WILLEMSTAD- Quality Stars ku picheo kombiná di Reinold ‘Payo’ Anderson i Hensley Josephina ta gana Jandoret Raiders ku skor di 5-4. E wega a tuma lugá djadumingu mainta na Vi Jansen Ballpark. Quality Stars tabata dilanti durante henter e wega. Jandoret ta hasi e wega 5-4 i menasá den último inning komo ekipo di kas, pero ta keda kòrtiku. Quality Stars ta keda invikto i nan tin rekòrt di 7 ganá i 0 pèrdí. Isla Crackers ta empatá na promé lugá ku mesun rekòrt. Djasabra 11 di yüni pa 1’or pm e dos ekiponan lo topa otro i un invikto lo kai. Nos tin resultado i numerito di e weganan di siman pasa.
Djasabra 4 di yüni
Sta Rosa Memories 18, Marlins 9.
Sta Rosa a dal 14 hit i nan a kometé 1 eror. Raymy Cicilia a gana. Shendy Cras ku Jair Quant a bai ámbos di 3-3. Marlins tabatin 7 hit ku 4 eror. Orlando Gerard a pèrdè. Miguel Velasquez Agramonte a bai di 2-2. Cedric Gil i Jean Paul Pierre, ámbos a bai di 1-1.
Sta Maria Pirates 11, Yesterday 1
Sta Maria tabatin 6 hit ku 1 eror. Amador Nita tabata picher ganadó. Eldred Estanista a bai di 3-2 i Roderick Zimmerman a bai 2-1. Pa Yesterday 3 hit ku 8 eror. Erwin Curial a resultá pèrdèdó. Zhurendel Ilaria a bai di 1-1.
Isla Crackers 10, Vosama 9
Isla a dal 8 hit i nan a kometé 4 eror. Stanford Landburg a gana. Charlton Merite a bai di 3-3. Vosama tabatin 7 hit ku 5 eror. Alberto Ramirez a pèrdè. Jose Martinez, Sigbert Juliana ku Harley Dave Paulo, tur a bai di 3-2.
Djadumingu 5 di yüni
Quality Stars 5, Jandoret Raiders 4
Quality a dal 9 hit i nan a kometé 1 eror. Reinold Anderson a bai ku e viktoria. Raydell Isabella a bai
di 2-2. Emile Haswell Jr. ku Vernon de Lanooi, ámbos di 1-1. Jandoret tabatin 7 hit ku 1 eror.
Deron Clara a karga ku e derota. Erling Gosepa a bai di 3-3. Raylon Capella ku Elmus Paulo di 1-1.
Azucar 11, Veteranos Otrobanda 1
Azucar tabatin 10 hit ku 1 eror. Raymond Soerka a gana. Raymond Soerka, Winston Kirindongo ku Fhurgion Booy, tur a bai di 2-2. Bryan Esclodina i Eugene Martijn, tur dos a bati di 1-1. Otrobanda a dal
3 hit i nan a hasi 1 eror. Edison Clemencia a pèrdè i Ramses Kirindongo a bai di 1-1.
The Brothers 16, Marchena Stars 3
The Brothers a dal 14 i nan a hunga sin eror. Signald Burnet tabata picher ganadó. Reinaldo Elcock a bai di 3-3. Kelvin Winklaar, Rignaldo Giterson ku Richel Angela, tur a bai di 1-1. Marchena tabatin 4 hit ku 3 eror. Wendell Elizabeth a resultá pèrdèdó. Raily Cordilia ku Wendell Elizabeth, ámbos a bai di 1-1.
Fanátikonan di Deporte Korsou bondia. Nos tei atrobe kargá ku informashon di Sòftbòl i Beisbòl. Weganan di Beisbòl Dòbel A a sigi ku skor grandi djaluna kaminda ekipo Santa Rosa Indians a dal Santa Maria durísimo ku skor di 17 pa 3. E weganan di Beisbòl te ku djaluna tabatin skornan 9-8, 13-12, 17-0 i 17-3. Dos blackout feros tras di otro a kai, un pa Royal Scorpions i otro pa Santa Maria. Dos ekipo grandi i di hopi trayektoria den nos Beisbòl. Dos ekipo ku ta poné pa klasifiká den e promé 4-nan. Royal Scorpions ta e ekipo ku mas título den Beisbòl Dòbel A ku 18, sigí pa Wild Cats ku 16 i Santa Maria ku 11 título.
* * * * *
Wild Cats i Santa Rosa a mustra sólido den komienso di kampionato. Apesar ku Wild Cats a pèrdè 7-0 djaweps vs Marchena pa despues gana bèk ku skor di 14-6 djabièrnè. E dos ekiponan aki (Santa Rosa vs Wild Cats) a topa otro den final na 2020 i Santa Rosa a sorprendé ganando e seri final 4-3 den wega finalísimo den Tio Daou Ballpark. Tabata aña di COVID-19 ku a kulminá ku un final históriko. Santa Rosa a gana e wega ei ku skor di 12-10 i riba un djaweps 15 di òktober. E segunda base di 17 aña, Jevganni Reinita a bira MVP di e play-off kompletu i Jordan Lucas MVP di e seri final. Santa Rosa a bira kampion pa di 7 biaha den nan historia e dia ei (1965, 1986, 1987, 1988, 2003, 2008 i 2020). Santa Rosa Indians a sali dilanti for di e promé inningnan i a logra nota 8 kareda kontra Jair Jurrjens ku a tira 2 inning i 2 tersio. Ya, tabatin algun eror klave tambe ku a brua asuntu mas pa Jair Jurrjens e dia ei. En todo kaso, ta Jordan Lucas e picher mas konsistente di último añanan a tira e wega final ei. Un tremendo picher ku semper ta gana den weganan grandi.
* * * * *
Den Beisbòl Veterano ekipo Quality Stars a keda invikto despues ku nan a gana di Jandoret Raiders 5 pa 4 djadumingu mainta na Vi Jansen Ballpark. Quality ta na promé lugá empatá ku Isla Crackers ku rekòrt di 7-0. E dos ekiponan menshoná lo topa ku otro djasabra awor pa 1’or na Vi Jansen Ballpark. Standing den Beisbòl Veterano ta lo siguiente. Isla Crackers 7-0, Quality Stars 7-0, Santa Maria 6-1, The Brothers 4-2 , Jandoret Raiders 4-3, Azucar 3-3, Santa Rosa Memories 3-4, Marchena Stars 2-5, Vosama 2-4, Otrabanda 1-5, Marlins 0-6, Yesterday 0-6. E promé 6 ekiponan ta klasifiká. Number 5 vs 6, den un wega Wild Card. Ganadó 5 vs 6 den otro wega di Wild Card kontra di number 4 i despues e play-off semi-final mihó di 3 ta sigi entre 1 vs 4 i 2 vs 3. Despues ta sigi final.
* * * * *
Awe nos tin e resultadonan di Beisbòl Veterano i algun lider individual. Rydell Isabella di Quality Stars ta lider ku un averahe di .625. Ta sigi Charles Merite (Isla Crackers) .588, Jair Josepha (Isla Crackers) .571, Erling Gosepa (Jandoret) .562 i Kevin Boekhoudt .550. Den RBI Kevin Boekhoudt ta lider ku 7 kareda empuhá, ta sigi Senny Petronella (Quality), Quincy Kook (Isla), Arthur Kops (Jandoret), Erling Gosepa (Jandoret) 7. Pa loke ta picheo Felix Ibañez (Vosama) i Marlon Balentien (Isla Crackers) 0 tin ERA di 0.00. Dayron Puriel (Quality Stars) 0.68, Roderick Eustatius (Isla) 0.75. Orsendo Clemencia (Isla) 0.78. Xaviero Avastia (Vosama) tin 17 ponche tirá. Edison Clemencia (Otrabanda) 17, Raymond Soerka (Azucar) 13, Signald M. Burnet (The Brothers) 10, Roderick Eustatius (Isla ) 10.
* * * * *
Wikènt pasá tabatin un torneo Soshal/Komersial na Boneiru ku partisipashon di varios ekipo di Kòrsou. Ekipo SBAB a sali kampion den Soshal, Black Sox a bira kampion den e Challenger Maskulino i Radiator supkampion den Challenger Maskulino. Nos tin pòtrèt den un artikulo kòrtiku di e torneo organisá pa Yurell de Caster. Su mama i rumannan di Kòrsou a presentá di sorpresa riba Yurell aya. Ta trata aki di Michelin, Yurendell i Yurina de Caster. Tempu i espasio ta kòrtiku i nos ta pendiente pa pone resultadonan di Liga 50, Liga 60 tambe e siman aki. Liga 40 i Liga Amstel ta buskando ekipo pa por hunga na Van Engelen Ballpark. Asuntunan ta sigi kayente den Liga di Nos Tur entre Felip Guanipa di Curacao Sweetheart i direktiva di e liga. Nos ta keda te aki pa awe.
