Wild Cats ta derotá Santa Maria 11 pa 8 den play-off semi-final
WILLEMSTAD – Wild Cats a empatá e serie semi-final kontra di Santa Maria djasabra 19 di sèptèmber den Stadion Johnny Vrutaal. Wild Cats a usa 5 picher pa derotá Santa Maria ku skor di 11-8 pa empatá e seri ariba menshoná na unu. Un wega karga ku emoshon ku a terminá despues di 8 inning (7 inning i mei) debí na time limit den kuadro di medidanan di Covid-19. Weganan mester terminá pa 10’or pa tur hende haña espasio pa yega kas promé ku 11’or (toke di keda). E picher Risandro Pastor a habri pa Wild Cats, tira 5 inning, tuma 5 kareda pa bai ku e viktoria. 3 di e 5 karedanan ku Pastor a tuma tabata limpi. Sidney Antonia, Klevert Martina, Jediah Kwidama i Ruwensley Bonifacio tambe a picha pa Wild Cats. Wild Cats a konektá 4 homerun. Reangelo Beaumont, Daytan Biegel, Hendrik Clementina i Randolph Kirindongo a dal homerun pa Wild Cats. Pa Santa Maria a habri Arlison Rodriguez, ku a tira 1 inning i tuma 5 kareda limpi. Claycandy Hariquez, Evenon Martis i Lousandry Henriette a picha pa Santa Maria. Henriette a tira tremendo, 4 inning, 2 hit i 0 kareda permití.
Beisbòl ta sigi djadumingu, 19 di sèptèmber ku wega number 3 di play-off semi-final entre Santa Rosa Indians i Royal Scorpions. E wega lo tuma lugá den Tio Daou Ballpark.
NUMERITONAN
Wild Cats a skor na 11 okashon, bati 12 hit i kometé 3 eror. Risandor Pastor tabata e picher ganadó. Terrence Josephina a bati di 3-2. Beaumont, Biegel, Clementina i Kirindongo a dal homerun.
Santa Maria Pirates a nota 8 kareda, bati 9 hit i hunga sin eror. Arlison Rodriguez a resultá e picher pèrdèdó. Alexander Rodriguez a bati di 3-2.
