Akademia di Beisbòl Banda Bou Tigers a risibí donashon
WILLEMSTAD- Resientemente organisashon Akademia di Beisbòl Banda Bou Tigers a risibí donashon di varios artikulo pa praktiká Beisbol serka Brent de Graaf. Brent de Graaf ku ta un gran fanátiko di Beisbòl, ta biba na Los Angeles i ta bon amigu di Hensley Meulens. Brent ku sa bini Kòrsou pa Curacao Baseball Week, tabata na Kòrsou for di 1 di yanüari pa e Curacao Baseball Week 2022 ku lástimamente a keda kanselá. Ela primintí di lo aportá ku un tim di Beisbòl Little League di Kòrsou i a bini bèk pa hasi un donashon na e organisashon.
Brent huntu ku su sra. Alina i hasi e donashon. E muchanan tabata sumamentu kontentu i a gradisí Brent de Graaf i su señora. E organisashon a risibí entre otro undershirt ku ta match bon ku e unifòrm, sapatu di bala, batting glove, pitcher net, player bags ets. Brent de Graaf i su señora gusta Kòrsou mes mes i ta un spònser di Curacao Baseball Week.
Ildion Martina lo keda ku Santa Rosa Indians
WILLEMSTAD- Di bon fuente Deporte Kòrsou a risibí informashon ku Idion Martina lo keda ku e organisashon di Santa Rosa Indians. E fuente a bisa nos ku bèrdat tabatin un mal komprondementu, pero no ta manera e asuntu ta papia den kaya. Direktiva di Santa Rosa Indians lo reuní den dianan benidero ku e kècher estelar Ildion Martina pa e keda Santa Rosa. Ildion tin 6 aña kaba ku ekipo Santa Rosa i ta hasiendo un tremendo trabou tras di plato e último añanan. Ildion tabata klave den e titulo di Santa Rosa na aña 2020 kontra di Wild Cats. Na 2021 Ildion a bati pa average di .323, produkto di 20 hit den 62 turno ku 18 RBI den 19 wega. Nos ta sigi e desaroyonan i den kurso di otro siman tin mas detaye.
Interes for di Aruba pa Torneo Wim Felicia
WILLEMSTAD- Ekiponan Kibaima di 40+ i Astros di Aruba 60+ a mustra interes pa partisipá na Torneo 47 aña Wim Felicia den Slowpitch. Representante di Kibaima, Wendy Kelly, a tuma kontakto ku organisadónan di e torneo e siman aki, miéntras ku na komienso di yanüari, Dennis Blijden di Astor 60+ tabata den kontakto ku e organisadónan. E Torneo Wim Felicia lo tuma lugá dianan 1, 2 i 3 di yüli 2022 i ta pa ekiponan 40, 50 i 60+. Naturalmente ekiponan di Kòrsou i Boneiru tambe lo tuma parti na e torneo. Invitashon ta saliendo pa ekiponan di Kòrsou, Aruba i Boneiru. No ta eksklui e chèns ku ekiponan di Sint Maarten tambe lo partisipá. Masha tempu Sint Maarten ke lanta 50+ Sòftbòl. Na Sint Maarten tin Sòftbòl Slowptich di e hóbennan i di 40+. Keda pendiente pa mas detaye di Torneo Wim Felicia.