Aktuashon di nos futbolistanan den eksterior
E hóben periodista i analista deportivo Carl Ruiter tur siman ta relatá aktuashon, detaye i análisis di nos futbolistanan of mihó bisa futbolistanan di famia Kurasoleño i Antiano den ekterior. Carl ta redaktor deportivo i presentado di e programa di Deporte ‘Deporte Hoyer’. Tambe Carl ta produktor di programanan di deporte na TV Direct.
Nos futbolistanan tabata bèk den akshon despues di fecha FIFA.
• Rangelo Janga a hunga 58 minüt pa NEC Nijmegen den nan empate na 1 kontra Roda JC.
Rangelo a tèst positivo pa Covid-19 i awor ta bèk ku su ekipo. Pa Janga esaki tabata su promé wega for di 23 di òktober.
• Kevin Felida a hunga wega kompletu pa Fc Den Bosch den nan den empate na 2 kontra Jong Ajax. Kevin den e wega akí tabatin tambe su di dos pase di gol di temporada. Felida ta sigui mustra su importansia pa Den Bosch.
• Den mesun wega Sontje Hansen a hunga kompletu pa Jong Ajax. Tabata di 5 wega siguí ku Sontje ta kuminsá komo titular pa Jong Ajax.
• I den e kurason di e defensa di Jong Ajax Jurrien Timber a hunga e 90 minüt den e empate.
• Shurandy Sambo ku su di dos pase di gol di temporada pa Jong PSV den e empate na 3 kontra MVV Maastricht. E rèksbèk di 19 aña a hunga e wega kompletu.
• Jeremy Antonisse ku a kaba di promové pa Jong PSV no tabata riba banki pa e wega aki. I pa loke ta trata Shermar Martina di MVV, e no tabata den forma pa por tabata parti di e wega. Tur dos tabata parti di e "trainingskamp" di selekshon nashonal.
• Gervane Kastaneer no tabata parti di e wega pa Coventry City na Inglatera. E atakante di 24 aña a hunga apénas 1 wega pa Coventry den di dos divishon na Inglatera.
• Roly Bonevacia a hunga wega kompletu pa su ekipo di Al Fujairah na Emiratonan Arabe. Al Fujairah a gana di Hatta ku skor di 1 pa 0.
• Brandley Kuwas ku tabata parti di e "trainingskamp" a hunga 88 minüt den e derota di su ekipo Al - Nasr den e liga prinsipal di Emiratonan Arabe.
• Tahith Chong a hunga e último minüt den e empate na 1 di su ekipo Werder Bremen kontra Bayern München den wega bálido pa Bundesliga (promé divishon na Alemania). Tahith e temporada aki tin 177 minüt hungá den 7 wega (2 komo titular) pa Bremen.
• Jafar Arias tabata titular pa su ekipo di VVV Venlo den fin di siman. Nan a pèrdè 2 pa 1 kontra Willem II. Esaki tabata di dos wega siguí ku Jafar ta kuminsá komo titular.
• Tommy St.Jago, di 20 aña, un biaha mas tabata titular den defensa di Fc Utrecht. Nan a empatá na 1 kontra PEC Zwolle. Tur su 8 weganan den Eredivisie tabata komo titular.
• Giovann Troupée a hunga rèksbèk pa Fc Utrecht den e partido kontra PEC. E 90 minütnan ku el a hunga tabata promé biaha ku e la hasi esaki den Eredivisie for di februari di e aña aki.
• Jearl Margaritha a kuminsá su promé wega komo titular pa Almere City e temporada aki. E delantero ku tabata tei pa "trainingskamp" tin 1 gol e temporada aki.
• Leandro Bacuna a kuminsá un biaha mas na rèksbèk pa Cardiff City. E Saminero asina tin 5 wega siguí komo titular na e posishon ei pa su ekipo. Cardiff a empatá na 1 ku Millwall.
• E otro Saminero Juninho Bacuna a hunga e último 31 minütnan den e derota di su ekipo di Huddersfield Town. Nan a pèrdè 4 pa 3 kontra Stoke City.
• Eloy Room ku den siman a gana e "Save of the year" (E mihó hungada pa salba gol) den MLS a mustra dikon e ta un di e mihó kipernan di CONCACAF. Eloy a yuda su ekipo sumamente bon den e último minüt di wega, ku vários salbashon. Su ekipo Columbus Crew a gana di New York Red Bulls 3 pa 2 i ta avansá pa e kuart final di playoff di MLS.
• Gino Van Kessel a hunga e último 8 minütnan pa su ekipo di Olympiakos Nicosia den wega bálido pa promé divishon di Chipre. Nan a gana di APOEL Nicosia ku skor di 1 pa 0.
• Gevaro Nepomuceno a hunga e último 6 minütnan pa su ekipo di FC Halifax Town den un wega bálido pa di 5 divishon na Inglatera. Gevaro resientemente tabata riba nos isla pa e "trainingskamp".
• Jeremy Cijntje no a mira akshon pa Heracles den e derota di 5 pa 0 kontra Ajax. Cijntje a hunga 135 minüt den 6 wega e temporada aki pa Heracles.
• Lutsharel Geertruida a hunga lenksbèk pa Feyenoord den nan viktoria di 3 pa 1 kontra Fortuna Sittard. Lutsharel ta keda menshoná komo un posibel refuerso pa nos selekshon nashonal.
• Jurien Gaari tabata riba banki den e empate na 1 di su ekipo di RKC Waalwijk.
• Sherel Floranus a hunga 90 minüt pa Heerenveen. E la haña tambe un karchi hel.
• Lentini Caciano a hunga 5 minüt pa Emmen den nan derota di 1 pa 0 kontra AZ. Esaki tabata e promé wega pa Caciano den un luna.
• Charlison Benschop i su ekipo di Apollon Limassol ku viktoria di 2 pa 1 riba AEK Lamaca den wega bálido pa promé divishon di Chipre. Benschop a hunga 63 minüt den e wega aki.
• Anthony Van de Hurk a hunga wega kompletu pa Helsinborg den Liga di Suesia. Nan a pèrdè 2 pa 1 kontra Elfsborg.
• Quenten Martinus i su ekipo di Urawa Red Diamonds a pèrdè 2 pa 1 kontra Gamba Osaka den promé divishon Hapones. Quenten a hunga e 90 minütnan pa Urawa.
