Wild Cats luchando pa haña Ruderly Manuel den 2022 i mas informashon di Beisbòl i Sòftbòl
WILLEMSTAD- Tin rumornan fuerte den kaya ku Ruderly Manuel lo hunga den Wild Cats den 2022. Un tempu un dje mihó pichernan di Beisbòl Dòbel A. Ela hunga temporada 2019, 2020 i 2021 den Royal Scorpions despues ku e tabatin hopi aña den Wild Cats. Na promé instante tabata parse ku Ruderly ta liber liber despues di e 3 temporadanan ku Royal Scorpions, i un ora pa otro Wild Cats lo anunsiá firma ofishalmente di Ruderly Manuel. Pero parse ku negosashonnan ta mal pega. Otro picher di Royal Scopions ku lo move pa Wild Cats ta Geriyon Jakob. E picher Jakob tambe a move di Wild Cats pa Royal Sorpions na aña 2019. Geriyon Jakob no tabatin gran aktuashon den 2021 ku Royal Scorpions, miéntras Ruderly Manuel tabata gran parti di e temporada leshoná. E no a tira bon den su promé wega den play-off semi-final, pero despues ela bini bèk i tira bon kontra Santa Rosa den wega number 3 di e semi-final. Den final kontra Wild Cats tambe Manuel no tabatin su mihó dia. Temporada regular e tabatin un tremendo ERA di 0.84, pero den play-off no a bai bon. Jakob no a mira aktuashon den play-off, ela firma ku Wild Cats djaluna 3 di yanüari.
Ruderly Manuel bèk den unifòrm di Wild Cats.
Fanátikonan di Deporte Korsou bon tardi. Nos ta duru den yanüari aki ku informashon di Beisbòl i Sòftbòl. Ekiponan ta ketu ainda den nan moveshonnan i práktikamente niun ekipo no a kuminsá train ainda. Hopi torneo pendiente pa start, pero dirigentenan ta pendiente kon ta bai para ku e asuntu di Omicron (Covid-19) ets den e dianan benidero. Ta despues di dia 16 nos lo wak konta para ku eventonan deportivo di ekipo. Minister presidente a dekreta time out. Na 2020 na e momentunan aki ya Torneo FABB a ranka sali na Suvek Ballpark ku despues a bira Van Engelen Ballpark.
* * * * *
Torneo Survivors, Torneo Amstel Bright a drei den 2020 i den 2021 e dos torneonan menshoná, tampoko Torneo FABB no a tuma lugá. Ban spera ku e lucha kontra Covid-19 lo terminá den 2022 pa asina nos lo bai riba un normal bèk. Outoridatnan di Gobièrnu ta pidi pa bai bakuná i mas hende bakuná mas lihe por bringa e Covid-19. Naturalmente tin hendenan ku tin otro opinion i nos ta laga pa kada ken tuma nan desishon.
* * * * *
Nos a chèk ku práktikamente tur dirigente di Beisbòl Dòbel A kon ta pará ku nan ekipo den 2022. Marchena Braves a kontestá i a bisa nos keda pendiente i nan lo laga nan General Manager tuma kontakto ku nos. General Manager nobo di Marchena Braves ta e popular Eldrion Regina alias Fokus ku ta èks pelotero. Eldrion a bira kampion Mundial ku selekshon di Senior League na 2002. By the way, e aña aki lo kumpli 20 aña ku e selekshon menshoná a bira kampion na Bangor, Maine. Di e selekshon ei dos hungadó a hunga den MLB.
* * * * *
E dos hungadónan ei ta Jair Jurrjens, Sharlon Schoop i Shai Martis. Shai Martis a bolbe bai Mundial den e siguiente aña ku hungadónan manera entre otro Kenley Jansen, Levi Carolus, Carol Servania, Shurendi Mariano, Rashid Mauricio, Arthur Bonevacia, Reyno Cijntje ets. Di e selekshon di 2003 ta Kenley Jansen a yega MLB. Despues Kòrsou a bira kampion Mundial den LIttle League na 3 okashon mas. 2004 Little, 2008 Junior i 2016 den Senior atrobe. Kòrsou tin e kantidat rekòrt di 6 Big Leaguer den MLB Baseball, rekòrt pa loke ta averahe di hungadó den MLB pa loke ta trata kantidat di habitante. Beisbòl sin duda ta e deporte mas popular na Kòrsou.
* * * * *
Bispu di aña nos a topa ku Curt Smith den Bam Bam Tech Sport Zone. Curt Smith ku tambe a bira kampion na 2002 ku selekshon Senior League i despues bai atrobe na 2003. Curt Smith a bisa nos ku ela retirá ofishalmente i tin un negoshi di artíkulonan di deporte, entre otro trahamentu di wante. Curt Smith tabata hopi serka di Big League i a hunga te nivel AA te ku aña 2010 mas o ménos. Ela bati riba .300 na varios okashon den Liga Menor. Den Independent League Curt Smith tabata kima liga. Hopi importante ta ku Curt Smith tin título di Master (Universidat) i ta trahando trankil di 8 pa 5 i despues di trabou i ta bai traha pa su mes den negoshi.
* * * * *
Nos a interkambiá mensahe ku algún lider di ekiponan di Beisbòl Veterano, entre otro Denley Marten di Bulldogs i Luigi Yanez di Isla. Denley Marten a bisa ku e tin hopi hungadó hóben e aña aki atrobe i ta bai duru pa play-off. Ela atmití ku algún hungadó ta bai i otro ta bini manera ta e kaso tur aña. Luigi Yanez di Isla Crackers a bisa nos ku tin un Big Fish na kaminda, pero na su debido tempu tambe e lo informá di e firmamentu i manda pòtrèt.
* * * * *
Ekiponan di Beisbòl Dòbel A a sigi move i ekipo Wild Cats ta duru riba nan estelar un tempu ku ta Ruderly Manuel. Parse ku un dje Jakobnan tambe a firma pa bini Wild Cats bèk. Marchena Braves ta moviendo den silensio i hopi ekipo ta tirando liña pisá den Royal Scorpions su awa, debí ku nan tin hopi hungadó agente liber. Dia 31 di desèmber nos a menshoná ku Loko Lucas i Terrence Goeloe lo move pa Santa Rosa. Nos ta keda te aki pa awe.
