Torneo Hope ta sigi djabièrnè djasabra i djadumingu
Aqualectra ta derotá ORCO/SSC den Torneo Hope
WILLEMSTAD- Aqualectra a mustra sólido djasabra último den Torneo Hope 2024 na Van Engelen Ballpark. Aqualectra a gana e kombinashon ORCO Bank, Stichting Studiefinanciering i Garashi Balochi ku skor di 14-2 den sekshon Soshal Maskulino Corporate. Ta di dos viktoria sigí di Aqualectra ku tin varios hungadó nobo den nan filannan. Soshal Maskulino Corporate tin mas ekipo ku tur otro kategoría, un total di 32 ekipo repartí den 8 pul. Ekiponan di Polis a gana tantu den Soshal Maskulino 40+ komo Soshal Maskulino. Nos tin resultado i hopi pòtrèt.
SOSHAL CORPORATE
Polis 9, Flow/Selikor 6 (40+);
Aqualectra 14, ORCO/SSC Balochi 2;
MCB 15, CRU 0;
FDDK 17, ADC/CMC 7;
Coca Cola/ Cargo 7, Jansen de Jongh 4;
KPC 14, Kooyman/Advent 1.
SOSHAL OPEN
Chonchies 13, ETR/Quality Cooling 12;
Bala Brothers 21, G Warriors 13;
Bala Brothers 15, Quick 60 8.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonochi. Hopi aktividat wikènt pasá den kuadro di Torneo Hope i naturalmente Marcha di Seú ku a bira un éksito rotundo atrobe. Djabièrnè, djasabra i djadumingu weganan ta sigi. Nos tin algun resultado di Torneo Hope di djasabra i den kurso di dianan nos tin mas detaye. Djaweps nos tabata na entrega di unifòrm di e grupo di umpire i skorer The Greatest. E entrega di unifòrm a tuma lugá na kas di Gino Valeriaan aya den Blue Bay. Vários miembro di e grupo aki tabata presente. E tim aki tabata tremendo ku un tempu tabata biaha pa destinashonnan tremendo manera entre otro Miami, Brasil, Colombia, ets.
* * * * *
Bon públiko tantu riba djasabra komo djadumingu na Van Engelen Ballpark. Nos a wak algun wega kayente, entre otro wega entre Polis 40+ i ekipo Flow kombiná ku Selikor komo ekipo di kas tabatin kareda di empate na home (na bate), pero finalmente a bin pèrdè ku skor di 9-6. Dave Kirindongo tabata den gran forma djasabra i a konektá 5 homerun, dos pa Cru i e otro 3-nan pa ekipo Bala Brothers. Dave Kirindongo, un dje bonnan di Beisbòl i Sòftbòl lokal ku tempu e tabatin 16 aña a firma ku e organisashon di New York Yankees.
* * * * *
Aqualectra ku ta fuertísimo a gana di SSC/Orcobank ku skor di 14-2. Mester a warda e hungadónan di Orco Bank ku mester a lucha masha hopi mes pa gana di Keyfin i sali di einan mes pa bin hunga riba tereno B kontra Aqualectra i topa ku un tim bon hinká den otro dirigí pa Raimy Pastor. Aqualectra tin vários hungadónan nobo, entre otro Gerson Adamus ku ta un hungadónan ku a bira kampion Mundial Little League na 2004 huntu ku hungadónan manera Jonathan Schoop, Jurickson Profar, Sorick Liberia, Christopher Garia, ets.
%20copy.jpg)
* * * * *
Djasabra 6 di aprel torneo dediká na Kid Boca Chica, Torneo 60+ Sòftbòl ta start na Frank Curiel Ballpark. 8 ekipo di 60+ ta partisipá na e torneo i e skema ta riba merkado. Despues di e torneo menshoná lo sigi ku torneo organisá pa Lions. Ekipo Sluggers tin un torneo riba Dia di Bandera aki na Kòrsou tambe den kategoría 60+. Ta trata di torneo ku ántes Curacao Super Stars tabata organisá pa mas ku 10 aña. Great ku e torneo por kontinuá. E aña aki tabatin torneo Dia di Himno i Bandera na Aruba alrededor di 18 di mart i nos no a tende masha di e torneo aki. Entre otro ku tabatin partisipashon di ekiponan di Kòrsou manera último añanan.
* * * * *
Djadumingu riba Dia di Pasku e Resurekshon tabatin un tremendo fiesta organisá pa Ban Serio. Era i Argenis Huerta a animá den gran forma i ekiponan di Liga 50, di Slowpitch en general i di Beisbòl tabata tei na gran kantidat pa yuda Ban Serio den e fundraising. Ban Serio i Marlins lo ta na Aruba den luna di mei pa partisipá den Kopa ABC 50+. Ekipo Ban Serio ta kampion Kopa ABC 2018,2019 i 2023. Añanan 2020, 2021 i 2022 no tabatin Kopa ABC. Na 2023 e final 50+ entre Ban Serio i Marlins na Boneiru.
* * * * *
E wikènt aki liganan lo kontinuá normal, entre otro Diamond All Stars League i Liga Streanan di Ayera, e dos liganan veterano femenino. Hopi bon wega i bon ambiente den e dos liganan ei. Ta pendiente pa Liga di Nos Tur ku tin un kampion nobo ku ta ekipo Sin Stress, despues ku ekipo Un Kara tabata komandá e liga pa último añanan. Kaminda tin un kampion nobo e kampionato otro ta bira super interesante.
* * * * *
Djaweps último MLB a start ofishalmente na USA. Tabatin seri pafó di USA (Seoul Korea) promé ku djaweps último, pero awor a start na USA ku 4 Yu di Kòrsou i un Arubiano den akshon. Nos tin Kenley Jansen i Cedanne Rafaela ku Boston, Ozzie Albies ku Atlanta i Jurickson Profar ku San Diego Padres. E Rubiano Xander Bogaerts tambe ta ku San Diego Padres. Hopi kos di kombersá i komentá den e próksimo 6 lunannan. Little League ta drenta lunanan kulminante den aprel ku firmamentu di kontrakt ku RBC Royal Bank i play-off di Senior, Junior i mas den final di lugánan play-off Little i Minor. Nos ta keda te aki pa awe. Te mayan ku Poder di Dios.
