Skibi pa Pepi Sulvaran
Vurnon Anita eksperensia den medio kampo pa Selekshon di Kòrsou
WILLEMSTAD - Mr. Eldon 'Pepi' Sulvaran eksperto den futbòl lokal i internashonal. Pa hopi aña kaba Pepi Sulvaran ta analisá selekson di Kòrsou.Awe nos tin un analisis di e hungadó Vurnon Anita ku a risibí kontesta di FIFA ku e por hunga pa selekshon di Kòrsou despues ku anteriormente e la hunga ku selekshon di Hulanda. Vurnon San Benito Anita a nase dia 4 di aprel 1989 riba suela di Kòrsou. Kier men su lombrishi ta derá aki. Vurnon ta un bolante defensivo ku un karera impreshonante den ekiponan grandi manera Ajax, Newcastle United i Leeds United. Ke men esaki ta un hungadó ku hopi eksperensia den tantu Eredivisie komo Liga Premier Ingles. Na e momentu aki Vurnon ta militá den Eredivisie ku RKC di Waalwijk, kaminda e ta hasi un gran trabou komo bolante kontroladó, yudando su ekipo mantené su mes den divishon máksimo ulandes. Vurnon ta un eks internashonal ulandes, kende a militá na tres okashon na aña 2010 den ‘oranje’.
Anita tabata tantu den e pre selekshon ulandes pa bai Mundial di Afrika 2010 komo kampionato Europeo di 2012, pero a kai afó na lastu momentu. Vurnon ku ta dos be kampion ulandes ku Ajax (2010/2011 i 2011/2012) den su tempu di gloria tabata bal mas ku 8 mion euro na 2012. E ta pertenesé na e grupo di 100 di Ajax, esta hungadónan ku a militá 100 wega òf mas den e promé ekipo di e kapital di Hulanda. Finalmente e la yega e kantidat di 152 wega ku Ajax. Aktualmente e tin mas ku 200 wega hungá den Eredivisie ku Ajax, Willem II i RKC.
Vurnon no ta kualke futbolista i tin mas ku 100 wega den Liga Premier Ingles tambe den su pianan. Vurnon su veterania i seriedat sigur lo yuda nos selekshon. Vurnon ta kore hopi, kubri hopi kilometer pa wega i tin un bon pase den su pia. Su posishon faborito ta bolante kontroladó mei mei di tereno, kaminda e por interseptá hopi hugada. Ku Vurnon den selekshon, e rumannan Bacuna por haña espasio pa hunga mas ofensivo, lokual indudablemente lo duna nos un di e líneanan medio mas poderoso den region di CONCACAF.
Vurnon a forma parti di delaster un selekshon ulandes for di U-15 te ku selekshon grandi. Anita ku ta un ‘rapper’ tambe, ta lokual nan ta yama un ‘team player’ ku ta hasi hopi sakrifisio riba tereno di wega, pa otronan por funshoná mas mihó. Ku su veterania e por bira un lider i konsehero tambe pa e hungadónan mas hóben den selekshon.
Anita a kuminsá su karera di futbòl den CVV Willmestad, promé ku e la move na aña 1997 ku su famia pa Hulanda. El a debutá ku apénas 16 aña den e promé ekipo di Ajax. E bolante di naturalesa, por hunga komo defensor lateral na tur dos banda di tereno tambe si tin mester. Esei ke men ku e ta un hungadó multi funshonal. Esaki si ta un grandi pa nos, manera na ta bisa un ‘big fish’ di bèrdat. E kos di mas bunita ta, ku Vurnon tin hopi tempu ta pronunsiá su deseo i anhelo pa por hunga bala pa su isla natal. Porfin e soño ei a wòrdu kristalisá. No por tin niun duda, ku pa nos tambe Vurnon lo hunga ku entrega total manera e la bin ta hasi hinter su karera. Ku disiplina i spiritu di lucha. Pase pa gol tambe ta un di su spesialidatnan, hinka bala den buraku manera nos ta bisa den término futbolístiko. Ku Vurnon hasta nos por opta pa hunga ku un bolante di tres. Vurnon mei mei i e dos yunan di John Bacuna mas ofensivo den un triángulo ku punta patras. Vurnon komo ‘stòfzùiger’ dilanti di e dos defensanan sentral pa kibra hungada di e kontrinkante, paso esei ta su kos.
Ku Anita e selekshon ta gana na eksperensia, ku sigur nos lo tin mester si nos pasa e prome ronda i bai topa eks mundialistanan, kuminsando ku e ‘canaleros’ di Panamá. Vurnon su eksperensia amplio den weganan grandi dilanti hopi públiko lo bin nos di bon. Vurnon, Kòrsou kompletu ta yama bu bon bini den ‘Pantera Negra’ i nos ta spera mas hungadó di taya pa nos por krea nos mònster den CONCACAF rumbo pa e baki santu ku yama Qatar 2022. BON BINI RUMAN!!!
Pa: Peppie Sulvaran.
