Swift kampion Kopa ABC&S na Korsou i Ban Serio kampion ABC&S 50+ na Sint Maarten
WILLEMSTAD – Swift ku viktoria di 7-2 riba Redskins di Aruba a bira kampion di Kopa ABC&S di e hóbennan na Kòrsou dilanti un públiko grandísimo na Van Engelen Ballpark. Alexander Rodriguez a bira MVP di e final ku un picheo hermétiko den relevo. Despues di wega tabatin entrega di premio di ekipo i individual.
Na Sint Maarten ekipo Ban Serio a gana Marlins ku skor di 14-11 den final pa bira kampion. Ban Serio a terminá e torneo invikto ganando 3 wega den e buelta regular, 1 wega den semi-final i e wega final. Jair Josepha a bira MVP di e wega final. Mesora despues di e final tabatin entrega di premio.
Rising Phoenix ta pasa pa final di Diamond Stars League
WILLEMSTAD – Rising Phoenix a gana Treasure ku skor di 7 pa 4 i klasifiká pa final di The Diamond Stars League. E weganan desisivo di e play-off page system a tuma lugá djabièrnè 30 di mei na Sam Bunting Ballpark dilanti un públiko grandísimo. Rising Phoenix lo bai warda den final pendiente pa e wega di semi-final entre di Nos Goso i Treasure. Nos Goso a gana The Fighters ku skor 9-3 den e play-off entre 3 i 4. E promé wega di semi-final lo ta djabièrnè awor na Sam Bunting Ballpark.
Rising Phoenix 7, Treasure 4
Rising Phoenix a dal 7 hit i hasi 2 eror. Comenencia tabata e picher ganadó i Judinay Wederfoort a bati di 3-2. Treasure a konektá 7 hit i kometé 6 eror. Suyenne Soto -Apostel a pèrdè. Jenny Kinburn i Solange Soliana a bati di 3-2. Jenny Kinburn i Solange Soleana a konektá un homerun.
Nos Goso 9, The Fighters 3
Nos Goso a konektá 11 hit i hasi 2 eror. Carlientje Cleopa tabata e picher ganadó. Miriela Carlo a bati di 3-3. Emily Jonis a bati un homerun. The Fighters a bati 5 hit i kometé 4 eror. Maureen de Windt tabata e picher pèrdèdó .Brunette Robert a bati di 2-1. Batiadónan Adelina, Francisca, Kastaneer i Hanst a bati di 3-1.
MAS INFORMASHON DI SÒFTBÒL
Fanátikonan di , bondia. Tremendo fin di siman tantu pa esnan na Kòrsou komo nos amigunan ku tabata na Sint Maarten. Kopanan ABC&S ta keda popular i lástima ku dirigente di otro ramonan di deporte na Kòrsou no por organisá enkuentronan entre e islanan ku regularidat i tur aña. Kopa ABC&S a start na aña 1984 i a keda 35 aña stret te ku 2019 pa despues na 2020 tabata Covid i e ABC&S a keda suspendé pa 3 aña sigí. Na 2023 a sigi ku Kopa ABC&S na Kòrsou i na 2024 na Sint Maarten. Na Kòrsou tur ekipo di Kòrsou a klasifiká den e promé play-off di 8 ekipo i na Sint Maarten e dos ekiponan ku a representá Kòrsou a klasifiká pa semi-final.
* * * * *
Liga 50 i Liga 60 lo reanudá despues di e kopanan ABC&S NA Van Engelen Ballpark i Frank Curiel Ballpark respektivamente. Djasabra ta Liga 50 na Van Engelen Ballpark ku 4 wega i djadumingu tin 3 wega na Frank Curiel Ballpark. Skema di Liga 50 wikènt benidero ta 10.00 Catpower/Raiders – Artemisia, 12.00 Pitufos – Jaws, 14.00 Flamboyan – Ban Serio, 16.00 Marlins – Lions. Baranka tin barwacht i ekipo Sluggers ta liber. Ta trata di wega number 5 di vários ekipo i algun ekipo tin 4 wega hungá. Standing di Liga 50 promé ku e break tabata Catpower/Raiders 4-0, Ban Serio 3-0, Jaws 2-1, Marlins 2-2, Flamboyan Gamers 2-2, Lions 1-1, Baranka Sharks 1-2, Pitufos 1-2, Artemisia 0-3, Sluggers 0-3.
* * * * *
Pa loke ta Little League, preparashonnan ta sigi tantu den Liga Pabou komo Liga Pariba pa e gran kampionato di Karibe ku lo tuma lugá di 6 pa 13 di yüli den Stadion Post 6 aki na Kòrsou. Ganadó di e kampionato aki lo representá Karibe na Little League World Series na Williamsport di 13 pa 24 di ougùstùs. Naturalmetne ta sono di tur mucha ku ta hunga Little League pa yega Williamsport. Na momentu ku bo yega so einan bo nòmber ta keda grabá semper den historia. Na momentu ku e hungado bai World Series den e otro kategorianan esta, intermediate, Junior i Senior no ta kompará ku e Mundial di Little League na WIlliamsport ku ta e crème de la crème di Beisbòl di Mucha. Senior League Karibe lo ta den Tio Daou Ballpark di 22 pa 29 yüni. Mundial lo ta di 26 di yüli pa 2 di ougùstùs na Easley South Carolina.
* * * * *
Ban bèk pa Kopanan ABC&S aki na Kòrsou i na Sint Maarten. Ekiponan ku a klasifiká den e promé 8-nan di e ABC&S tabata Swift, Cicoza, Terremoto, Happy Brothers (Aruba), Redskins (Aruba), Super Stars (Sxm), Sluggers (Sxm) i The Dreamers di Boneiru. Swift a gana Sluggers di Sint Maarten 15-4, Cicoza a derotá Terremoto 5-4, Redskins a dal Super Stars di Sint Maarten 11-3 i Happy Brothers a zona The Dreamers 21-0. Ekiponan ku a topa otro den semi-final ta Swift kontra Happy Brothers i Cicoza kontra di Redskins. E ganadónan Swift i Redskins a topa otro den final.
* * * * *
Na Boneiru e ekiponan di Kòrsou Marlins i Ban Serio a klasifiká pa semi-final. E ekiponan di Kòrsou a topa ku ekiponan di Sint Maarten, miéntras ekiponan di Boneiru, Aruba i Sint Eustatius a kai afó. Djadumingu pa 11’or Ban Serio a topa ku Lions i despues pa 12.45 Marlins a enfrentá ekipo Tigers. Marlins a klasifiká pa semi-final ku rèkòrt di 2-1 i Ban Serio a klasifiká ku 3-0. Ban Serio a gana Marlins 14-11 i bira kampion.
* * * * *
Weganan di Liga 60 ta sigi na Frank Curiel Ballpark djadumingu awor 8 di yüni. 11.00 ta Lions – Sluggers, 13.00 ta PItufos – Los Amigos pa 15.00 Nos Tambe Por vs Curacao Super Stars. Jaws tin barwacht i Nos Power ta liber. Swift a bira kampion di ABC&S na Van Engelen Ballpark ganando di Redskins den final ku skor di 7 pa 2. Na Sint Maarten ekipo Ban Serio a bolbe bira kampion di Kopa ABC&S 50+ ganando di Marlins 14-11 den final aya na Phililpsburg. Den kurso di siman nos tin mas detaye ku portrèt di entrega di premio. Nos ta keda te aki pa awe, ta mayan ku Poder di Dios.
