Selekshon di Sòftbòl Kòrsou ta pèrdè 1-0 kontra Meksiko i lo bai hunga buelta pèrdèdo Kòrsou Senior Kampion di Karibe
SALVADOR - Djamars 4 di yüli selekshon di Sòftbòl di Kòrsou lamentabelmente no a logra pasa pa e super round. Kòrsou a pèrdè Mexico ku skor di 1-0. Pero falta 3 wega mas. Republica Dominicana, Korsou, Salvador i Guatemala ta bai lucha pa wak ken ta kaba mihó riba e standing final di 5 te ku 8. Kòrsou ta bai pa mehorá nos prestashon na Baranquilla (Kòrsou a sali penultimo na 2018). E meta awor aki ta pa nos bai pa e di 5 puesto. Djarason 5 di yüli nos tin wega 1or vs El Salvador, djawebs 1or vs Rep.Dominikana.
Kòrsou Pabou kampion di Karibe di Beisbòl Senior i mas informashon di Beisbòl Sòftbòl
WILLEMSTAD- Selekshon di Kòrsou Pabou a gana Pariba ku skor di 7 pa 5 pa bira kampion di Karibe di Beisbòl Senior League. Un públiko grandísimo tabata presente den Tio Daou Ballpark pa mira e gran final. Ku e wega empatá den di 7 inning, Clay Winklaar ta konektá tripel ku Deshandro Tromp na primera pa bira e kareda di ventaha 6 pa 5. Riba roletaso pa primera Clay Winklaar a nota kareda number 7. Den último inning, inning number 7, e picher relevista di Pabou, I-Zion Mogen a saka Pariba 1, 2, 3 pa Pabou bira kampion i selebrá formal den tereno. Despues di wega tabatin entrega di premio na ekiponan ku a terminá kampion, supkampion i di 3 lugá. Kampion, Kòrsou Pabou, supkampion Kòrsou Pariba i Puerto Rico na di 3 lugá. Boneiru a risibí e premio komo ekipo mas disipliná.
NUMERITONAN
Pabou ta nota 7 kareda, dal 9 hit i hasi 2 eror. Izion Mogen tabata e picher ganadó. Clay Winklaar a bati di 4-3. Pariba a skor 5 kareda, bati 6 hit i hunga sin kometé eror. Johaimry Balentina tabata e picher pèrdèdó i e mes a bati di 2-2. Tishmar Hermanus a bati di 3-2.
MAS INFORMASHON DI BEISBÒL I SÒFTBÒL
Lesadonan di Deporte Kòrsou, bon dia i felis siman. Selebrashon total di Dia di Bandera djadumingu rònt Kòrsou. Un show tur afó na Brionplein i Kòrsou a hisa i gosa su bandera ayera. Pa loke ta trata kampionato di Karibe di Senior League, Kòrsou Pabou a gana Pariba ku skor di 7 pa 5 i bira kampion djasabra anochi den Tio Daou Ballpark. E parke tabata yen yen ku entre 3500 pa 4500 fanátiko. No tabatin lugá pa pone hende den e parke. Kòrsou lo representá Karibe den e kampionato Mundial ku lo tuma lugá na Easley Michigan (USA) di 29 di yüli pa 5 di ougùstùs. Remarkabel ta ku tin algun hungadó ku no por a bai i awor e a haña OK bek den nan futuro ekipo profeshonal, entre otro Curley Martha.
* * * * *
Extra.cw i riba tur e otro plataformanan a hasi un tremendo trabou ku transmishon tur dia for di djaluna 26 di yüni te ku djasabra 1 di yüli. E kuerpo kompletu a risibí hopi rekonosimentu pa nan trabou durante e siman. Narashon tabata den man di Jeffrey Martina, Gino Valeriaan i Luis Curiel. Risueño Sambo tabata na kabes di e transmishon. E kuerpo di transmishon lo tei bèk den Tio Daou Ballpark di 17 pa 22 di yüli. Delegashonnan lo yega dia 16 di yüli i regresá 23 di yüli. Bon trabou tambe di e komishon organisadó enkabesá pa District Administrator, Urny Floran.
* * * * *
Un tremendo kampionato ku a start ofishalmente djaluna pa djaweps bira konosí e 4 ekiponan ku a klasifiká pa play-off semi-final. Ekiponan Pabou, Aruba, Pariba i Puerto Rico a klasifiká. Ekiponan di Kòrsou a bari den semi-final pa medio di dos blankeo ku skor grandi. Kòrsou Pariba a gana Aruba 14-0 i despues Kòrsou Pabou a dal Puerto Rico 15-0. Ekipo Puerto Rico a sali number 3 despues ku nan a gana Aruba ku skor di 9 pa 8 djasabra mèrdia. Na entrega di premio despues di e wega final a bira konosí ku ekipo Boneiru a bira ekipo mas disipliná.
* * * * *
Delegashon di Little League Beisbòl ku lo move pa eksterior ta selekshon Intermediate ku a biaha djadumingu pa Antigua. Ta trata di e delegashon di Liga Pariba ku a gana e derechi pa representá Kòrsou den e kampionato Latino Intermediate. E kampionato ta di 2 pa 9 di yüli. Despues selekshon di Little League lo biaha pa Yabucoa (Puerto Rico) dia 9 di yüli pa e kampionato di Karibe. Junior Latino lo tuma lugá na Kòrsou di 16 pa 23 di yüli manera ariba menshoná.
* * * * *
Ban pa Beisbòl Veterano i Slowpitch. Wikènt pasá no tabatin aktividat di Beisbòl Veterano, tampoko Liga 50 i Liga di Nos Tur. E intenshon tabata pa hunga Beisbòl Veterano riba djasabra so, debí ku weganan di djadumingu 2 di yüli ku tabata Dia di Bandera a keda kanselá for di den siman. Pero despues den oranan di mèrdia djabièrnè a kanselá e weganan di djasabra tambe den Beisbòl Veterano. Weganan kandela entre Jandoret vs Santa Rosa i Isla Crackers kontra Quality a keda kanselá i lo tuma lugá dia 12 di ougùstùs. No ta konosí ki dia e weganan di 2 di yüli ku tambe a keda kanselá lo tuma lugá. Standing den Beisbòl Veterano ta Quality Stars 5-0, Isla Crackers 4-1, Jandoret Raiders 4-1, Santa Maria Pirates 4-1, Santa Rosa Memories 4-1, Azucar 2-3, The Brothers 2-3, Vosama 2-3, Marlins 0-4, Otrabanda 0-4 i Marchena 0-5. Wega di Marlins vs Otrabanda no a keda kompletá. Wikènt benidero ta Jandoret Raiders kontra di The Brothers djadumingu 1’or. Otro weganan ta djasabra 8 di yüli 10.30 Vosama – Azucar, 13.00 Santa Maria – Otrabanda, Quality Stars – Yesterday. Djadumingu 9 di yüli ta Marchena Stars – Santa Rosa, 13.00 Jandoret – The Brothers i 15.30 Marlins – Isla Crackers.
* * * * *
Wikènt pasá tabatin Torneo Dia di Bandera 60+ organisá pa Curacao Super Stars. Nos Tambe Por a bria kampion ganando di Jaws 6-0 den final. Pa loke ta trata Liga Streanan di Ayera, ekipo Eureka a sorprendé Treasure Plus djarason último ganando ku skor di 4-0 i despues djabièrnè den e promé wega di final Eureka a bolbe zona un kampanaso ganando Tur Goso ku skor di 6 pa 4. Nos ta keda te aki pa awe.
