Swift a selebrá 50 aña di eksistensia en grande
WILLEMSTAD- Djarason 23 di febrüari 2022 ekipo Swift a rekordá e echo ku 50 aña pasá e ekipo a keda fundá. Den oranan di atardi dirigente, hungadó i fanátikonan di Swift a akudí na Misa di Montanja pa gradisí Dios pa e forsa pa tene e ekipo 50 aña bibu i super eksitoso tantu padén komo pafó di tereno.
Un Sakrifisio di Misa bon bishitá, Misa práktikamente yen pa despues sigi pa un resepshon tremendo na Larry’s na Caracasbaaiweg. Grandinan di tur tempu di Swift tabata presente, entre otro Sergio Leon (presidente), Ramon Galmeyer, Frank Halley, Chucho Maduro, Wenny Jakoba, Eduard Rosalia, Bramford Hasham, Raffy Josepha, Jimmy Hollander i otronan huntu ku invitadonan speshal manera Pim Fangman, Chai Currie I otronan.
Hungadónan di awor i tur e último dékadanan tabata presente pa rekordá, disfrutá i selebrá. E fanátikonan di promé ora di Swift ku tur wikènt ta na parke i na e torneonan Kopa ABC&S na e islanan tabata presente. Sergio Leon a dirigí palabra i a pasa den historia di e ekipo for di komienso na 1972 te ku awor den 2022.
A rekordá un dje grandinan di tur tempu di Swift ku ta Ivar ‘Pipi’ Jesurun ku a fayesé na 2021. MC Bramford Hasham a pidi 1 minüt di silensio pa rekordá Pipi. Despues di spich di Sergio Leon presentenan por a pasa na bufet, saboriá un sokulento plato. Bar tabata habri for di yegada di e invitádonan te den oranan lat di anochi na Larry’s.
