Torneo Hope a start djasabra último na Van Engelen Ballpark i ta sigi e wikènt aki
Willemstad- Djasabra 22 di mart tabatin apertura ofishal di Torneo Hope na van Engelen Ballpark. Organisashonnan a manda 2 representante riba tereno i a tende spichnan pa despues disfrutá di músika bibu di e kombinashon di Ike Jesurrun i Jesus Martinez. E torneo lo sigi tur wikènt i lo terminá medio mei. Nos tin varios resultado i pòtrèt.
RESULTADONAN:
Djasabra 23 di mart (Soshal Maskulino)
Corendon/GGZ 13, OMNI/Lab De Med 0;
FDDK 12, Renaisance 1;
Brandweer 8, KEYFIN 2;
BDC.ENNIA 12, Cpost/anper/Lea.. 1;
CITCO 10, ADC/CMC 5;
Belastingdienst 14, MCB 6;
CRU 6, MCB 4;
Polis 4, Aqualectra 0;
Djadumingu 24 di mart
Jansen De Jongh 6, Blue Spark /Reliabi .. 5;
SBAB 6, Onderwijs 4.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis siman. Torneo Hope a start den gran forma djasabra último ku bon fanátiko na Van Engelen Ballpark tantu riba djasabra komo djadumingu. Djasabra tabatin animashon musikal bibu di Ike Jessurun i Jesus Martinez, dos grandi di farándula lokal. Miéntras foi mainta tempran DJ Heineken (DJ Melaza Oneil) tabata tei pa animá esnan presente i ta animá e públiko tambe narando algun wega. Foi djasabra mainta weganan di Liga 40 a start kaminda ekipo CRU a logra gana di MCB ku skor di 6 pa 4 pa loke ta trata Liga 40+. Den e sigiente wega Polis ku picheo di Lionel ‘Eksperensia’ Privania a gana Aqualectra ku skor di 4-0. Aqualectra a presentá bon ku basta hungadó di eksperensia bou di maneho di Raimy Pastor.
* * * * *
Aqualectra tabatin hungadónan manera Joseph Everon, Rolling Eustatius, Kòra Sambo, Luigino Domacasse, Sandy Reinita, Remy Janga, Raimy Pastor, Jurgen Lichtenberg, Myson Cathalina, ets. Penshonadó Pastor i Jurgen Lichtenberg tabata den akshon i Polis tambe a presentá ku penshonadó(nan) konosí. Weganan di 40+ ta sigi djasabra awor den oranan tempran di mainta na Van Engelen Ballpark. Den 40+ tin 6 tim, KPC, CRU, SDKK/Capriles Damen, Flow, MCB i Aqualectra.
* * * * *
Djabièrnè tabatin reunion di Beisbòl Veterano na Landhuis Salina Ariba kaminda tabatin partisipashon di kasi tur ekipo. E aña aki lo tin 11 ekipo den Beisbòl Veterano. Ekiponan Vosama i Marchena a kai afó pa 2024. A bini solamente un ekipo aserka ku ta Flamingo, ekipo The Friends a kai afó na último ora. Ekipo The Brothers a bira Broncos i tabata representá na reunion . A bini un proposishon pa laga hungadónan ku tin 39 aña hunga pendiente pa kumpli 40 aña den 2024 hunga den kampionato. Ekiponan a bari e proposishon for di mesa i tur hungadó mester kumpli 40 aña pa por kuminsá hunga.
* * * * *
Mas informashon di Beisbòl Veterano ta ku ekiponan di 50+ lo bira 6 den 2024. Santa Rosa Memories lo tin un ekipo den 50+ i tin un ekipo mas den tapara. E ekipo aki ta dirigí pa Gladwin Lacrus ku a stòp ku Sòftbòl 50+ den e ekipo Sluggers i lo tin su ekipo den 50+. Lo tin vários hungadó di Sluggers den e ekipo aki. Un tempu Gladwin Lacrus tabata den e ekipo Eagle i algun ekipo mas den Beisbòl Veterano 40+. Kampionato di Beisbòl Veterano tantu di 40 komo 50 ta programá pa terminá medio novèmber. Liga 40 di Beisbòl Veterano lo start fin di aprel. E aña aki tin kampionato Reino na Kòrsou. Nos tin basta pòtrèt di apertura di Torneo Hope. Nos ta keda te aki pa awe i te mayan ku Poder di Dios.
