Wild Cats ta dal Santa Maria 11-6 i pika dilanti 2-1 den semifinal
Willemstad - Wild Cats ku bon bateo di Yurendell De Caster i Rojean Cleofa i picheo kombiná di tres picher ta gana di Santa Maria ku skor 11-6. Wild Cats ku e viktoria ta bai dilanti 2-1 den e seri semifinal. Ya Wild Cats a anunsiá Jair Jurrjens pa wega number 4 di e seri. E wega lo tuma luga djarason den Stadion Johnny Vrutaal. Djamars anochi ekipo Santa Rosa dilanti 2-1 lo topa ku Royal Scorpions. Ekipo Royal Scorpions ta lomba kontra muraya den e seri mihó di 5. Sidney Antonia picher habrido di Wild Cats ku a tira 5 inning i un tèrsio a resultá e picher ganadó. Ela tuma 4 kareda, riba 9 hit, 3 ponche i 3 base por bola. E hóben di Hubenil, Joharvy Martinus di apenas 16 aña a tira tremendo den relevo. Ela picha 2 inning i dos tèrsio ku apénas un infield hit i 0 kareda. Santa Maria a usa 3 picher, Ruendy Carolina ku a habri i tira 2.2 inning, Shurensley Daantji a tira solamente 1 tersio di inning i Maverich Lourens a tira 6 inning i dominá Wild Cats tumando 2 kareda pero ya e daño tabata hasi. Wild Cats tabatin dos homerun den e wega unu di Daytan Biegel i otro di Hendrik Clementina. Santa Maria a dal dos homerun, Sherman Lacrus i Alexander Rodriguez.
NUMERITONAN
Wild Cats a skor na 11 okashon, bati 13 hit i kometé 1 eror. Sidney Antonia tabata e picher ganadó. Yurendell Decaster a bati di 5-4 i Rojean Cleofa di 4-3 ku 4 RBI. Daytan Biegel i Hendrik Clementina a dal un homerun.
Santa Maria Pirates a nota 6 kareda, dal 12 hit i hasi 4 eror. Ruendy Carolina tabata e picher pèrdèdó. Sherman Lacrus a bati di 4-3. Alexander Rodriguez i Jonathan Martijn a bati di 5-2. Sherman Lacrus i Alexander Rodriguez a dal un homerun.
