10 miembro nobo pa Salon di Fama di FDOK
WILLEMSTAD.- Salon di Fama di Federashon Deportivo Olímpiko Kòrsou (FDOK) a instalá 10 baluarte nobo dia 29 di desèmber 2020. Den un seremonia impreshonante na Queens Ballroom di Marriott Beach Resort, a instalá dies miembro nobo den e salon kaminda ta inmortalisá figuranan destaká den deporte aki na Kòrsou.
E anochi di instalashon a tuma lugá limitá na invitadonan pa motibu di e situashon ku komunidat ta pasando aden ku Covid-19. Manera ta e tradishon, a habri e anochi ku invokashon na enkargo di Obispo mgr. Luis Secco, siguí despues pa palabranan di presidente di FDOK, Jean Francisca, i e mandatario enkargá ku deporte Steven Croes.Tambe tabata presente minister di Finansas Kenneth Gijsbertha.
Seguidamente a pasa pa instalashon di e baluartenan Magdalena “Magda” Faneyt (sòftbòl), Raoul Alias (dam), Marcel Brigitha (beisbòl), Eelco Gonet (basketbòl), Erwin Martis (atletismo), Ivonne Leito-Senff (karate), Michael Arvelo (biar), Gustavo “Taffy” de Jongh (sòftbòl), Wilfrido Coffi (futsal) i Philip “Lipo” Elhage (beisbòl).
Den dianan benidero Deporte Korsou tin CV kompletu di tur e baluartenan.
