The Greatest ta gana Legends di Aruba i bira kampion Kopa ABC40+
ORANJESTAD - The Greatest di Kòrsou a gana Legends di Aruba ku skor di 8 pa 7 i bira kampion Kopa ABC 40+. E torneo a tuma lugá di 30 di aprel pa 4 di mei na hermana isla Aruba.
Den e wega final Randy Kirindongo a bati di 3-3, Jair Josepha di 4-3, Ryan Ogenia di 4-2 i Dave Kirindongo di 2-1. Fernando ‘Paisa’ Rosario tabata e picher ganadó. Lorenzo Dirksz tabata e picher pèrdèdó pa Legends di Aruba i Edgar Flanegin a bai di 4-2. Anthony Thompson i Revelino Sille di 1-1. The Greatest a gana Pirates 7-2 dia 1 di mei. Dia 2 di mei The Greatest a gana Union Dominicano 11-8. Djasabra 3 di mei The Greatest a gana Quisqueya 12-10 i gana Leftovers riba mesun fecha 11-1. Den play-off The Greatest a gana Survival 9-0 i pasa pa final pa gana Legends 8-7. Despues di wega tabatin entrega di premio.
Jandoret i Jaws kampion Torneo Lions 2025
WILLEMSTAD- Jandoret Raiders a gana ekipo Lions ku skor di 13 pa 3 pa bira kampion Torneo Lions 2025 kategoria 50+. Jandoret Raiders a terminá e torneo invikto i bira kampion di 3 torneo sigí pa debutá e aña aki den Liga 50 di Sòftbòl.
Den e final di Liga 60 ekipo Jaws a gana Nos Tambe Por ku skor di 8-3 pa titulá kampion. Despues di e weganan final tabatin entrega di premio dor di direktiva di ekipo Lions, organisadó di e torneo. Ekipo Jandoret Raiders a risibí un kaha di serbes komo kampion i Jaws a haña dos kaha di serbes.
Teksto pa pòtrèt:
Jandoret Raiders kampion Torneo Lions 50+.
Jaws kampion Torneo Lions 60+.
Fanátikonan di Deporte Kòrsou, bondia. Nos ta manda pabien na vários ekipo ku a titulá kampion den wikènt ku a pasa, entre otro The Greatest ku a bira kampion di Torneo Kopa ABC 2025 40+ ku a tuma lugá na Kudawecha di 30 di aprel pa 4 di mei. The Greatest a batayá entre grandinan di 40 di Aruba, Boneiru i Kòrsou pa titulá kampion. Di Kòrsou a bai The Greatest (Baranka) i Cicoza Legends. The Greatest a klasifiká pa semi-final i Cicoza no a bai semi-final, debí ku nan a kai afó pa diferensia di kareda. E wega final a terminá ku skor di 8 pa 7 na fabor di Baranka i Randy Kirindongo a bati di 3-3, Jair Josepha di 4-3, Ryan Ogenia di 4-2 i Dave Kirindongo di 2-1. Ke mèn Baranka /The Greatest tei bèk den ABC 2025, ántes Classico ABC 40+.
* * * * *
Aki na Kòrsou ekiponan Jandoret Raiders i Jaws a bira kampion di Torneo Lions den kategoria 50+ i 60+ respektivamente. Jandoret Raiders a gana Lions ku skor di 13-3 den e final di 50+ i Jaws a gana nan eterno rival ekipo Nos Tambe Por ku skor di 8-3 den e final di 60+. Despues di wega tabatin entrega di premio. Ekipo Jaws di 60+ a gana dos kaha di serbes i Jandoret Raiders a risibí un kaha di serbes. E torneo tabata fundraising di ekipo Lions i ta un torneo tradishonal ku ta tuma lugá nèt promé ku kampionato di Liga 60 kuminsá. Kampionato di Liga 60 lo start dia 18 di mei na Frank Curiel Ballpark.
* * * * *
Jandoret Raiders (Catpower) a debutá den gran forma tambe den kampionato di Liga 50 ganando ekipo Lions ku skor di 20-1. Den e promé wega di e kampionato 2025, Jaws a gana Sluggers ku skor di 13 pa 9. Marlins a dal Pitufos 10 pa 6. Den e último wega di djasabra ku a pasa, ekipo Flamboyan/Gamers a laga ekipo Artemisia den tereno ku skor di 11-10. Artemisia tabata ganá ku skor di 9-2 bayendo último inning, pero Flamboyan ta logra nota 7 kareda den bòm di e di 6 inning pa finalmente gana 11-10 den Tie Break. Nos ta pendiente pa publiká e numeritonan.
* * * * *
Miéntras tantu The Diamond Stars League a sigi na Sam Bunting Ballpark ku 4 partido den wikènt. Treasure New Era a sorprendé ekipo Rising Phoenix djabièrnè 2 di mei i kibra nan invikto. Treasure a presenta zetá pa gana e wega aki ku nan picher Otto-Apostel ku a logra gana di Marie Windster ku a picha pa ekipo Rising Phoenix. Rising Phoenix ta kampion di 2024 i ta promé wega ku nan ta pèrdè den 2025. Rising Phoenix tabatin rèkòrt di 8-0 promé ku e wega menshoná. Den e otro weganan di wikènt Nos Goso a gana di Mas Goso ku skor di 9-2. Djasabra Rising Phoenix a dal The Fighters durísimo ku skor di 10-0. Treasure New Era a gana di Mas Goso tambe den wikènt i den e kaso aki 12-1.
* * * * *
Aki na Kòrsou nos ta sigi prepará pa dos torneo grandi riba nivel di Little League, kaminda fin di yüni lo tin kampionato di Karibe di Senior League (15-16 aña) 23 pa 28 di yüni i di Little 7 pa 12 di yüli . Senior lo tuma lugá den Tio Daou Ballpark i Little League lo tuma lugá den Stadion Post 6. Kòrsou lo ta di fiesta naturalmente riba e dianan menshoná i manera kustumber e dos parkenan kompletamente yen. Den tur dos seri selekshonnan di Liga Pabou lo hunga prime time, esta 7’or di anochi debí ku nan a gana e serinan na Kòrsou. Naturalmente ta di nobo tur kos ta kuminsá i e selekshonnan ku gana lo representá Karibe den e Mundialnan.
* * * * *
Selekshon Junior di Kòrsou representá pa Liga Pariba lo ta na Guatemala di 5 pa 11 di yüli. Selekshon Intermediate lo ta na Puerto Rico di 22 pa 28 na Mayaguez. Minor lo ta na Punta Cana di 24 pa 31 di yuli. Nos lo tin mas detaye riba desaroyonan di Little League den e dianan benidero. Bek pa Slowpitch, Ekipo Dimi ku tabata hunga Sòftbòl Slowpitch i Fastpitch lo selebrá 40 aña di eksistensia na Hulanda den 2026. Nos ta keda te aki pa awe, te mayan ku Poder di Dios
