RBC a entregá unifòrm na selekshonnan di Little League di Kòrsou
WILLEMSTAD- RBC Royal Bank, spònser di Curacao Little League Baseball, djasabra 24 di yüli 2021 a entregá unifòrm na selekshonnan di Little League di Kòrsou, ku lo hunga den e torneonan Aruba & Curacao Baseball Classic. Naturalmente a entrega na unifòrm na e 6 selekshonnan (Minor, Little, Intermediate) di Korsou, selekshonnan ku lo representa Kòrsou di 26 di yüli pa 1 di ougùstùs den Stadion Post 6.
E entrega simbóliko di unifòrm a tuma lugá riba tereno den Stadion Post 6 den presensia di tur hungadó i dirigentenan di selekshon di Liga Pabou i Liga Pariba. A entrega unifòrm simbolikamente na 10 selekshon, entre otro Minor, Little, Intermediate, Junior i Senior di Liga Pabou i Liga Pariba. Di parti di spònser RBC Royal Bank a hiba palabra sr. Pierrot Hurtado, Country Manager di RBC Royal Bank Kòrsou i Boneiru i District Administrator sr. Urny Floran. Pa promé biaha e entrega a tuma luga dilanti tur delegashon, esta hungadó di tur selekshonnan di liganan menshona i nan dirigentenan. Pa promé biaha tambe 10 selekshon huntu ta risibí unifòrm riba un parke di beisbòl Little League.
Pierrot Hurtado a bolbe mustra riba e importansia di nos Hubentut pa ku futuro di Kòrsou i ku RBC Royal Bank lo sigui yuda den desaroyo di hóbennan na Kòrsou. Pierrot Hurtado a deseá nos selekshonnan éksito na Korsou i éksito tambe na esnan ku lo kompeti na Aruba.
Urny Floran a gradisí RBC atrobe pa e aporte na Little League, den e kaso aki unifòrm pa nos muchanan. Manera ta konosí RBC ta spònser biahe i unifòrm tambe di delegashonnan di Beisbòl Little League, ku lo biaha pa eksterior. (E aña aki solamente Kòrsou i Aruba). Nos pelotero- i e coachnan ta bon prepará i naturalmente lo ta bon bistí pa representá Kòrsou dignamente aki na Kòrsou i e otro selekshonnan (Junior i Senior) ku lo biaha pronto pa Aruba.
RBC lo ta presente na apertura i durante weganan di e ‘Aruba & Curacao Baseball Classic’ pa apoyá nos hóbennan di Minor, Little i Intermediate. E weganan lo tuma lugá den Stadion Post 6 di 26 di yüli pa 1 di ougùstùs 2021.
Na momentu ku e selekshonnan ta biaha, manera kustumber RBC representá pa Sharier Dorand lo tei na aeropuerto pa yama nos hóbennan ayó i deseá nan suerte den e kompetensianan.
Teksto pa portrèt:
Entrega di unifòrm na selekshon Little Pabou
Entrega di unifòrm na selekshon Senior Pariba
Managing Director sr. Pierrot Hurtado ku speech promé ku entrega di unifòrm na 10 selekshon di Little League
Sr. Urny Floran, District Administrator ta dirigí palabra
Dirigentenan di Little League i funshonarionan di RBC despues di e entrega di unifòrm. Di robes pa drechi, Urny Floran District Administrator, Sharier Doran branch manager RBC, sra. Emmylou Jakoba presidente di Liga Pariba, Pierrot Hurtado managing Director RBC Royal Bank, Eugene Sambo presidente di Liga Pabou.
