`
Wak e Kos Lam Yuen ta gana Santa Rosa Royals i pika dilanti den final di Beisbòl Veterano 50+
WILLEMSTAD — Wak e Kos di spònser pa Lam Yuen Restaurant a gana Santa Rosa Royals relatívamente fásil ku skor di 8-3 i pika dilanti den e seri final mihó di 3 di Beisbòl Veterano Liga 50 di 2026. Wak e Kos ta falta un wega mas pa ripití e título ku nan a konkistá na 2025. Wak e Kos a kombiná e pichernan Irving ‘Skippy’ Sambo i Amador ‘Shon A’ Nita pa e viktoria. Amador Nita mes a bati di 3-2. Wega number 2 di e seri final lo kontinuá djadumingu awor pa 2’or di mèrdia na Vi Jansen Ballpark. Djasabra tabatin weganan di e 'Round Robin' di Liga 40 i nos ta pendiente di e resultadonan.
Wak e Kos 8, Santa Rosa Royals 3
Wak e kos a dal 10 hit i hasi 1 eror. Eldred Estanista a bati di 3-2. Luigi Yanes i Amador Nita tambe a bati di 3-2. Amador Nita tabata e picher ganadó.
Santa Rosa a konektá 8 hit i hasi 2 eror. Orsendo Clemencia tabata e picher pèrdèdó i Roling Eustatius a bati di 3-2.
Tur Goso ta pika dilanti den playoff final Liga Streanan di Ayera
WILLEMSTAD- Tur Goso a gana ekipo Jaguar Queens den tie break ku skor di 7-6 i pika dilanti den e seri final di Liga Streanan di Ayera. E wega aki ta tuma lugá djadumingu 4 di òktober na Jaguar Park na Muizenberg . Wega number 1 di e seri a keda empatá na 5 despues di 10 inning i e wega ei a keda kompletamente hungá di nobo.
Wega number 2 di e seri lo tuma lugá djadumingu awor 3’or na Jaguar Ballpark. Tur Goso ganando lo bira kampion i si Jaguar gana lo tin un wega finalisimo dia 18 di òktober.
Tur Goso 7, Jaguar 6
Tur Goso a bati 6 hit i a hasi 3 eror. Picher ganadó tabata Sevilla Martina ku a tira wega kompletu. Joyce Arnhem i Natasha Marcelia a bati di 3-2.
Jaguar Queens a dal 8 hit i kometé 2 eror. Maudrid Faneyt tabata e picher pèrdèdó i Loeshemaris Kook a bati di 3-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. Djasabra awor ta selebrá Dia di Pais Kòrsou i no tin wega di playoff di Liga 50 Sòftbòl na Van Engelen Ballpark. Ban Serio a manda un protesta adén riba e wega ku a keda di forfeit djasabra 3 di òktober. Sea e final di Liga 50 lo start djasabra 17 di òktober òf lo tin parti final di e wega entre Ban Serio i Baranka ku Baranka dilanti den e wega 3-0 den di 5 inning. Baranka ta dilanti den e seri tambe despues ku nan a gana e promé wega di semifinal ku skor di 5-4 djasabra dia 26 di sèptèmber.
* * * * *
Ekipo Wak e Kos di spònser pa Lam Yuen Restaurant a gana e promé wega di e final di Beisbòl Veterano 50+ na Vi Jansen Ballpark. Nan a gana Santa Rosa Royals ku skor di 8-3. Ta di dos aña sigí e ekiponan menshoná ta den final di Beisbòl Veterano. Un tempu Jandoret Raiders tabata dominá den 50+ di Beisbòl Veterano, pero despues di e temporada di 2025 e ekipo a stòp di partisipá. Jandoret Raiders 50+ tabatin 6 título di Beisbòl Veterano den 8 temporada. Jandoret a stòp ku Beisbòl 40+ na 2024 despues ku e ekipo a drenta den Sòftbòl 50+ den un kombinashon ku e ekipo Catpower.
* * * * *
Torneo Dutch Caribbean 60+ organisá pa e ekipo Koala Bears di Hulanda a resultá un éksito rotundo. Bon desishon di e organisashon enkabesá pa Ron Stewart pa organisá e torneo na Kòrsou enbes di warda ekiponan di Kòrsou, Aruba, Boneiru i Sint Maarten bini Hulanda. Boneiru a keda rabiá debí ku ta Hulanda nan tabata ke bai i no a bini Kòrsou. Ekiponan di Aruba, Kòrsou, Hulanda i Sint Maarten a kompetí for di djaweps te ku djadumingu den un Frank Curiel Ballpark kargá ku fanátiko tur dia. Ekipo Lions a gana di Nos Tambe Por ku skor di 8 pa 3 den e final pa bira kampion di e torneo.
* * * * *
Ekipo Nos Tambe Por tabata kampion aña 2023, 2024 i 2025. Na 2022 e torneo a start i tabata ekipo di Aruba Juniors ku a bira kampion. Pa 2027 e torneo lo tuma lugá na Sint Maarten i e organisadónan a bisa na entrega di premio djadumingu último ku nan lo organisá e torneo den luna di novèmber i no na komienso di òktober. Nan a pidi otro ekiponan pa tene kuenta ku esei. E organisadónan di e torneo di 2026 a yama danki na e ekiponan ku a partisipá.
* * * * *
Ta trata akí nan di e ekiponan Lions, Nos Tambe Por, Los Amigos, Koala Bears, The Legion (Aruba), Tigers di Sint Maarten, Nos Repos Sluggers i Baranka. 8 ekipo repartí den dos pul. Kasi tur e ekiponan akí lo ta presente na Sint Maarten den 2027. Baranka ta e ekipo nobo den Liga 60 i pa promé biaha a partisipá den Dutch Caribbean Master 60+. E torneo ta tuma lugá den un temporada ku no tin otro kompetensianan internashonal di Slowpitch.
* * * * *
Tur Goso a gana Jaguar Queens ku skor di 7-6 den un wega dramátiko atrobe ku a bai tie-break. Wega number 1 di e seri final mihó di 3 a bai tie-break i awor e wega number 2 tambe a bai tie-break. Bon públiko na Jaguars Ballpark apesar ku tabatin hopi públiko na Frank Curiel Ballpark tambe. Djadumingu awor ekipo Tur Goso tin chèns di bira kampion di e liga atrobe. By the way, nos no a tende nada mas di Liga di Nos Tur, Liga Femenino Veterano i tin tur indikashon ku e liga lo no drei e aña akí òf a pasa pa historia. Nos ta keda te akí pa awe i te djabièrnè ku Poder di Dios.
