Swift kampion kategoria modified i wikènt benidero final di 8 kategoria mas i skema ta kla
WILLEMSTAD – Swift a gana Terremoto ku skor di 17 pa 4 i bira kampion kategoria modified. Djasabra Swift a gana Estrellas Latina ku skor di 18-2. Teremoto a sorprendé Cicoza ganando 8-0 djasabra. Pa loke ta trata Liga 50 play-off di 6. Pitufos a gana Flamboyan 9-7, Jaws a gana Marlins perta 3-2. Marlins tabata ganá te den último inning 2-0. Den e último wega di e buelta di 6 tim di Liga 50, Jandoret a blankiá Sluggers ku skor di 5-0. Nos tin algun resultado di wikènt pasá.
Terremoto 8, Cicoza 0 (Modified)
Swift 18, Estrellas Latinas 2 (Modified)
Swift 17, Terremoto 4 (Final Modified)
Chonchies 8, Fireboys 6 (Soshal Open)
Bala Brothers 10, The New Radiator 9 (Soshal Open)
G-Warrios 16, Corendon 6 (Soshal Open)
Among Us 10, The Road Runners 4 (Soshal Open)
Among Us 8, Fire Boys 5 (Soshal Open)
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia. Weganan kayente den Amstel Bright Premier Cup den fin di siman na Van Engelen Ballpark. Tabatin solamente un final i esei tabata den e kategoria modified. E gran faborito Cicoza a kai afó despues ku nan a kai vensí ku skor di 8-0 kontra di Terremoto ku tremendo picheo di Jeandre ‘Biggy’ Pereira. Cicoza a presentá ku un tremendo tim ku hungadónan di Dòbel A manera Sherwenne Antersijn, Risandro Pastor, Juruengelo Thielman, Edinho Meyer, Roderick Bernadina, Urlich Snijders, Jonaikel Castro Arias, Rupert ‘Kabuya’ Ustasia ets a kai vensi. Ainda tabatin Germain Genaro i Remyson Bernadina. Cicoza a start ku Stanley Girigorie ku a tuma 7 kareda. E estelarisimo picher Frensel Meyers di Cicoza no tabata presente i parse ku ela move bèk pa Hulanda.
• * * * * *
Luis Veloz i Renagelo Beaumont tabatin un homerun pa Terremoto den e viktoria riba Cicoza dilanti un bon públiko na Van Engelen Ballpark djasabra. Sorpresa total pa Cicoza ku tabatin un line ku kasi 8 hungadó tòp di Beisbol Dòbel A. Den e gran final Swift a gana Terremoto ku skor di 17-4 den e kategoria modified. Pa loke ta trata Liga 60+, ekipo Pitufos a sorprendé Los Amigos ganando ku skor di 8-3. Pitufos tabatin rekòrt di 0 ganá i 2 pèrdí, pero nan a presentá ku vários hungadó ku no tabata presente e promé dos weganan, entre otro Naai Hooi, Luis Coffie, Nelo Juliana ets. Djasabra awor tin semi-final pa loke ta trata e kategoria 60+. Los Amigos ku a terminá number 1 lo topa ku Pitufos ku a sali number 4. Jaws ku a terminá number 2 lo topa ku Nos Tambe Por ku a sali number 3. E weganan aki ta 9.30 am i despues 1’or am.
• * * * * *
Preparashonnan ta sigi pa Torneo Hope i tambe Torneo di Liga 50 organisá pa Flamboyan. Parse ku Torneo Flamboyan/Tigers lo tuma lugá na Sam Bunting Ballpark na Brievengat. Moveshonan ta sigi pa e Seri den del Caribe (Golden Athlete Caribbean Championship) di 50 i 60 organisá pa Pitufos ku lo tuma lugá den Stadion Post 6 alrededor di e fechanan di Ascencion. Nos ta pendiente di mas informashon di organisadónan (Pitufos) i e embahador di e torneo ku ta Lionel Sambo.
• * * * * * * *
•
Nos tin un informashon di ekipo Petro Amigos ku ta bayendo Boneiru dia 26 aprel en konekshon ku Torneo di Dia di Rincon di entre otro 50+. E ekipo lo regresá Kòrsou dia 1 di mei. Tin un pasashi ku a bini liber pa e biahe di ekipo Petro. Esun ku ta interesá ta haña pasashi i estadia. Si akaso bo tin pasashi só i bo no tin estadia òf vise vèrsa por kombersá i hinka un kos den otro. Pa loke ta trata estadia tin 2 lugá na bon preis i ta preferá hungadó 49+. Si no tin moda di hasi fanátiko(nan) tambe ta bon bini. Por tuma kontakto ku Edison Sambo pa number di telefon 517-3438.
%20copy.jpg)
• * * * * *
Ban pa Dòbel A, nos tin informashon ku Stephan Vidal di Royal Scorpions a firma ku Wild Cats, Stephan Vidal ta un tremendo kècher i batiadó di poder ku ta un atkisishon balioso pa e ekipo di spònser pa Kenley Jansen i Guardian Group. Di un bon fuente nos a risibí e informashon aki. Ekipo Wild Cas lo tin un tremendo 1-2 ku Urlich Snijders i Vidal komo kècher. Tur dos ta kècha den gran forma i ta bati pa poder i tur dos ta miembro di selekshon di Kòrsou. Royal Scorpions a pèrdè un gran kècher i tin Dashenko Ricardo huntu ku Ildion Martina ku no tabata muchu aktivo i tabata hopi dediká na coaching den Beisbòl Little League. Ildion Martina a hunga solamente 7 wega i bati pa un average di .375. Stephan Vidal a hunga 23 wega dal 3 homerun empuhá 12 kareda i tabatin un average di .366 na bate.
• * * * * * *
Ban bèk pa Torneo Amstel Bright, ekipo Bombers mester a lucha pa gana Twister den semi-final di Liga 40 djadumingu . Bombers a gana Twister ku 13-11 den un wega kaminda Twister tabata dilanti ku skor di 3-2 a kai atras i bini bèk den e último inning pero a keda kòrtiku. Nos ta keda te aki pa awe, te mayan ku Poder di Dios.
