The Diamond Stars League kla pa start i mas informashon di Sòftbòl i Beisbòl
WILLEMSTAD- Djabièrnè 21di yanüari 2022, tabatin kuementu di lòt pa start ku The Diamond Stars League. E kuementu di lòt a tuma lugá den oranan di atardi na Sam Bunting Ballpark kaminda e kampionato lo tuma lugá. Ekiponan di Sòftbòl Femenino Veterano lo partisipá na e kampionato manera nos a anunsiá djabièrnè ultimo.
E 8 ekiponan ku lo partisipá a kue lòt segun e sigiente numerashon. 1 Mas Goso, 2, The Fighters, 3 Rising Trotters, 4 Lady G, 5 Nos Goso, 6 Warriors, 7 Eureka i 8 Treasure. E organisadónan ta pendiente di Gobièrnu pa start e kampionato dia 4 di febrüari 2022.
INFORMASHON DI BEISBOL I SOFTBOL
Lesadónan di Deporte Korsou, bon dia. Nos tei atrobe ku informashon di Sòftbòl Slowpitch i Beisbòl. Nos tin informashon di Beisbòl Dobel A i tambe di Sòftbòl Slowpitch. Den e asuntu di traspasonan di Beisbòl Dòbel A kosnan ta keda kayente e dianan aki. Den e promé alineanan di e kolumna nos tin algún desaroyonan pa loke ta trata maneho den Beisbòl Dòbel A. Parse ku David Kirindongo no ta keda mas komo manager di Groot Kwartier Stars debí na tempu ku ta skars. Dave ta un super estrea den Beisbòl Veterano i ta bai dediká full na esaki huntu ku su trabou. Groot Kwartier lo buska un otro manager i den dianan benidero esaki lo ta konosí.
* * * * *
Ghionelo Jansen, manager di ekipo Firebirds di Beisbòl Dòbel A a tuma time out pa por lo ménos un aña. Ku otro palabra Ghionelo lo no bai manehá den temporada 2022. Firebirds lo mester buska un otro manager pa kampionato 2022. Picher klave di Firebirds Shair Lacrus a pasa pa ekipo Santa Rosa Indians den Beisbòl Dòbel A. Ruman di Shair Lacrus, Shedion Lacrus ku tabata coach tambe a bandoná e ekipo Firebirds. E staf di picheo di Santa Rosa ta un kos serio ku atkisishon di Shair Lacrus. By the way, fuentenan fededigno a mira Mompy van Gurp huntu ku Ildion Martina den wikènt na e e establesimentu nobo ‘E Faborito’ na Palu Blanku. Nan di ta ‘Figo Figo’ Royal Scorpions.
* * * * *
E siman aki pa ta mas eksakto, tur hende den deporte ta pendiente di update di Gobièrnu pa loke ta trata medidanan despues di 20 dia di time out. Organisashon Rising Trotters ya a anunsiá kampionato The Diamond Stars League ku ta start 4 di febrüari. Djabièrnè último tabatin kuementu di lòt. E torneo lo dura 3 luna i lo tuma lugá riba Sam Bunting Ballpark na Brievengat. Un dje grandinan di Sòftbòl Femenino Veterano ku ta ekipo Un Kara lo no partisipá den e kampionato aki. Ekipo Un Kara ta konsentrá riba Liga Di Nos Tur so i torneonan internashonal. Un Kara ta un ekipo eksitoso ku tin 3 título di Liga di Nos Tur den 4 aña di eksistensia di e liga.
* * * * *
Algun siman pasá nos a papia ku Arno Kastaneer ku ta e promé presidente di Liga di Nos Tur. Arno ta orguyoso di tabata un dje pioneronan di e liga, ku ta esun mas eksitoso di tur liga ku tin na e momentunan aki. Dikon mas eksitoso, debí ku kasi tur wikènt tin gran kantidat di fanátiko i hopi importante, tur ekipo a risibí 2000 florin na reseta e kampionato ku a terminá. Segun nos 2000 florin na reseta pa tur ekipo den un kampionato di Slowpitch ta un rèkòrt. Temporada pasá Wimbert Hato tabata presidente di Liga Di Nos Tur.
* * * * *
Ban un ratu pa Sòftbòl Liga 50. Ekipo Pitufos no ta para ketu den 50 i den 60+ di Sòftbòl. Den 50 + PItufos ta tras di un gran outfielder ku poder i ku semper a demonstrá poder. E kambio aki lo sorprendé tur esnan di liga. Pitufos parse ta trata di haña un tòp kècher tambe. Mi fuente no por a duna mi mas detaye. Asta den maneho tin un kambio pendiente. Pitufos lo bai tur ku tin pa bira kampion di 50+. Den 60+ tambe Pitufos lo sali bon pa bai entre e 4-nan. Nos no ta kere ku Pitufos lo bira kampion den e promé aña den 60+. Otro informashon ta ku un dje mihó pichernan di tur tempu lo por bin tira tòg den 50+ atrobe. E picher ei parse di ta Wim Felicia. Nos lo bai tuma kontakto kuné den e dianan benidero.
* * * * *
Bèk pa Beisbòl Dòbel A, ekipo Marchena Braves tambe a sigi move i lo bai tin algún hungadó ku ta firma den e dianan benidero. Nan lo bai firma un picher di kategoría sigur. Organisashon Marchena di Beisbòl Little League ántes tabata mará na Blue Hawks i despues Marchena Braves. E asuntu ku hungadó ta keda ku e organisashon ku e tabata for di Little League no tei mas. E hungadó por bai hunga den e organisashon ku e ké den Hubenil. Si e hungadó hunga den Hubenil ku un ekipo e por bai kaminda e ké ora ta trata Dòbel A. E prospektonan den Marchena semper a bai resultá den otro organisashon despues tòg. Marchena tin un staf fuerte ku Eldrion Regina komo General Manager, Gilmar Velder komo manager i Quincy Virginia komo coach.
