Torneo Kopa Rotativo Kid Boca Chica ta start djasabra i The New Radiator/Brandweer kampion na Boneiru

Torneo Kopa Rotativo Kid Boca Chica ta start djasabra i The New Radiator/Brandweer kampion na Boneiru i Torneo BAM BAM Tech

WILLEMSTAD- Djasabra, 6 di aprel 2024, ta start ku e di 3 torneo organisá pa Jaws, Torneo “Kid Boca Chica’. Jaws a manda un komunikado pa nos. “E aña aki nos organisashon S.B.C. JAWS 60+ ta organisá e di 3 edishon di e torneo di sòftbòl “Kopa Rotativo Ivan Schoobaar”.

E torneo aki ta keda organisá anualmente pa por duna honor na bida na e fundadó di e diferente ekiponan di sòftbòl bou di nòmber di Jaws ku ta praktiká e ramo di deporte aki den kuater kategoria di edat. Pues sr. Ivan Schoobaar a fundá ekiponan bou di e nòmber di JAWS ku ta praktiká sòfbòl den liganan di kategoria di hoben adulto, liga 40 plus, liga 50 plus i liga 60 plus.

‍

Meta di e torneo aki ta tambe pa duna oportunidat na ekiponan di sòftbòl Liga 60+ pa “warm-up” promé ku kampionato kuminsá i stimulá moveshon i kompetensia sano entre e sòftbòlistanan di mayor edat i pa estrechá e lasonan di amistat deportivo.  E torneo lo tuma lugá di diannan 6,7,13 i 14 aprel 2024 na Frank Curiel Balpark. Pa mas informashon por tuma kontakto ku Wimbert Hato.

SKEMA PROMÉ WIKÈNT
Djasabra 6 di aprel
11.00 Jaws – Sluggers
13.00 Los Amigos – Nos Power
15.00 Nos Tambe Por – Lions
Djadumingu 7 di aprel
11.00 Lions – Jaws
13.00 Selekshon A70+ Selekshon B 70+
15.00 Sluggers – Nos Tambe Por

The New Radiator/Brandweer kampion Torneo SKAK+ na Boneiru

KRALENDIJK – E kombinashon di The New Radiator i Brandweer a gana Rocargo Bonaire den final ku skor di 11 pa 3 pa bira kampion Torneo SKAK+  Boneiru. WEB Boneiru a organisá e Torneo SKAK+ 2024.

SKAK ta nifiká Sòftbòl Komersial Aruba i Kòrsou, pero debí ku último añanan Sint Maarten i Boneiru tambe ta partisipá, e nòmber a bira SKAK +. Ekipo The New Radiator/ Brandweer a gana Corendon den semi-final i Rocargo a gana di WEB NV den semi-final.

Un bon públiko di komienso te final na Jossy Boehoudt Ballpark na Boneiru. Torneo SKAK+ lo sigi na Kòrsou den luna di yüli.  Kampion picher i MVP a bai pa Quinten Willems di The New Radiator/Brandweer. Ludson Roberto di Brandweer tabata lider di homerun.

‍

BAM BAM FAIRPLAY TOURNAMENT

‍

Fair Play Curaçao Tournament 2024 ta den full swing. Boso ta kordialmente invita pa asisti na nos torneo ku partisipashon di 36 ekipo.
Mas ku 500 pelotero hoben ku no ta den selekshon a haña e oportunidad pa keda move kompetitivamente.

Deporte Kòrsou tin  e skema i boso ta invita pa drop in na kualke momento.

Ta trata di tee-ball, pre-minor,  minor, little ku por hunga ku 3x pelotero nan di 13 aña.

‍

‍