Glenka Antonia ta gana Premio Beto Adriana i Jean Francicsa ta drenta Salon di fama di FDOK
WILLEMSTAD – Djaweps 15 di òktober, Federashon Deporte i Olímpiko Kòrsou (FDOK) a selebrá su tradishonal evento FDOK “Honors Night 2026” na Hotèl Renaissance. Durante e anochi a rekonosé e logronan di mas grandi di nos deporte, i a konta ku presensia di diferente miembro di CANOC (Caribbean Association of National Olympic Committees), ku ta aktualmente na Kòrsou pa un Asamblea General.
Na final Glenka Antonia a sali overall winner ganando e premio Beto Adriana i Rignaal ‘Jean’ Francisca a drenta Salon di Fama di FDOK.
Un di e momentonan mas memorabel i emoshonal di e anochi tabata e tributo “Loving Memories” dediká na sr. Ruthsel Martina (q.e.p.d.), eks-miembro di direktiva di FDOK, balorando su gran aporte na e desaroyo deportivo di Korsou.
Instalashon den Salon di Fama
E aña aki un miembro so a drenta den Salon di Fama ku ta Sr. Rignaal “Jean” Francisca, pa su añanan di dedikashon, trayektoria i liderazgo den mundu deportivo.
E premiashon di atleta wes i dirigentenan di aña 2025 a bai di e siguiente manera:
• Prospekto Hubenil: Gabriel Londoño Ruiz (Karate)
• Wes di Aña: Rudsel Nepomuceno (Karate)
• Dirigente Atministrativo: Liebeth Luis-Calister (Vòlibòl)
• Dirigente Tékniko: Carlos Pineda (Beisbòl)
• Hubenil Femenino: Katherine Brazil (Tènis)
• Hubenil Maskulino: Raminge Laker (Atletismo)
• Senior Femenino: Glenka Antonia (Atletismo)
• Senior Maskulino: Ruviene Mathilda (Karate)
• Selekshon di Aña: Selekshon di Futbòl
• Federashon di Aña: Federashon di Beisbòl
