Sin Stres ta swip Shining Stars i bira kampion Liga di Nos Tur 2023
WILLEMSTAD- Sin Stres ku bon picheo di Marie Windster ta swip Shining Stars i bira kampion Liga di Nos Tur. Marie Windster na ken e kampionato ta dediká a gana tur dos wega i bira MVP di e seri final. Sin Stres a gana e promé wega ku skor di 14-4 djabièrnè i e di dos wega ku tabata djasabra Sin Stres a gana pèrtá ku skor di 6-4. E weganan final a tuma lugá den Frank Curiel Ballpark. Ta di dos biaha ku ekipo Sin Stres ta bira kampion di Liga di Nos Tur. Na 2018 den e promé kampionato di Liga di Nos Tur, Sin Stres a bira kampion. Despues di e wega final tabatin entrega di premio.
RESULTADONAN
Djabièrnè 8 di sèptèmber
Sin Stres 14, Shining Stars 4
Sin Stres tabatin 10 hit ku 2 eror. Marie Windster a gana. Emmely Jonis, Sharlenda Martha Walle, Maria Windster i Aduke Torres, tur a bai di 2-1. Tanusi Delando ku Dayenne Delando, ámbos a bai di 3-2. Tanusi a konektá 1 homerun. Pa Shining Stars 4 hit ku 6 eror. Grace Leitoe a pèrdè. Sovienca Calmera i Grace Leitoe, ámbos a bai di 1-1. Arnalda Margarita i Zunaiska Hailand, tur 2 a bai di 2-1.
Djasabra 9 di sèptèmber
Sin Stres 6, Shining Stars 4
Sin Stres a dal 7 hit i kometé 2 eror. Marie Windster tabata picher ganadó i Dianara Pieternella a bai di 1-1. Tanusi Delando ku Janitza Betrian, ámbos a bai di 2-1 i Anushka Delando a bai di 2-2. Shining Stars tabatin 10 hit ku 1 eror. Suyenne Otto-Apostel a resultá pèrdèdó i e mes a bai di 2-1. Arnela Benilia tambe a bai di 2-1. Ashantely Giterson a bai di 2-2 i Grace Leitoe di 3-2.
Premionan
Kampion: Sin Stres
Sup kampion: Shining Stars
Di tres lugá: Un Kara
Di kuater lugá: Chilling di 4 lugá
MVP: Marie Windster (Sin Stres)
Kampion bate: Tanusi Delando (Sin Stres)
Kampion picher: Minerva Maduro Shining Stars, 6-0 (Shining Stars)
Lider di homerun: Tanusi Delando (Sin Stres) i Ashanti Giterson (Shining Stars)
MAS INFORMASHON DI SÒFTBÒL I BEISBÒL
Fanátikonan di Extra Inning, bon dia. Ekipo Sin Stres a bira kampion di Liga di Nos Tur djasabra anochi. Sin Stres a swip ekipo Shining Stars ganando djabièrne 14 pa 4 i djasabra nan a gana ku skor di 6 pa 4. E picher veteranísimo Marie Windster tabata grandi atrobe ganando tur dos wega pa bira MVP di e torneo. E kampionato tabata dediká na Marie Windster di Sin Stres i Dalilah Martina di ekipo Shining Stars. Basta bon públiko pa mira e finalnan kompará ku añanan anterior. Djabièrnè nos a pasa un ratu i no tabatin un públiko grandi manera kustumber. En todo kaso Sin Stres ta bira kampion di e liga despues ku nan tabata e promé kampion na 2018 di Liga di Nos Tur. Tanusi Delando di ekipo Sin Stres a sali kampion bate i lider di homerun.
* * * * *
Pa loke ta trata Beisbòl Veterano djasabra ekipo Isla Crackers a gana di Santa Maria Pirates ku skor di 6-2. Marlins a sorprendé Azucar lagando e ekipo Azucar den tereno ku skor di 6-5. Jandoret Raiders despues di tabata atras 7-3 a bòltu e skor i nòkout Marchena Stars 19-7. Marchena Stars despues di a pèrdè pa defolt e wikènt promé a sera 9 hungadó fásil i a sali basta bon, pa despues pèrdè gara riba e wega. Yesterday a dal Otrabanda fásil ku skor di 9-1. Ta di dos biaha ku ekipo Isla Crackers ta gana Santa Maria den 2023. Santa Maria tin tres derotá i 2 ta kontra di Isla Crackers. E ekiponan aki probablemente lo topa otro den play-off semi-final di Beisbòl Veterano. Otro wega di wikènt tabata kaminda The Brothers a gana di Vosama 7 pa 6. The Brothers a kometé 5 eror i mester a lucha pa laga Vosama den tereno. The Brothers su rèkòrt a bira 7-8 i ta den klasifikashon komo number 6 di BEVEKO, hopi serka di Yesterday. Den e último wega di wikènt Quality Stars a dal Santa Rosa Memories 9-0.
%20copy.jpg)
* * * * *
Djasabra 9 di sèptèmber ekipo Atlanta Braves a retirá number 25 di nos Andruw Jones. Ke mèn, niun otro hungadó di Atlanta Braves por usa e number 25 mas. Un seremonia impreshonante ku a keda transmití bibu i direkto pa Telecuracao i hopi fanátiko di Beisbòl i di deporte na kas i riba kaya a sigi e transmishon. E transmishon tabata nèt promé ku e wega entre Atlanta Braves i Pittsburgh Pirates. Bastante Yu di Kòrsou na Atlanta pa biba ku e momentu. Tantu esnan ku a sali for di Kòrsou komo esnan bibá na USA. Andruw Jones a nifiká masha masha hopi mes pa Kòrsou. E mihó centerfielder defensivo den historia di MLB. Nunka nos a mira e mener aki balotá un bala malu i laga bala kai. Inkreíbel. Pabien na Andruw Jones i famia i Pabien Kòrsou.
* * * * *
Saludo pa Jurickson Profar ku ta bèk den Grandes Ligas ku ekipo San Diego Padres despues ku Colorado Rockies a laga e hungadó aki liber. Jurickson a dal hit den 6 di su promé 7 turnonan ku San Diego Padres i a yega djasabra i hunga mesora. Djabièrnè San Diego Padres a subi Jurickson i djasabra e tabata den akshon. Djasabra Jurickson a bati di 4-3 kontra Houston i djadumingu te na momentu ku nos tabata wak wega Jurickson tabata batiendo di 3-3. Djasabra Jurickson a hunga primera base i djadumingu den rightfield. Un tremendo hungadó di utilidat ku hopi chèns di haña un kontrakt ku Padres di San Diego pa hunga den 2024.
* * * * *
Djadumingu 4 Yu di Kòrsou a mira akshon den MLB. Cedanne Rafaela, Ozaino Albies, Jurickson Profar, miéntras Kenley Jansen tabata pendiente pa drenta den lat pa Boston. Kòrsou ta grandi mes den MLB ketu bai despues ku 3 grandi a kai afó. Andrelton Simmons, Jonathan Schoop i Didi Gregorius. Naturalmente nos tin Rubiano Xander Bogaerts normal i pa hopi aña ku San Diego Padres. By the way, Josh Palacios (Pittsburgh i su ruman Richie Palacios (Sint Louis Cardinals) nan mama ta di Kòrsou. Nan tata ta di Puerto Rico i nan a nase na Brooklyn (New York). Ke mèn, por ta 5/6 Yu di Kòrsou den akshon di MLB djadumingu tòg.
* * * * *
Ban pa Slowpitch rápido. Den lat aki Nos Tambe Por a gana Pitufos 5 pa 2, Lions a dal Jaws 10 pa 7 i Los Amigos a gana Curacao Super Stars 6-2. Den 50+ djasabra tabata Ban Serio 23 - Jaws 6, Marlins 18 -Sluggers 3, Baranka 15 - Pitufos 5 i Lions 13 – Artemisia 10. Nos ta keda te aki.
