Santa Maria vs Quality Stars den Beisbòl Veterano awe
WILLEMSTAD- Santa Maria Pirates kampion di Beisbòl Veterano 2021 lo topa ku Quality Stars djasabra 21 di mei 2022 pa 10.30’or na Vi Jansen Ballpark. Santa Maria Pirates i Quality Stars ta invikto ku rekòrt di 4-0 i un invikto lo kai awe. Quality Stars tabata kampion na 2020 i Santa Maria na 2019. E dos ekiponan aki ta dominá den Beisbòl Veterano e último dos añanan. Den e di dos wega e super kampion di tur tempu di Beisbòl Veterano Jandoret Raiders lo topa ku Marchena Stars ku ta moviendo bon den 2022 ku varios hungadó nobo. Jandoret Raiders no a para ketu i a buska algun veteranísimo mas pa mantené nan mes den e mihónan di Beisbòl Veterano. Wega number 3 di awe lo ta otro klèsh entre Santa Rosa Memories i The Brothers. Djadumingu 22 di mei, 10.30 Otrabanda – Yesterday, 13.00 Marlins - Isla Crackers, 15.30 Vosama – Azucar. Standing di Beisbòl Veterano promé ku weganan di djasabra 21 di mei , ta Santa Maria 4-0, Quality Stars 4-0, Isla Crackers 4-0, Azucar 2-1, Jandoret Raiders 2-2, Marchena Stars 2-2, The Brothers 1-2, Vosama 1-2, Santa Rosa Memories 1-3, Marlins 0-3, Otrabanda 0-3, Yesterday 0-3.
RESULTADO DI AWE, 21 DI MEI
Quality Stars 7, Santa Maria 4
Jandoret 16, Marchena 3
The Brohters 5, Santa Rosa 4
RESULTADONAN SIMAN PASA
Isla Crackers 8, Santa Rosa Memories 4
Isla a dal 9 hit i hasi 2 eror. Roderick Eustatius tabata e picher ganadó. Chali Merite a bati di 2-2. Roderick Sambo tambe di 2-2. Quincy Kook di 1-1. Santa Rosa a bati 2 hit i hasi 1 eror. Edmond Martina tabata e picher pèrdèdó. Egbert Polonius i Ian Leito a bati di 2-1.
Marchena Stars 6, Azucar 0
Marchena a dal 9 hit i hasi 1 eror. Wendell Elizabeth tabata e picher ganadó i Francisco Alcantara a bati di 2-2. Chervin Maduro di 3-2. Miro Daal i Danielo Sanches di 1-1.
Azucar a konektá 5 hit i hasi 3 eror. Ramond Soerka tabata e picher pèrdèdó. Winston Kirndongo a bati di 2-2.
Jandoret 11, Marlins 5
Jandoret a bati 11 hit i hasi 5 eror. Deron Clara tabata e picher ganadó i Mayron Martinus a bati di 3-2.
Marlins a bati 7 hit i hasi 4 eror. Orlando Grerard tabata e picher pèrdèdó. Fardy Lard a bati di 1-1.
The Brothers 4, Yesterday 3
The Brothers a dal 7 hit i kometé 3 eror. Wendell van het Kruys tabata e picher ganadó. Kelvin Winklaar i Byron Kook a bati di 2-2. Hubert van het Kruys, Ramses Elisabeth a bati di 1-1.
Yesterday a dal 1 hit i hasi 3 eror. Carl Jurrjens a resultá e picher pèrdèdó i Andres Gonzales a dal e úniko hit pa Yesterday.
Santa Maria 5, Vosama 1
Santa Maria a konektá 4 hit i hasi 1 eror. Signald Paz tabata e picher ganadó. Randolph Balentina a bati di 2-2. David Kirindogo di 2-1. Vosama a bati 3 hit i hasi 3 eror. Edward Felisia tabata e picher pèrdèdó i Ryan Imperator a bati di 1-1. Xaviero Avastia i Felix Ibañez a bati di 1-1.
Fanátikonan di Deporte Korsou, bon dia i felis wikènt. Djabièrnè tabatin 3 wega di Torneo Hope na Van Engelen Ballpark i awe weganan di play-off ta sigi. Ta último wikènt di Torneo Hope pa despues liganan start na Van Engelen Ballpark. Entre otro Liga Amstel, Liga Van Engelen, Liga 50 i Liga 40 ku a hunga na Van Engelen Ballpark i otro liganan manera Liga di Nos Tur, Liga Streanan di Ayera ta pendiente pa start despues. Beisbòl Veterano a start for di 23 di aprel i tin 4 wikènt tras di lomba. Liga 60 ta start djadumingu awor na Frank Curiel Ballpark.
* * * * *
Torneo Hope kayente mes mes awe i mayan. Nos ta bai bèk den tempu un ratu riba e super kampionnan di Torneo Hope ku sigur ta SBAB ku a start ku e torneo Soshal aki i ku tin mas título. Ta sigi MCB i despues CITCO ku un tempu tabata konta entre e grandinan di torneo Soshal. Dok ku awor ta Damen un tempu tabata komanda, Omni tambe a gana basta título Soshal último tempu. Boso ta kòrda un tempu e rivalidat entre UTS i Flow den Torneo HOPE òf Torneo SBAB. Aworaki esnan di UTS i Flow ta huntu den e kompanía Flow i by the way, tur dos ekipo ta den play-off pa awe i ku chèns di bai final djadumingu.
* * * * *
Na 2011 segun nos a kambia e torneo ku tabata Torneo SBAB pa Torneo Hope. Na e okashon ei MCB komo organisadó a entregá un chèk di 20.000 florin na e delegashon di Special Olympics ku tabata bayendo Grecia. E entrega di premio a tuma lugá e tempu ei na MCB Scharlooweg. Ekiponan kampion a risibí nafl.1500,- na premio, ekiponan supkampion a risibí trofeo i partisipashon gratis pa e siguiente aña. Kampion bate i lider di homerun a haña trofeo i Kompa Leon i Giftcard di 100 florin. Vanessa Winklaar tabata kampion bate, Sharon Rose De Lanooi lider di homerun.
* * * * *
Ban sigi un ratu pa e ganadónan di e tempu ei. Citco kampion Femenino, BDO supkampion Femenino. Kooyman kampion Challenger i MCB supkampion Challenger. MCB kampionato Soshal Maskulino i ORV/Polis supkampion Soshal Maskulino. UTS/TDS kampion Challenger Maskulino i Refineria supkampion Challenger Maskulino. Nos ta kòrda ku Churandy Lourens di UTS a dal su ruman Neldrick Lourens un homerun krusial den e parti final di e wega pa bòltu skor. E tempu ei tabata promé biaha ku a kambia e bala moli i e inkrebilidat.
* * * * *
Individualnan ku a gana premio e tempu ei tabata fuera di Vanessa Winklaar i Sharon Rose Delanooi, Valeria Stins, Jonathan Martijn e tempu ei pa Marriot, Sharin Richardson, Andry Plaate, Enrique Kroon, Dave Kiridongo, Ram Kirindongo i Rigene Antonia. Tene kuenta ku ta Jonathan Martijn di Boneiru e tempu ei ku a bira kampion picher i no Jonathan Martijn ku a hunga den MCB i ku awor ta forma parti di Securitas Polis. Saludo pa Jonathan aya na Boneiru ku tabata coach di Little League. By the way, manera nos a bisa último dianan Little League ta ‘mute’ na Boneiru. Un ratu Recordar es Vivir, Torneo Hope promé biaha ku bala moli organisá pa MCB.
* * * * *
Ketu bai den tempu di 2011, Hensley Josephina a debutá komo picher den Beisbòl Veterano. Chal Van Thijs a dal hit di oro den Yesterday pa laga Bulldogs den tereno. Renato Anasagasti tambe a start den Beisbòl Veterano ku 50 aña despues ku ela retirá for di Beisbòl Dòbel A na edat di 50 aña. Jandoret Raiders pendiente pa sali for di Liga Un i Tur den 2011 pa bai hunga Beisbòl Veterano. Yurell De Caster i Raylan Fransisca a subi den ekipo Bou di Palu den Liga Un i Tur.
* * * * *
Kòrda ku awe ta kandela tin den Beisbòl Veterano na momentu ku Quality Stars topa ku Santa Maria pa 10.30’or, despues ta sigi Jandoret vs Marchena i de 3 wega ta entre Santa Rosa Memories i The Brothers. Ayera play-off entre Rising Trotters i ekipo Treasure a start i weganan ta sigi awe. Hope dimes ku Gentz djadumingu i weganan awe.
