privania tabata e picher pèrdèdó i Jeffrey Martina a bati di 3-3.
INFORMASHON DI SÒFTBÒL I BEISBÒL
Fanátikonan di Deporte Kòrsou, bontardi. Nos tei atrobe kargá ku informashon di Beisbòl i Sòftbòl. Selekshon di Sòftbòl Femenino a yega djaluna atardi bai kue anochi. Tremendo aktuashon manera nos a splika ampliamente djadumingu. Nos ekipo hopi hóben a terminá number 3 di e kompetensia na Argentina i nos tabatin e ekipo mas hóben pa promedio den e kampionato. Hopi di e hóbennan den selekshon lo ta ku e selekshon Senior League ku lo move pa Puerto Rico. Senior League lo hunga di 14 pa 20 di yüli na Sabana Grande (Puerto Rico). Selekshon Junior tambe lo hunga den mesun kampionato. Junior lo sali dia 13 di yüli i Senior ta sali dia 14 di yüli. Kampion di e torneo lo hunga na USA den e kampionatonan Mundial di Junior i Senior.
* * * * *
Santa Maria Pirates despues di a pèrdè dos wega sigí kontra Santa Rosa a gana dos wega i bai hunga pa promedio di .500 mesora. Santa Maria Pirates a dal Groot Kwartier duru ku skor di 21-5 djadumingu i 12-0 djaluna. Manera antisipá Santa Maria lo ta den e promé 4-nan huntu ku Wild Cats, Royal Scorpions i Santa Rosa. Standing promé ku e wega di ayera tabata Santa Rosa 3-1, Wild Cats 3-1, Groot Kwartier 2-2, Santa Maria 2-2, Marchena Braves 1-1, Royal Scorpions 1-3 i Firebirds 0-2. Royal Scorpions a topa dos grandi kaba ku ta Wild Cats i Santa Rosa. Nan a logra kibra invikto di Santa Rosa djadumingu i awor no tin niun ekipo invikto den Beisbòl Dòbel A.
* * * * *
Temesh Lourens a keda den ekipo Royal Scorpions despues ku práktikamente e tabata den Wild Cats. Temesh tabatin dos aña mas di kontrakt ku Royal Scorpions i Wild Cats mester a paga por lo ménos 6000 florin. Parse ku e dil a dòl i Temesh Lourens a picha su promé wega den Royal Scorpions pa 2022 pa duna e Skorpionnan Royal nan promé viktoria. Temesh a tira 6 inning i permití 4 kareda, pero solamente 2 limpi pa bai ku e viktoria. Pichernan Cerilio Soleana i Jadon Gosepa tambe a mira akshon pa Royal Scorpions. Cerilio no tabatin un bon aktuashon atrobe i su ERA ta di 9.00, pero ta apénas dos wega Cerilio Soleana, e slengu Boneriano a tira. Jadon Gosepa ku tabata bon picher for di Little League te ku Hubenil tambe a tira i picha bon pa Royal Scorpions djadumingu último. Saludo pa Gai Lihe Barbolina ku ta trankil i kontentu e dianan aki ku su ekipo Royal Scorpions.
* * * * *
Shair Lacrus di Santa Rosa a tira kontra su éks ekipo Santa Maria. Ela tuma tres kareda, pero tur tabata shushi sin tuma hit, pero ela tira un base por bola, un ponche i un hit by pitch. Otro hungadó di menshoná ta Givainne ‘Chucho’ Basilia ku ta den Royal Scorpions despues ku ela firma ku Santa Maria algun luna pasá. Chucho a hunga shortstop i bati di 9 pa e ekipo Royal Scorpions kontra Santa Rosa djadumingu. Chucho a hunga dos partido pa Royal Scorpions i a demonstrá bon defensa i tin 0 hit den 6 turno. E bateo mester bini bei ainda. Chucho a firma ku Santa Maria Pirates huntu ku Moesquit, Gedryon Basilia, Django Balentina ets dia 20 di aprel 2022. Parse ku no tin espasio pa Chucho hunga regular den Santa Maria i ela move pa Royal Scorpions kaminda elo bai hunga shortstop huntu ku Jadon Gosepa. Tur dos hungadó tabata tremendo picher tempu di nan tempu den Little League.
* * * * *
Preparashonnan ta sigi pa selekshon di Beisbòl Dòbel A ku lo hunga den Haarlemse Honkbalweek ku ta di 8 pa 15 di yüli. Téknikonan a manda yama e hungadó Alexander Rodriguez bèk despues ku e no tabata na training último simannan. Alexander Rodriguez ta un hungadó klave, bon defensa na primera, tremendo bate ku poder i hopi importante ta ku e por picha algun inning tambe. Risandro Pastor ku tambe ta den selekshon por hunga posishon i picha tambe. Mester di hungadónan ku por picha tambe den serinan kòrtiku kaminda ta hunga hopi wega tras di otro. Parse ku selekshon lo reforsá na Hulanda ku Dudley Leonora i Raychelon Carolina. Nos no a mira Richgelon Juliana den akshon pa Santa Rosa ainda. Calten Daal ta kimando liga ku Santa Rosa i tin un avergae di .615, lider den bateo di Beisbòl Dòbel A. Awe nos tin resultadonan di Beisbòl Veterano. Nos ta keda te aki pa awe.
